അരിക്കൊമ്പന്‍ വാര്‍ത്തകള്‍ പലരുടേയും മനസില്‍ പതിഞ്ഞു. അവസാനം കാടുകടത്തിയ കാട്ടാന അരിക്കൊമ്പന് നാട്ടില്‍ ഫാന്‍സ് അസോസിയേഷനുമായി. അണക്കര ബി സ്റ്റാന്‍ഡിലെ ഒരുപറ്റം ഓട്ടോ ഡ്രൈവര്‍മാരാണ് അരിക്കൊമ്പനായി ഫാന്‍സ് അസോസിയേഷന്‍ രൂപീകരിച്ചത്. ചിന്നക്കനാലില്‍ അരിക്കൊമ്പന്റെ ആവാസമേഖലയില്‍ മനുഷ്യന്‍ കടന്നുകയറിയതാണ് ആനയെ 'നാടുകടത്താന്‍' കാരണമായതെന്നാണ് ഇവരുടെ അഭിപ്രായം

.

ആനയെ കൊണ്ടുപോയതില്‍ തങ്ങള്‍ക്കുള്ള പ്രതിഷേധം വ്യക്തമാക്കാനാണു ഫാന്‍സ് അസോസിയേഷന്‍ രൂപീകരിച്ചതെന്നാണ് ഇവര്‍ പറയുന്നത്. മലയോരത്തെ വാഹനങ്ങളിലും അരിക്കൊമ്പന്റെ പേര് പ്രത്യക്ഷപ്പെട്ടു തുടങ്ങിയിട്ടുണ്ട്. കാട് മൃഗങ്ങള്‍ക്കുള്ളതാണെന്ന് ഓര്‍മപ്പെടുത്താന്‍കൂടിയാണ്, അണക്കര ബി സ്റ്റാന്‍ഡിലെ ഏതാനും ഓട്ടോറിക്ഷ തൊഴിലാളികള്‍ ഇത് സ്ഥാപിച്ചത്.

ചിന്നക്കനാലില്‍ അരിക്കൊമ്പന്റെ ആവാസമേഖലയില്‍ മനുഷ്യന്‍ കടന്നുകയറുകയും അന്യായമായി അതിനെ പിടികൂടി നാടുകടത്തുകയും ചെയ്തതിലുള്ള പ്രതിഷേധംകൂടിയാണിതെന്ന് ഡ്രൈവര്‍മാര്‍ പറഞ്ഞു. കാടുമാറ്റത്തിന്റെ പേരില്‍ അരിക്കൊമ്പന് കടുത്ത ഉപദ്രവം ഏല്‍ക്കേണ്ടിവന്നതില്‍ ഇവര്‍ക്ക് വിഷമവുമുണ്ട്. അരിക്കൊമ്പന്‍ തിരികെ ചിന്നക്കനാലിലെത്തുമെന്നും, അത് ജനവാസമേഖലയില്‍ കയറാതിരിക്കാനുള്ള മാര്‍ഗങ്ങള്‍ സ്വീകരിക്കുകയാണ് വേണ്ടതെന്നും ഇവര്‍ പറയുന്നു.

അതേസമയം തമിഴ്നാട്ടിലും റേഷന്‍ കട തേടിയെത്തി അരിക്കൊമ്പന്‍. കഴിഞ്ഞ കുറച്ചു ദിവസങ്ങളായി മേഘമലയില്‍ തുടരുന്ന അരിക്കൊമ്പന്‍ മണലാര്‍ എസ്റ്റേറ്റിനടുത്ത റേഷന്‍ കടയുടെ വാതില്‍ തള്ളിത്തുറക്കാന്‍ ശ്രമിച്ചു. അതേസമയം നാശനഷ്ടങ്ങളില്ല. കട തകര്‍ക്കാന്‍ ശ്രമിച്ചത് അരിക്കൊമ്പന്‍ തന്നെയാണെന്ന് തമിഴ്നാട് വനംവകുപ്പ് സ്ഥിരീകരിച്ചു.

ഞായറാഴ്ച വൈകീട്ട് ആറുമണിയോടു കൂടിയാണ് മണലാര്‍ എസ്റ്റേറ്റിലെ റേഷന്‍ കടയില്‍ അരിക്കൊമ്പന്‍ അരി തേടിയെത്തിയത്. തുടര്‍ന്ന് റേഷന്‍ കടയുടെ വാതില്‍ തുള്ളിത്തുറക്കാന്‍ ശ്രമിച്ചു. എന്നാല്‍ അരി എടുക്കുകയോ മറ്റു നാശനഷ്ടങ്ങള്‍ വരുത്തുകയോ ചെയ്തില്ലെന്നും അല്പനേരത്തിനു ശേഷം ആന മടങ്ങിപ്പോയെന്നും അധികൃതര്‍ അറിയിച്ചു. ഇതിന്റെ ദൃശ്യങ്ങള്‍ തമിഴ്നാട് വനംവകുപ്പിന്റെ കൈവശമുണ്ട്.

കഴിഞ്ഞ കുറച്ചു ദിവസങ്ങളായി തമിഴ്നാട് ചെക്ക്പോസ്റ്റിനും മേഘമലയ്ക്കും ഇടയിലുള്ള കടനാട് ആനന്ദ എസ്റ്റേറ്റ് മേഖലയിലാണ് അരിക്കൊമ്പന്‍ നിലയുറപ്പിച്ചിരിക്കുന്നത്. എന്നാല്‍ അവിടെനിന്ന് മാറി പെരിയാര്‍ കടുവാ സങ്കേതത്തിനു സമീപമുള്ള മണലാര്‍ എസ്റ്റേറ്റിലേക്ക് അരിക്കൊമ്പന്‍ എത്തിയിട്ടുണ്ട്. ഇവിടെനിന്ന് പെരിയാര്‍ സങ്കേതത്തിലേക്ക് അരിക്കൊമ്പന്‍ മടങ്ങിയാല്‍ അത് കേരളത്തിനും തമിഴ്നാടിനും ആശ്വാസമാകും.

അതേസമയം അരിക്കൊമ്പന് പിന്നാലെ പടയപ്പയും രംഗത്തെത്തി. പടയപ്പ എന്ന കാട്ടാനയെ തുരത്താന്‍ നടപടികളുമായി വനംവകുപ്പ്. പടയപ്പയെ ഉള്‍ക്കാട്ടിലേയ്ക്ക് തുരത്തുന്നതുവരെ പച്ചക്കറി മാല്യന്യങ്ങള്‍ പ്ലാന്റിന് മുന്നിലിടരുതെന്നാവശ്യപ്പെട്ട് വനംവകുപ്പ് ഗ്രാമപഞ്ചായത്തിന് നോട്ടീസ് നല്‍കിയിട്ടുണ്ട്. പ്ലാന്റിന് ചുറ്റും കമ്പിവേലി കെട്ടാനുള്ള നടപടികള്‍ പഞ്ചായത്ത് തുടങ്ങിക്കഴിഞ്ഞു.

പച്ചക്കറികള്‍, പഴം എന്നിവയുടെ മാലിന്യങ്ങള്‍ കഴിക്കാനാണ് ആന നല്ലതണ്ണിയിലെ പ്ലന്റിന് സമീപം വരുന്നത്. അതുകൊണ്ടു തന്നെ അവയൊന്നും അവിടെ നിക്ഷേപിക്കാതിരിക്കാന്‍ വനംവകുപ്പ് നിര്‍ദേശം നല്‍കിയിട്ടുണ്ട്. പുറത്ത് കെട്ടിക്കിടക്കുന്ന മാലിന്യങ്ങളെല്ലാം പഞ്ചായത്ത് ഇതിനോടകം മാറ്റി. തീറ്റ കിട്ടാതാകുന്നതോടെ പടയപ്പ തിരികെ കാട്ടിലേയ്ക്ക് പോകുമെന്നാണ് വനപാലകരുടെ പ്രതീക്ഷ. പ്ലാന്റിനുള്ളില്‍ പടയപ്പ കയറാതെ ഇരിക്കാനുള്ള നടപടികള്‍ മൂന്നാര്‍ ഗ്രാമപഞ്ചായത്തും തുടങ്ങി. ദിവസങ്ങള്‍ക്കുള്ളില്‍ പടയപ്പയെ തുരത്തണമെന്നാണ് സിപിഐ അടക്കമുള്ള രാഷ്ട്രീയ പാര്‍ട്ടികള്‍ വനം വകുപ്പിനോട് ആവശ്യപ്പെട്ടിരിക്കുന്നത്. നടപടി ഉണ്ടായില്ലെങ്കില്‍ വനപാലകരെ തടയുമെന്നാണ് ഇവരുടെ മുന്നറിയിപ്പ്.