നിയമസഭാ കൈയ്യാങ്കളി കേസില്‍ തുടരന്വേഷണം ആവശ്യപ്പെട്ട് സിപിഐ നേതാക്കള്‍. സംഭവസമയത്ത് എംഎല്‍എമാരായിരുന്ന ബിജി മോളും ഗീതാ ഗോപിയുമാണ് തിരുവനന്തപുരം സിജെഎം കോടതിയില്‍ ഹര്‍ജി സമര്‍പ്പിച്ചത്. കേസിലെ വിചാരണ നീട്ടിവെയ്ക്കാനാണ് മുന്‍ എംഎല്‍എമാരായ വനിതാ നേതാക്കള്‍ കോടതിയെ സമീപിച്ചതെന്നാണ് ആക്ഷേപം.

നിയമസഭാ കൈയ്യാങ്കളിയ്ക്കിടയില്‍ ഭരണപക്ഷ എംഎല്‍എമാരുടെ ആക്രമണത്തില്‍ പരിക്കേറ്റിരുന്നതായാണ് ഇരു നേതാക്കളും വെവ്വേറെയായി സമര്‍പ്പിച്ച ഹര്‍ജിയില്‍ ആരോപിക്കുന്നത്. സംഭവത്തില്‍ മ്യൂസിയം പൊലീസിന് പരാതി നല്‍കിയിരുന്നെങ്കിലും നടപടികളുണ്ടായില്ല.

കേസില്‍ കുറ്റപത്രം സമര്‍പ്പിച്ചത് അറിഞ്ഞ പ്രകാരം പരിശോധിച്ചപ്പോഴാണ് അപാകതകള്‍ ശ്രദ്ധയില്‍പ്പെട്ടത്. കൈയ്യാങ്കളിയ്ക്കിടയില്‍ വലതുപക്ഷ എംഎല്‍എമാരില്‍ നിന്ന് പരിക്കേറ്റതിന്റെ ചികിത്സാ രേഖകളടക്കം കുറ്റപത്രത്തിലുണ്ട്. എന്നാല്‍ തങ്ങളെ സാക്ഷി ചേര്‍ക്കുകയോ മൊഴി രേഖപ്പെടുത്തുകയോ ചെയ്തിട്ടില്ല.

അതിനാലാണ് കേസില്‍ തുടരന്വേഷണത്തിനായി ആവശ്യമുന്നയിക്കുന്നതെന്നാണ് നേതാക്കള്‍ ഹര്‍ജിയില്‍ അറിയിക്കുന്നത്. ഹര്‍ജി ഈ മാസം 29നാണ് കോടതി പരിഗണിക്കുക.2015 മാര്‍ച്ച് 13ന് ബാര്‍ കോഴക്കേസില്‍ പ്രതിയായ കെ എം മാണിയുടെ ബഡ്ജറ്റ് അവതരണം പ്രതിപക്ഷം തടസപ്പെടുത്തുന്നതിനിടെയാണ് സംഘര്‍ഷമുണ്ടായത്. സംഘര്‍ഷത്തിനിടെ 2.20 ലക്ഷം രൂപയുടെ പൊതുമുതല്‍ നശിപ്പിച്ചുവെന്നാണ് ക്രൈം ബ്രാഞ്ചിന്റെ കുറ്റപത്രത്തില്‍ പറയുന്നത്.