സമരം ചെയ്ത മുഴുവന്‍ നഴ്‌സുമാരെയും തിരിച്ചെടുക്കാന്‍ തയ്യാറെന്ന് തൃശൂര്‍ അമല ആശുപത്രി. എന്നാല്‍ അവര്‍ മുന്‍പ് ജോലി ചെയ്ത അതെ ഡിപ്പാര്‍ട്ട്‌മെന്റുകളിലേക്ക് തിരിച്ചെടുക്കാന്‍ കഴിയില്ലെന്നും വിശദീകരണം. ആശുപത്രിയുടെ അകത്തേക്ക് വരെ സമരം നീളുന്ന സാഹചര്യം ഉണ്ടായതിനാലാണ് പൊലീസ് സംരക്ഷണം ആവശ്യപ്പെട്ട് ഹൈക്കോടതിയെ സമീപിച്ചതെന്ന് ആശുപത്രി അസോസിയേറ്റ് ഡയറക്ടര്‍ ആന്റണി മണ്ണുംമേല്‍ പറഞ്ഞു. സമരം നടന്നിരുന്ന സമയത്ത് പലയിടങ്ങളിലേക്കും പുതിയ നിയമനങ്ങള്‍ നടന്നു.

പുതിയ വാര്‍ഡുകള്‍ അടക്കം തുറന്നാണ് സമരം ചെയ്ത നഴ്‌സുമാരെ പുനര്‍ നിയമിക്കുന്നത്. 253 പേര്‍ക്ക് ഇപ്പോള്‍ തന്നെ തിരിച്ചു കയറാന്‍ അവസരം ഉണ്ട്. എന്നാല്‍ തങ്ങളെ പഴയ തസ്തികകളില്‍ തന്നെ നിയമിക്കണമെന്ന് ആവശ്യമാണ് യുഎന്‍എ നേതൃത്വം ഉന്നയിക്കുന്നതെന്ന് ആശുപത്രി അസോസിയേറ്റ് ഡയറക്ടര്‍ ആന്റണി മണ്ണുംമേല്‍ പറഞ്ഞു.

അടിസ്ഥാന ശമ്പളം 4000 മുതല്‍ 6000 രൂപ വരെ വര്‍ദ്ധിപ്പിച്ചു എന്ന ലേബര്‍ ഓഫീസറുടെ കത്ത് ലഭിച്ചിട്ടും അമല ആശുപത്രി മാനേജ്‌മെന്റ് സമായത്തില്‍ നിന്ന് പിന്മാറുകയായിരുന്നു. ഇതോടെ സമരം അമല ആശുപത്രിയുടെ മുന്‍പിലേക്ക് യുണൈറ്റഡ് നേഴ്‌സസ് അസോസിയേഷന്‍ മാറ്റുകയുണ്ടായി. സമരത്തില്‍ പങ്കെടുത്തവരെ തിരികെ പ്രവേശിപ്പിക്കുന്നതിലും ആശയകുഴപ്പം നിലനിന്നിരുന്നു.