കേന്ദ്രാനുമതി വൈകിയില്ലെങ്കിൽ ശബരിമലയിൽ 3 വർഷത്തിനകം വിമാനമിറങ്ങുമെന്ന വിവരം പുറത്ത്  വരികയാണ്. പ്രതിരോധ മന്ത്രാലയത്തിന്റെ അനുമതി കിട്ടി. ഇതോടെ ശബരിമല വിമാനത്താവളത്തിനുള്ള പ്രധാന ചുവട് വയ്പ്പാണ് നടന്നിരിക്കുന്നത്. ഇനി കിട്ടാനുള്ളത് മൂന്നു അനുമതികളാണ്. കേന്ദ്രത്തിന്റെ പാരിസ്ഥിതിക, മണ്ണുപരിശോധന, വ്യോമയാന, സാങ്കേതിക അനുമതികൾ. ഇവ ഉടൻ കിട്ടുമെന്ന പ്രതീക്ഷയിലാണ് ആയിരിക്കുന്നത്.

ആ അനുവാദങ്ങൾ കൂടെ കിട്ടിയാൽ മൂന്നുവർഷം കൊണ്ട് വിമാനത്താവളം പൂർത്തിയാക്കാനാകും. ആറ് മാസത്തിനകം തന്നെ സാങ്കേതിക - സാമ്പത്തിക - പരിസ്ഥിതി - സാമൂഹ്യ ആഘാത പഠനങ്ങൾ പൂർത്തിയാക്കുവാനിരിക്കുകയാണ്. 3500 മീറ്റർ റൺവേയ്ക്കടക്കം 2570 ഏക്കർ ഭൂമി ഏറ്റെടുക്കൽ അതിവേഗത്തിൽ നടക്കുകയാണ്. റൺവേയുടെ ദിശ കിഴക്കു-പടിഞ്ഞാറായിരിക്കും സ്ഥിതി ചെയ്യുന്നത്. മദ്ധ്യകേരളത്തിലെ നാല് ജില്ലകളിലെ 25 ലക്ഷത്തിലേറെ വിദേശ മലയാളി കുടുംബങ്ങൾക്കും മൂന്നു കോടിയോളം ശബരിമല തീർത്ഥാടകർക്കും ഇത് പ്രയോജനപ്പെടുമെന്നതാണ് ശ്രദ്ധേയമായ കാര്യം .

88 കിലോമീറ്ററിൽ നെടുമ്പാശേരി, 120 കിലോമീറ്ററിൽ തിരുവനന്തപുരം, 200 കിലോമീറ്ററിൽ മധുര വിമാനത്താവളങ്ങൾ ഉണ്ട്. അതുകൊണ്ട് ആ സിഗ്നലുകൾ കൂടിക്കലർന്നേക്കാനുള്ള സാധ്യത വളരെ കൂടുതലാണ് എന്ന തരത്തിലൊരു ആശങ്ക വ്യോമയാന ഡയറക്ടർ ജനറൽ പ്രകടിപ്പിച്ചിരുന്നു.എന്നാൽ ആ ആശങ്ക അസ്ഥാനത്താണെന്ന് സംസ്ഥാനം മറുപടിയായി പറഞ്ഞിരിക്കുകയാണ്.

എയർ സ്പേസ് അലോക്കേഷൻ ഡിസൈൻ എന്ന നൂതന സാങ്കേതികവിദ്യയിലൂടെ ഈ ആശങ്കയെ അതിജീവിക്കാൻ സാധിക്കും. ചെന്നൈ, ഡൽഹി, മുംബയ്, കണ്ണൂർ, കരിപ്പൂർ വിമാനത്താവളങ്ങളിൽ മാത്രമല്ല വിദേശത്തും വിജയകരമായി ഇത് ഉപയോഗിക്കുന്നുണ്ട് എന്നതാണ് ഏറെ ശ്രദ്ധേയമായ കാര്യം .

എയർപോർട്ട് അതോറിട്ടിയും ഡി.ജി.സി.എയും ആവശ്യപ്പെട്ട വിവരങ്ങൾ സംസ്ഥാനം നൽകിയിട്ടുണ്ട് . ഈ സാഹചര്യത്തിൽ സൈറ്റ് ക്ലിയറൻസ് വേഗത്തിൽ കിട്ടുമായിരിക്കും. ജിയോടെക്‌നിക്കൽ പഠനത്തിൽ സ്ഥലം വിമാനത്താവളത്തിന് അനുയോജ്യമാണെന്ന് കണ്ടെത്തി. അഞ്ച് ലൈസൻസുകളാണ് കേന്ദ്രത്തിൽ നിന്ന് ലഭിക്കേണ്ടത്. കേന്ദ്രാനുമതി കിട്ടിയാൽ ഉടനെ വിമാനത്താവള കമ്പനി രജിസ്റ്റർ ചെയ്യും. റബർ തോട്ടമായതിനാൽ പാരിസ്ഥിതിക അനുമതിക്ക് യാതൊരു തടസമുണ്ടാവില്ല എന്നതും ശ്രദ്ധേയമായ കാര്യമാണ് . മൂലധനം പ്രവാസികളുടേതടക്കം സ്വകാര്യ ഓഹരിയാവാനാണ് സാധ്യത .