കൈക്കൂലി ട്രാപ്പു കേസില് ജോയിന്റ് കൗണ്സില് ഭാരവാഹിയായ താലൂക്ക് സര്വ്വേയര് അറസ്റ്റിലായ കേസ്... താലൂക്ക് സര്വ്വേയറെ റിമാന്റ ചെയ്തു
കൊല്ലം അഞ്ചലില് വസ്തു റീസര്വേയുമായി ബന്ധപ്പെട്ട് കൈക്കൂലി വാങ്ങുന്നതിനിടെ ജോയന്റ് കൗണ്സില് നേതാവിനെ വിജിലന്സ് അറസ്റ്റ് ചെയ്ത കൈക്കൂലി ട്രാപ്പു കേസില് താലൂക്ക് സര്വ്വേയറെ തലസ്ഥാന വിജിലന്സ് കോടതി റിമാന്റ് ചെയ്തു. പുനലൂര് താലൂക്ക് സര്വ്വേയര് മനോജ് ലാലിനെയാണ് തിരുവനന്തപുരം വിജിലന്സ് പ്രത്യേക കോടതി ജഡ്ജി രാജകുമാര 14 ദിവസത്തേക്ക് റിമാന്റ് ചെയ്ത് പൂജപ്പുര ജില്ലാ ജയിലിലേക്കയച്ചത്.
2023 മാര്ച്ച് 18 നാണ് താലൂക്ക് സര്വെയര് വിജിലന്സ് പോലീസിന്റെ പിടിയിലായത്. വസ്തു റീസര്വെ ചെയ്യാന് കരവാളൂര് സ്വദേശിയോട് മനോജ് ലാല് സര്ക്കാര് ഫീസല്ലാതെ 5000 രൂപ കൈക്കൂലി ആവശ്യപ്പെട്ട് വാങ്ങിയെന്നാണ് കേസ്.
പണമാവശ്യപ്പെട്ട വിവരം വസ്തു ഉടമ വിജിലന്സിനെ അറിയിച്ചു. മൊഴി വാങ്ങി കേസ് രജിസ്റ്റര് ചെയ്ത വിജിലന്സ് കെണിപ്പണമായ 2,000 രൂപ നോട്ടു നമ്പര് സഹിതം എന്ട്രസ്റ്റ്മെന്റ് ( നോട്ട് കൈമാറുന്ന വിവരം രേഖപ്പെടുത്തുന്ന ) മഹസ്സറില് രേഖപ്പെടുത്തി ഫിനോഫ്തലിന് പൊടി വിതറിയ ശേഷം പ്രതി ആവശ്യപ്പെടുമ്പോള് നല്കണമെന്ന നിര്ദേശത്തോടെ പരാതിക്കാരന് നല്കി.
തുടര്ന്ന് വിജിലന്സ് സംഘത്തോടൊപ്പം ഔദ്യോഗിക സാക്ഷികളായ രണ്ട് ഗസറ്റഡ് ഉദ്യോഗസ്ഥരും വാദിയും ഓഫീസില് എത്തി. വാദിയെയും 2 ഔദ്യോഗിക സാക്ഷികളെയും സര്വ്വേയരുടെ പക്കലേക്കയച്ച് വിജിലന്സ് സംഘം മറഞ്ഞു നിന്നു. 2000 രൂപ അഞ്ചല് മിനി സിവില് സ്റ്റേഷനിലെ സ്റ്റെയര്കെയ്സില് വച്ച് മനോജ് ലാലിന് കൈമാറുകയായിരുന്നു. പണം സര്വ്വേയര് കൈപ്പറ്റിയതായി വാദിയില് നിന്ന് സിഗ്നല് കിട്ടിയ ഉടന് തന്നെ സ്ഥലത്ത് രഹസ്യ നിരീക്ഷണം നടത്തുകയായിരുന്ന വിജിലന്സ് മനോജ് ലാലിനെ പിടികൂടി.
വിജിലന്സ് കൊണ്ടുവന്ന പൊട്ടാസ്യം പെര്മാംഗനേറ്റ് ലായനിയില് ഇയാളുടെ കൈവിരലുകള് മുക്കിയപ്പോള് ലായനി പിങ്ക് നിറമായി മാറി. ഇതോടെ കൈക്കൂലി കെണിപ്പണം പ്രതി കൈപ്പറ്റിയതായി ശാസ്ത്രീയമായി സ്ഥിരീകരിച്ച് പ്രതിയെ ചോദ്യം ചെയ്ത് അറസ്റ്റ് ചെയ്യുകയായിരുന്നു. വിജിലന്സ് പോലീസ് സ്റ്റേഷനില് വച്ച് വാദിയുടെ കൈവശം കൊടുത്തയച്ച അതേ നമ്പര് നോട്ടുകള് പ്രതിയില് നിന്നും കണ്ടെടുത്തു. സംഭവസ്ഥലത്ത് വച്ച് നോട്ടുകള് കണ്ട് റിക്കവറി മഹസര് തയ്യാറാക്കി. നോട്ടുകള് തൊണ്ടി ലിസ്റ്റായ കെ പി എഫ് (കേരളാ പോലീസ് ഫോഴ്സ് ) ഫോറം നമ്പര് 151 (എ) യില് വിവരിച്ച് ബന്ധവസിലെടുത്ത് പ്രതിയെയും തൊണ്ടി വകകളേയും കോടതിയില് ഹാജരാക്കി.
കൊല്ലം വിജിലന്സ് ഡിവൈ.എസ്.പി അബ്ദുല്വഹാബിന്റെ നേതൃത്വത്തിലുള്ള വിജിലന്സ് സംഘമാണ് മനോജ് ലാലിനെ അറസ്റ്റ് ചെയ്തത്. മുന്പും ഇദ്ദേഹത്തിനെതിരേ പല പരാതികളും ഉയര്ന്നിരുന്നു. ഭരതന്നൂര് സ്വദേശിയായ മനോജ് ലാല് സി.പി.ഐ അനുകൂല സര്വിസ് സംഘടനയായ ജോയിന്റ് കൗണ്സിലിന്റെ അഞ്ചല് മേഖലാ സെക്രട്ടറി കൂടിയാണ്.
https://www.facebook.com/Malayalivartha