ഒമ്പതാം ക്ലാസ് വിദ്യാര്‍ത്ഥിനിയെ വീട്ടില്‍ തൂങ്ങി മരിച്ച നിലയില്‍ കണ്ടെത്തി... കുട്ടിയുടെ രക്ഷിതാക്കള്‍ ബന്ധുവിന്റെ മരണ വീട്ടില്‍ പോകുമ്പോള്‍ പെണ്‍കുട്ടിയെ അയല്‍വാസിയുടെ വീട്ടിലാക്കിയശേഷമാണ് പോയത്, ദുരൂഹത ആരോപിച്ച് പോലീസില്‍ പരാതി നല്‍കി ബന്ധുക്കള്‍

വെണ്ണിയൂര്‍ നെല്ലി വിളാകത്ത് വീട്ടില്‍ സരേഷ് കുമാര്‍ പ്രമീള ദമ്പതികളുടെ മകള്‍ അലന്യ (കല്ലു15) നെയാണ് മരിച്ച നിലയില്‍ ഇന്നലെ വൈകിട്ട് ഏഴോടെ അയല്‍വാസികള്‍ കണ്ടെത്തിയത്. വെങ്ങാനൂര്‍ ഗേള്‍സ് ഹയര്‍ സെക്കന്‍ഡറി സ്‌കൂളിലെ വിദ്യാര്‍ത്ഥിയാണ്.

ദുരൂഹത ആരോപിച്ച് ബന്ധുക്കള്‍ വിഴിഞ്ഞം പൊലീസിന് പരാതി നല്‍കി. സംഭവ സമയത്ത് പെണ്‍കുട്ടി വീട്ടില്‍ തനിച്ചായിരുന്നു. കുട്ടിയുടെ രക്ഷിതാക്കള്‍ ബന്ധുവിന്റെ മരണ വീട്ടില്‍ പോയിരിക്കുകയായിരുന്നു. പെണ്‍കുട്ടിയെ അയല്‍വാസിയുടെ വീട്ടിലാക്കിയ ശേഷമാണ് ഇരുവരും പോയത്.വൈകിട്ട് 6.45 ഓടെ വീട്ടില്‍ പോയി ഭക്ഷണമെടുത്തിട്ട് വരാമെന്ന് പറഞ്ഞ് പോയതായിരുന്നു കുട്ടി.

ഏറെ സമയമായിട്ടും കാണാത്തതിനെ തുടര്‍ന്ന് ബന്ധു തിരക്കി ചെന്നപ്പോഴാണ് പെണ്‍കുട്ടിയെ തൂങ്ങിയ നിലയില്‍ കണ്ടത്. ഇവര്‍ ബഹളം വച്ചതിനെ തുടര്‍ന്ന് നാട്ടുകാര്‍ ഓടി കൂടുകയും പൊലീസില്‍ വിവരമറിയിക്കുകയുമായിരുന്നു.

ഷീറ്റിട്ട വീട്ടിലെ സ്വീകരണ മുറിയിലെ ഇരുമ്പ് പൈപ്പില്‍ ഷാളുകൊണ്ട് കുരുക്കിട്ട് തൂങ്ങിയ നിലയിലായിരുന്നു മൃതദേഹം. കാല്‍ മുട്ടുകള്‍ തറയില്‍ തട്ടിയിരുന്നതായി ബന്ധു പറഞ്ഞു. സ്‌കൂള്‍ യൂണിഫോമായിരുന്നു വേഷം.

മരിക്കുന്നതിന് തൊട്ടുമുമ്പുവരെ സന്തോഷത്തിലായിരുന്ന കുട്ടിയുടെ മരണത്തില്‍ ദുരൂഹതയുണ്ടെന്ന് ബന്ധുക്കളും നാട്ടുകാരും പറഞ്ഞു. ഇന്‍ക്വസ്റ്റ് നടപടികള്‍ ഇന്ന് പൂര്‍ത്തിയാക്കും. വിഴിഞ്ഞം പൊലീസ് കേസെടുത്ത് അന്വേഷണം തുടങ്ങി. ഫോറന്‍സിക് സംഘം ഇന്ന് സ്ഥലത്തെത്തി തെളിവെടുപ്പ് നടത്തും.