6000 പേരെ റവന്യൂ ഇന്‍ഫര്‍മേഷന്‍ ബ്യൂറോയുടെ യുട്യൂബ് ചാനലില്‍ ചേര്‍ത്തതിന് നന്ദി പറഞ്ഞുകൊണ്ട് പത്തനംതിട്ട ജില്ലയില്‍ റവന്യൂ വകുപ്പ് പ്രചരിപ്പിക്കുന്ന കാര്‍ഡിന്റെ ചിത്രമാണ് കാണിച്ചിരിക്കുന്നത്. റവന്യൂമന്ത്രിയുടെ പരിപാടികളുടെ വാര്‍ത്തകള്‍ പ്രചരിപ്പിക്കുന്നതിനുള്ള യൂട്യൂബ് ചാനലിന് വരിക്കാരെ ചേര്‍ക്കേണ്ടത് റവന്യൂ ജീവനക്കാര്‍. ഓരോ ജില്ലയും ചേര്‍ക്കേണ്ടവരുടെ എണ്ണം നിശ്ചയിച്ചുനല്‍കി.

ഇങ്ങനെ ഇതുവരെ ചേര്‍ത്തത് 84,100 പേരെ. ബുധനാഴ്ച കൊല്ലത്തും വ്യാഴാഴ്ച തിരുവനന്തപുരത്തും വരിക്കാരെ ചേര്‍ക്കുന്നതോടെ 14 ദിവസത്തെ പരിപാടി പൂര്‍ണമാകും. ഒരുലക്ഷം പേരെ ചേര്‍ക്കണമെന്നാണ് ലാന്‍ഡ് റവന്യൂ കമ്മീഷണര്‍ ടി.വി. അനുപമയുടെ ഉത്തരവിലുള്ളത്. കൊല്ലം ജില്ലക്കാര്‍ 8500 പേരേയും തിരുവനന്തപുരത്തുകാര്‍ 12,000 പേരെയുമാണ് ചേര്‍ക്കേണ്ടത്.

ഫെബ്രുവരി ആറിന് കാസര്‍കോട് ജില്ലയില്‍ 4500 പേരെ ചേര്‍ത്തുകൊണ്ടായിരുന്നു തുടക്കം. കണ്ണൂര്‍ (7500), വയനാട് (3500), കോഴിക്കോട് (7500), മലപ്പുറം (7500), പാലക്കാട് (7500), തൃശ്ശൂര്‍ (8500), എറണാകുളം (7500), കോട്ടയം (7000), ഇടുക്കി (5500), ആലപ്പുഴ (7000), പത്തനംതിട്ട (6000) എന്നിങ്ങനെയാണ് മറ്റു ജില്ലകളിലെ കണക്ക്.

ഒരു വില്ലേജ് ഓഫീസര്‍ 70 പേരെ ചേര്‍ക്കണം. ഓരോ റവന്യൂ ജീവനക്കാരനും ചുരുങ്ങിയത് അഞ്ചുപരെയും. റവന്യൂ ഇന്‍ഫര്‍മേഷന്‍ ബ്യൂറോ എന്നാണ് ചാനലിന്റെ പേര്. റവന്യൂ മന്ത്രിയുടെയും അദ്ദഹം കൈകാര്യംചെയ്യുന്ന മറ്റു വകുപ്പുകളുടെയും പരിപാടികളുടെ വാര്‍ത്തകള്‍ പ്രചരിപ്പിക്കുകയാണ് ചാനലിന്റെ ചുമതലയെന്ന് ലാന്‍ഡ് റവന്യൂ കമ്മീഷണര്‍ പറയുന്നുണ്ട്. ആര്‍.ഐ.ബി.യുടെ ഓഫീസറായി ഡെപ്യൂട്ടി കളക്ടര്‍ തസ്തികയില്‍ കുറയാത്ത ഉദ്യോഗസ്ഥനെ എല്ലാ ജില്ലകളിലും നിയമിച്ചിട്ടുണ്ട്.

ജില്ലയില്‍ വരിക്കാരെ ചേര്‍ക്കേണ്ടതിന്റെ ഉത്തരവാദിത്വം ഈ ഉദ്യോഗസ്ഥനാണ്. ഐ.ടി. കോ-ഓര്‍ഡിനേറ്ററുടെ സഹായത്തോടെ പ്രവര്‍ത്തനം ഏകോപിപ്പിക്കണം. താലൂക്ക് അടിസ്ഥാനത്തിലും ചുമതലക്കാരായി ഉദ്യോഗസ്ഥരെ നിശ്ചയിച്ചിട്ടുണ്ട്. ഭവന നിര്‍മാണ വകുപ്പിലെ ജീവനക്കാര്‍ക്കും വരിക്കാരെ ചേര്‍ക്കേണ്ട ജോലി നല്‍കിയിട്ടുണ്ട്.
ഒരുലക്ഷം വരിക്കാരെ ചേര്‍ത്തശേഷം റവന്യൂദിനമായ 24-ന് മുഖ്യമന്ത്രി ചാനലിന്റെ പ്രകാശനം നിര്‍വഹിക്കുമെന്നാണ് അറിയിച്ചിരിക്കുന്നത്. ചാനലില്‍ ഇപ്പോള്‍ ആര്‍.ഐ.ബി.യെക്കുറിച്ച് വിവിധ ജില്ലാ കളക്ടര്‍മാരും പ്രമുഖരും വിശദീകരിക്കുന്ന വീഡിയോകളാണുള്ളത്.