പണം കടം കൊടുത്തയാള്‍ റോഡില്‍ തടഞ്ഞുനിര്‍ത്തി മര്‍ദ്ദിച്ചതില്‍ മനംനൊന്ത ആള്‍ വീട്ടിനുള്ളില്‍ ആത്മഹത്യ ചെയ്തു. ഓള്‍ സെയിന്റ്സിന് സമീപത്തായി ബാലനഗറില്‍ ഈന്തിവിളാകം ടി.സി. 32/766 പുതുവല്‍ പുത്തന്‍വീട്ടില്‍ ശിശുപാലന്റെയും സുജാതയുടെയും മകന്‍ സുജിത്കുമാര്‍ (43) ആണ് മരിച്ചത്.

മര്‍ദ്ദനമേറ്റെന്ന പരാതിയില്‍ ദിവസങ്ങള്‍ കഴിഞ്ഞിട്ടും കേസെടുത്തില്ലെന്ന് ആരോപിച്ച് മൃതദേഹവുമായി ബന്ധുക്കള്‍ റോഡ് ഉപരോധിക്കുകയുണ്ടായി. കഴിഞ്ഞ 22-ന് വൈകുന്നേരം ബാലനഗറില്‍ മീന്‍ വില്‍ക്കുന്നതിനിടെയാണ് സുജിത് കുമാറിന് മര്‍ദനമേറ്റത്.

പണം നല്‍കിയ ഓള്‍ സെയിന്റ്സ് സ്വദേശി രാജേന്ദ്രന്‍ കല്ലുകൊണ്ട് തലക്കിടിച്ച് പരിക്കേല്‍പ്പിച്ചുവെന്ന് സഹോദരന്‍ . തടയാനെത്തിയ സുജിത്തിന്റെ മകന്‍ കാര്‍ത്തികേയനും പരിക്കേറ്റു. രാത്രിയോടെ ഇവരും ജനറല്‍ ആശുപത്രിയില്‍ ചികിത്സ തേടി. 23-ന് രാവിലെ വലിയതുറ സ്റ്റേഷനില്‍ പരാതി നല്‍കി.


വ്യാഴാഴ്ച രാത്രി 7.30-ഓടെയാണ് കിടപ്പുമുറിക്കുള്ളില്‍ സുജിത്കുമാര്‍ തൂങ്ങിയ നിലയില്‍ കാണപ്പെടുന്നത്. ഭാര്യ പ്രമീളയും മകന്‍ കാര്‍ത്തികേയനും ജോലിക്ക് പോയ സമയത്തായിരുന്നു സംഭവമുണ്ടായത്. നഴ്സിങ് വിദ്യാര്‍ഥിനിയായ മകള്‍ രേഷ്മ ശ്രീകാര്യത്തുള്ള ബന്ധുവീട്ടിലുമായിരുന്നു. വെള്ളിയാഴ്ച പോസ്റ്റുമാര്‍ട്ടത്തിനുശേഷം, മൃതദേഹവുമായി സുജിത്കുമാറിന്റെ ബന്ധുക്കള്‍ ഓള്‍സെയിന്റ്സ് കോളേജ് ജങ്ഷനില്‍ ഉച്ചയ്ക്ക് 2.30-ഓടെ റോഡ് ഉപരോധം തുടങ്ങി

. പോലീസ് കേസെടുത്തില്ലെന്ന് ആരോപിച്ചാണ് റോഡ് ഉപരോധിച്ചത്. ഇതോടെ ശംഖുംമുഖം-ചാക്ക റോഡിലേക്കുള്ള ഗതാഗതം മുടങ്ങി. സ്ഥലത്തെത്തിയ ശംഖുംമുഖം അസി.കമ്മിഷണര്‍ ഡി.കെ.പൃഥ്വിരാജ് ഉള്‍പ്പെടെയുള്ള പോലീസ് സംഘം മൃതദേഹം റോഡില്‍ നിന്ന് മാറ്റാന്‍ ആവശ്യപ്പെട്ടെങ്കിലും ബന്ധുക്കള്‍ വഴങ്ങിയില്ല. ഇതേതുടര്‍ന്ന് റോഡ് ഉപരോധം നീളുകയും ചെയ്തു.

ഗതാഗതം താറുമാറായതോടെ സ്പെഷ്യല്‍ ബ്രാഞ്ച് അസി.കമ്മിഷണര്‍ സതീഷ്‌കുമാര്‍, എക്സിക്യൂട്ടീവ് മജിസ്ട്രേറ്റ് മോഹന്‍ എന്നിവരെത്തി ബന്ധുക്കളുമായി ചര്‍ച്ച നടത്തി. തുടര്‍ന്ന് എസ്.ഐ.ക്കെതിരേ നടപടിയെടുക്കാമെന്ന ഉറപ്പിന്‍മേല്‍ ഉപരോധം പിന്‍വലിച്ച് മൃതദേഹം വീട്ടിലേക്ക് കൊണ്ടുപോയി. മുട്ടത്തറയിലെ മോക്ഷകവാടത്തില്‍ സംസ്‌കാരം നടത്തി. സംഭവത്തില്‍ കേസെടുത്തതായി വലിയതുറ പോലീസ് .