കാത്തിരുന്ന് കാണാം... അടുത്ത ലോക്സഭാ തിരഞ്ഞെടുപ്പില് ഇടതുകക്ഷികളടക്കം പാര്ട്ടികളെ ഒരു കുടക്കീഴിലാക്കി ബിജെപിക്കെതിരെ ഐക്യനിര രൂപീകരിക്കാന് കോണ്ഗ്രസ് മുന്കയ്യെടുക്കണമെന്നു കരടുരാഷ്ട്രീയ പ്രമേയം; ഒരു തവണ കൂടി ബിജെപി അധികാരത്തിലെത്തിയാല് കോണ്ഗ്രസിന്റെ തകര്ച്ചയ്ക്ക് കാരണമാകും
അടുത്ത ലോക്സഭാ തെരഞ്ഞെടുപ്പില് എങ്ങനേയും അധികാരത്തിലെത്താനുള്ള ശ്രമത്തിലാണ് കോണ്ഗ്രസ്. അല്ലെങ്കില് കോണ്ഗ്രസിന്റെ നിലനില്പ്പ് തന്നെ അപകടത്തിലാകും. കേരളത്തില് കോണ്ഗ്രസും ഇടതുപക്ഷവും തമ്മില് പൊരിഞ്ഞ പോരാണ്. എങ്കിലും കേന്ദ്രത്തില് അവരുടേയും പിന്തുണ ഉറപ്പിക്കാനുള്ള ശ്രമത്തിലാണ് കോണ്ഗ്രസ്. അടുത്ത ലോക്സഭാ തിരഞ്ഞെടുപ്പില് ഇടതുകക്ഷികളടക്കം പാര്ട്ടികളെ ഒരു കുടക്കീഴിലാക്കി ബിജെപിക്കെതിരെ ഐക്യനിര രൂപീകരിക്കാന് കോണ്ഗ്രസ് മുന്കയ്യെടുക്കണമെന്നു പ്ലീനറി സമ്മേളനത്തിനുള്ള കരടുരാഷ്ട്രീയ പ്രമേയം നിര്ദേശിച്ചു.
ഒരു തവണ കൂടി ബിജെപി അധികാരത്തിലെത്തിയാല് ജനാധിപത്യത്തിന്റെയും കോണ്ഗ്രസിന്റെയും തകര്ച്ചയ്ക്ക് അതു വഴിവയ്ക്കുമെന്ന ആശങ്ക പ്രമേയ രൂപീകരണയോഗത്തില് നേതാക്കള് പങ്കുവച്ചു. ഹിറ്റ്ലര് ഭരിച്ച ജര്മനിയിലേതു പോലെ ഇന്ത്യയെ മതാധിഷ്ഠിതമാക്കാനുള്ള ശ്രമം നടക്കുന്നു.
കോണ്ഗ്രസിന് ഒറ്റയ്ക്ക് അധികാരത്തിലേറാനുള്ള രാഷ്ട്രീയ സാഹചര്യം നിലവിലില്ല. സഖ്യത്തിനു മാത്രമേ അതിനു സാധിക്കൂ. ബിജെപിയെ തടയാന് യാഥാര്ഥ്യബോധത്തോടെയുള്ള സഖ്യങ്ങള്ക്കു കോണ്ഗ്രസ് രൂപം നല്കണം. പ്രതിപക്ഷത്തെ കോര്ത്തിണക്കാന് കോണ്ഗ്രസല്ലാതെ മറ്റൊരു പാര്ട്ടിക്കും സാധിക്കില്ലെന്നും നേതാക്കള് ചൂണ്ടിക്കാട്ടി.
എന്എസ്യു ഐ, യൂത്ത് കോണ്ഗ്രസ്, മഹിളാ കോണ്ഗ്രസ് എന്നിവയെ പുനരുജ്ജീവിപ്പിക്കണമെന്നും നിര്ദേശമുയര്ന്നു. വീരപ്പ മൊയ്ലിയുടെ നേതൃത്വത്തിലുള്ള രാഷ്ട്രീയ പ്രമേയ രൂപീകരണ സമിതിയില് മുല്ലപ്പള്ളി രാമചന്ദ്രനടക്കമുള്ളവര് അംഗങ്ങളാണ്.
ഭാരത് ജോഡോ യാത്രയുടെ തുടര്ച്ചയായി രാഹുല് ഗാന്ധിയുടെ നേതൃത്വത്തില് കിഴക്ക് നിന്ന് പടിഞ്ഞാറേക്കു മറ്റൊരു യാത്ര നടത്തുന്ന കാര്യം റായ്പുരിലെ പ്ലീനറി സമ്മേളനത്തില് ചര്ച്ച ചെയ്യും. അംഗീകാരം ലഭിച്ചാല് വരും മാസങ്ങളില് യാത്ര നടത്തും. അരുണാചലില്നിന്ന് മഹാത്മാഗാന്ധിയുടെ ജന്മസ്ഥലമായ ഗുജറാത്തിലെ പോര്ബന്തറിലേക്കായിരിക്കും യാത്ര.
2024 ല് ബിജെപിയെ ജനങ്ങള് പാഠം പഠിപ്പിക്കും. അടുത്തവര്ഷം സഖ്യസര്ക്കാര് രാജ്യത്ത് അധികാരത്തില് വരും. കോണ്ഗ്രസ് അതിനു നേതൃത്വം നല്കുമെന്നും കോണ്ഗ്രസ് പ്രസിഡന്റ് മല്ലികാര്ജുന് ഖര്ഗെ പറഞ്ഞു.
അതേസമയം രാഹുല് ഗാന്ധിയുടെ മുന് ഗണ്മാന് കെ എം ബൈജുവിനെ പുതിയ പുനഃ സംഘടനയില് എ ഐ സി സി അംഗമാക്കി. രാഹുലിന്റെ അടുത്ത ആളായ ഇയാളെ പ്രത്യേക താത്പര്യമെടുത്താണ് എ ഐ സി സി യില് പ്രതിഷ്ഠിച്ചത്. കോട്ടയം കൂരോപ്പട സ്വദേശിയാണ്. രാഹുലുമായി ബന്ധപ്പെട്ട കേന്ദ്രങ്ങള് കേരളത്തില് നിന്നുമുള്ള എഐസിസി പട്ടികയില് ഇയാളെ ഉള്പ്പെടുത്താന് വലിയ സമ്മര്ദ്ദം നടത്തിയിരുന്നു.
കെ സുധാകരന് പക്ഷത്തിന്റെ കടുത്ത എതിര്പ്പിനെ തുടര്ന്ന് പിന്വാങ്ങുകയായിരുന്നുവെന്നാണ് വിവരം. ഇതേ തുടര്ന്നാണ് ഡല്ഹിയില് നിന്ന് അവസാന പേരുകാരനായി ബൈജുവിനെ പട്ടികയില് ഉള്പ്പെടുത്തുന്നത്. ഡല്ഹിയില് കോണ്ഗ്രസില് കാലങ്ങളായി പ്രാദേശിക തലത്തിലടക്കം പ്രവര്ത്തിക്കുന്ന മലയാളികളെ തഴഞ്ഞാണ് ബൈജുവിനെ ലിസ്റ്റില് ഉള്പ്പെടുത്തിയത് .
കെ വി തോമസ് ,ഗുലാം നബി ആസാദ് തുടങ്ങി നിരവധി പേര് പല അവസരങ്ങളില് കെ എം ബൈജുവിന്റെ അവിഹിതമായ സ്വാധീനത്തെ ക്കുറിച്ചു പരാമര്ശിച്ചിട്ടുണ്ട്. ഗുലാം നബി ആസാദ് രാജി വെച്ചപ്പോള് ബൈജുവിനെതിരെ പ്രസ്താവന ഇറക്കിയിരുന്നു. രാഹുല് ഗാന്ധിയുടെ ഓഫീസിലെ രാഷ്ട്രീയം നിയന്ത്രിക്കുന്നത് ചില സെക്യൂരിറ്റികള് ആണെന്ന് അദ്ദേഹം പ്രസ്താവന നടത്തിയിരുന്നു. കേരളത്തിലെ സാധ്യത ഇല്ലാതായപ്പോള് ഡല്ഹിയില് നിന്ന് അവസാന പേരുകാരനായിട്ട് ബൈജുവിനെ പട്ടികയില് ഉള്പ്പെടുത്തുകയായിരുന്നു.
"
https://www.facebook.com/Malayalivartha
