പാച്ചല്ലുര്‍ പരശുരാമ ക്ഷേത്ര ജീവനക്കാരി ജയയെ വെട്ടി കൊലപ്പെടുത്താന്‍ ശ്രമിച്ച കേസില്‍ പ്രതിക്ക് 8 വര്‍ഷം കഠിന തടവും 25,000 രൂപ പിഴയും ശിക്ഷ വിധിച്ചു.

പ്രതിയായ മുന്‍ ക്ഷേത്ര ജീവനക്കാരന്‍ പാച്ചല്ലൂര്‍ ചരുവിള വീട്ടില്‍ മുരുകനെ (62 ) യാണ് തിരുവനന്തപുരം അഡീ. ജില്ലാ ജഡ്ജിയും പോക്‌സോ കോടതി ജഡ്ജിയുമായ എം.പി.ഷിബു ശിക്ഷിച്ചത്. 2018 ജനുവരി 31 വെളുപ്പിനു 4 മണിക്കാണ് കേസിനാസ്പദമായ സംഭവം നടന്നത്.

മുമ്പ് പാചകപ്പുര ജീവനക്കാരനായിരുന്ന മുരുകന്‍ വൃത്തിയില്ലെന്ന കാരണത്താല്‍ പുറത്താക്കിയിരുന്നു. തന്നെ പുറത്താക്കാന്‍ കാരണം ജയയാണെന്ന വിരോധത്താല്‍ ക്ഷേത്ര ജോലിക്കെത്തിയ ജയയെ പാച്ചല്ലൂര്‍ പാലത്തില്‍ വെച്ച് വെട്ടുകത്തി കൊണ്ട് തലയില്‍ വെട്ടി മാരകമായി പരിക്കേല്‍പ്പിച്ച് കൊലപ്പെടുത്താന്‍ ശ്രമിച്ചുവെന്നാണ് കേസ്.

സ്ഥലത്തുണ്ടായിരുന്ന തിരുവല്ലം പോലീസ് ജയയെ ഉടന്‍ മെഡിക്കല്‍ കോളേജ് ആശുപത്രിയില്‍ എത്തിച്ചതിനാലാണ് ജീവന്‍ രക്ഷിക്കാനായത്. പ്രോസിക്യൂഷന് വേണ്ടി അജിത് പ്രസാദ് ഹാജരായി.