ഞായര്‍ രാത്രി 12.30ന് നടക്കുന്ന ലോകകപ്പ് ഫൈനല്‍ പ്രമാണിച്ച് മരട് ഗ്രിഗോറിയന്‍ പബ്ലിക് സ്‌കൂളിന് അവധി പ്രഖ്യാപിച്ച് സ്‌കൂള്‍ അധികൃതര്‍. കളി കണ്ട് ഉറക്കം തൂങ്ങി ക്ലാസില്‍ ഇരിക്കാതിരിക്കാനും കുട്ടികള്‍ക്ക് പിറ്റേദിവസത്തെ ക്ലാസിനെക്കുറിച്ച് ആശങ്കപ്പെടാതിരിക്കാനുമാണ് അവധി നല്‍കുന്നതെന്ന് സ്‌കൂള്‍ അധികൃതര്‍ അറിയിച്ചു.

നേരത്തെ ഫിഫ ലോകകപ്പ് ഫുട്ബാളിന്റെ ഫൈനല്‍ പ്രമാണിച്ച് തിങ്കളാഴ്ച സംസ്ഥാനത്തെ എല്ലാ സ്‌കൂളുകള്‍ക്കും കോളേജുകള്‍ക്കും അവധി പ്രഖ്യാപിക്കണമെന്ന് പാലാ നഗരസഭാ ചെയര്‍പേഴ്‌സണ്‍ ദിയ ബിനു പുളിക്കക്കണ്ടം സര്‍ക്കാരിനോട് ആവശ്യപ്പെട്ടിരുന്നു. ഇതുസംബന്ധിച്ച് പൊതു വിദ്യാഭ്യാസ മന്ത്രിക്കും ഉന്നത വിദ്യാഭ്യാസ മന്ത്രിക്കും നിവേദനം നല്‍കിയതായും ചെയര്‍പേഴ്‌സണ്‍ പറഞ്ഞു. സ്‌കൂള്‍ മാനേജ്‌മെന്റുകളും ഇതേ മാതൃകയില്‍ വിദ്യാര്‍ത്ഥികള്‍ക്ക് അവധി അനുവദിക്കണമെന്നും അവര്‍ അഭ്യര്‍ത്ഥിച്ചിരുന്നു.

ഞായറാഴ്ച രാത്രി 12.30നാണ് അര്‍ജന്റീനയും സ്‌പെയ്‌നും തമ്മിലുള്ള ലോകകപ്പ് ഫൈനല്‍ മത്സരം ആരംഭിക്കുക. നിശ്ചിത സമയത്ത് മത്സരം അവസാനിച്ചാല്‍ തന്നെ 2.30 കഴിയും. സമ്മാനദാന ചടങ്ങ് കഴിയുമ്പോള്‍ പുലര്‍ച്ചെ മൂന്നാകും. എന്നാല്‍ എക്‌സ്ട്രാ ടൈമിലേക്കും പെനാല്‍റ്റി ഷൂട്ടൗട്ടിലേക്കും ഫൈനല്‍ നീണ്ടാല്‍ പുലര്‍ച്ചെയാകും മത്സരം അവസാനിക്കാന്‍. ഈ സാഹചര്യം കണക്കിലെടുത്താണ് കുട്ടികള്‍ക്ക് അവധി നല്‍കാനുള്ള സ്‌കൂള്‍ അധികൃതരുടെ തീരുമാനം.

കോഴിക്കോട്ടെ ഭവന്‍സിന്റെ മൂന്നു സ്‌കൂളുകള്‍ക്കും അവധി പ്രഖ്യാപിച്ചിട്ടുണ്ട്. വിദ്യാര്‍ത്ഥികള്‍ക്കും അവരുടെ കുടുംബങ്ങള്‍ക്കും ഒന്നിച്ച് ഫൈനല്‍ മത്സരം ആസ്വദിക്കാനുള്ള അവസരം നല്‍കുന്നതിനായി സ്‌കൂളിന് തിങ്കളാഴ്ച അവധി ദിനമായി പ്രഖ്യാപിക്കാന്‍ തീരുമാനിച്ചതായി ഭവന്‍സ് പ്രിന്‍സിപ്പല്‍ അറിയിച്ചു.