കര്‍ണാടകയിലെ സിദ്ധരാമയ്യയുടെ സത്യപ്രതിജ്ഞയ്ക്ക് പിണറായി വിജയനെ വിളിക്കാത്തത് വലിയ ചര്‍ച്ചയായിരുന്നു. ഇനി വിളിച്ച് പിണറായി പോയിരുന്നെങ്കില്‍ മറ്റൊരു വിവാദമായേനെ. വിളിച്ച കോണ്‍ഗ്രസുകാര്‍ തന്നെ നാണം കെടുത്തിയേനെ. അതാണിപ്പോള്‍ ഉണ്ടായത്.

കര്‍ണാടകയില്‍ സിദ്ധരാമയ്യ സര്‍ക്കാര്‍ സത്യപ്രതിജ്ഞ ചെയ്ത് അധികാരത്തിലേറിയത്തിന് പിന്നാലെ സിപിഐ എം ജനറല്‍ സെക്രട്ടറി സീതാറാം യെച്ചൂരിയെ പരിഹസിച്ച് കോണ്‍ഗ്രസ് നേതാവ് വി ടി ബല്‍റാം. പ്രതിപക്ഷ ഐക്യത്തിലൂടെ കേന്ദ്രത്തിനെതിരെ മുന്നേറാനുള്ള ശ്രമങ്ങള്‍ തുടരുന്നതിനിടെയാണ് ഇതിനെ അപഹസിക്കുന്ന വണ്ണം ബല്‍റാം പോസ്റ്റിട്ടത്. പോസ്റ്റ് വിവാദമായതിനെ തുടര്‍ന്ന് പിന്‍വലിക്കുകയും ചെയ്തു.

സിദ്ധരാമയ്യയുമായും ഡി കെ ശിവകുമാറുമായും കൈകോര്‍ത്തു നില്‍ക്കുന്ന സീതാറാം യെച്ചൂരിയുടെ ചിത്രം പങ്കുവെച്ചായിരുന്നു വിടി ബല്‍റാമിന്റെ ആക്ഷേപം. തുടര്‍ന്ന് പോസ്റ്റ് പിന്‍വലിക്കുകയായിരുന്നു.

'ക്ഷണിക്കുക എന്നത് കോണ്‍ഗ്രസിന്റെ മര്യാദ, ബാക്കിയൊക്കെ ഓരോരുത്തരുടെ തൊലിക്കട്ടി' എന്നായിരുന്നു ചിത്രത്തിന് വിടി ബല്‍റാം നല്‍കിയ ക്യാപ്ഷന്‍. വിമര്‍ശനം കടുത്തതോടെ വി ടി പോസ്റ്റ് നീക്കം ചെയ്തു. ട്രോള്‍ രൂപത്തില്‍ ഉദ്ദേശിച്ച പോസ്റ്റ് അധിക്ഷേപമായി വ്യാഖ്യാനിക്കപ്പെട്ട സാഹചര്യത്തിലാണ് പോസ്റ്റ് പിന്‍വലിച്ചതെന്നായിരുന്നു വി.ടി ബല്‍റാമിന്റെ വിശദീകരണം. ഈ പോസ്റ്റിന് താഴെയും വ്യാപക വിമര്‍ശനം ഉയര്‍ന്നിട്ടുണ്ട്.

കര്‍ണാടകയിലെ സത്യപ്രതിജ്ഞയുമായി ബന്ധപ്പെട്ട് നേരത്തേയിട്ടിരുന്ന ഒരു പോസ്റ്റ് പിന്‍വലിക്കുകയാണ്. ട്രോള്‍ രൂപത്തില്‍ ഉദ്ദേശിച്ച പോസ്റ്റ് ഒരധിക്ഷേപമായി വ്യാഖ്യാനിക്കപ്പെട്ട സാഹചര്യത്തിലാണിത്. ദേശീയ രാഷ്ട്രീയത്തില്‍ മതേതര ചേരിക്ക് നേതൃത്വം നല്‍കുന്നതില്‍ കോണ്‍ഗ്രസിന്റെ അനിഷേധ്യമായ പങ്ക് തിരിച്ചറിയാന്‍ ഇക്കഴിഞ്ഞ കര്‍ണാടക തിരഞ്ഞെടുപ്പില്‍പ്പോലും കോണ്‍ഗ്രസ് വിരുദ്ധ നിലപാട് സ്വീകരിച്ച സിപിഎമ്മിന്റെ നേതൃത്വത്തിന് തുടര്‍ന്നും കഴിയുമെന്ന് പ്രതീക്ഷിക്കുന്നു. കോണ്‍ഗ്രസിനെ നിരന്തരം അധിക്ഷേപിക്കുകയും പരിഹസിക്കുകയും ചെയ്യുന്ന കേരളത്തിലെ സിപിഎം നേതൃത്വത്തെയും ഇക്കാര്യം ബോധ്യപ്പെടുത്താന്‍ അവരുടെ കേന്ദ്ര നേതൃത്വത്തിന് സാധിക്കട്ടെ.

അതേസമയം കോണ്‍ഗ്രസ് നേതാവ് വി ടി ബല്‍റാമിനെതിരെ രൂക്ഷ വിമര്‍ശനവുമായി ഇടത് എംഎല്‍എ കെ ടി ജലീല്‍. ഇനിമേലില്‍ കോണ്‍ഗ്രസ് നേതാക്കള്‍ എന്തെങ്കിലും ചടങ്ങിന് ക്ഷണിക്കുന്നത് മര്യാദയുടെ ഭാഗമാണെന്ന് ക്ഷണിതാക്കള്‍ കരുതണമെന്നും എങ്ങാനും സൗഹൃദത്തിന്റെ പേരില്‍ ചടങ്ങില്‍ പങ്കെടുത്താല്‍ തൊലിക്കട്ടി അളന്ന് തിട്ടപ്പെടുത്താന്‍ കെ.പി.സി.സി ഭാരവാഹിയുടെ നേതൃത്വത്തില്‍ അവിടെ ഒരുസംഘമുണ്ടാകുമെന്നും ജലീല്‍ വിമര്‍ശിച്ചു.

ഈ നേതാവിന്റെ മാതാവ് മരണപ്പെട്ട വാര്‍ത്തയറിഞ്ഞ് ആരും ക്ഷണിക്കാതെ ഞാനും അദ്ദേഹത്തിന്റെ വീട്ടില്‍ പോയിരുന്നു. വരുന്നവര്‍ക്ക് ദാഹജലം അവിടെ കരുതിയിരുന്നു. ഭാഗ്യത്തിന് ഒരു തുള്ളി കുടിച്ചില്ല. കുടിച്ചിരുന്നെങ്കില്‍ എന്റെ തൊലിക്കട്ടിയും ടിയാന്‍ അളന്നേനെയെന്നും ജലീല്‍ പരിഹസിച്ചു.

കെ ടി ജലീലിന്റെ ഫേസ്ബുക്ക് പോസ്റ്റ് പൂര്‍ണരൂപത്തില്‍

കോണ്‍ഗ്രസ് മഹത്തായ പാരമ്പര്യമുള്ള പാര്‍ട്ടിയാണ്. ആ പാര്‍ട്ടിയുടെ പുത്തന്‍കൂറ്റുകാരായ സംസ്ഥാന നേതാക്കള്‍ സംഘടനയുടെ വാര്‍ഡ് പ്രസിഡണ്ടാകാന്‍ പോലും യോഗ്യതയില്ലാത്തവരാണെന്ന് പറയേണ്ടി വന്നതില്‍ ദു:ഖമുണ്ട്.

ഇനിമേലില്‍ കോണ്‍ഗ്രസ് നേതാക്കള്‍ എന്തെങ്കിലും ചടങ്ങിന് ക്ഷണിക്കുന്നത് മര്യാദയുടെ ഭാഗമാണെന്ന് ക്ഷണിതാക്കള്‍ കരുതണം. എങ്ങാനും സൗഹൃദത്തിന്റെ പേരില്‍ ചടങ്ങില്‍ പങ്കെടുത്താല്‍ തൊലിക്കട്ടി അളന്ന് തിട്ടപ്പെടുത്താന്‍ കെ.പി.സി.സി ഭാരവാഹിയുടെ നേതൃത്വത്തില്‍ അവിടെ ഒരുസംഘമുണ്ടാകും.

ഈ നേതാവിന്റെ മാതാവ് മരണപ്പെട്ട വാര്‍ത്തയറിഞ്ഞ് ആരും ക്ഷണിക്കാതെ ഞാനും അദ്ദേഹത്തിന്റെ വീട്ടില്‍ പോയിരുന്നു. വരുന്നവര്‍ക്ക് ദാഹജലം അവിടെ കരുതിയിരുന്നു. ഭാഗ്യത്തിന് ഒരു തുള്ളി കുടിച്ചില്ല. കുടിച്ചിരുന്നെങ്കില്‍ എന്റെ 'തൊലിക്കട്ടി'യും ടിയാന്‍ അളന്നേനെ.
മേലില്‍ കോണ്‍ഗ്രസ്സുകാര്‍ എന്തെങ്കിലും പരിപാടിക്ക് ക്ഷണിച്ചാല്‍ നൂറുവട്ടം ആലോചിച്ചേ പോകാവൂ. വെറുതെ തൊലിക്കട്ടി അളക്കാന്‍ അവസരമുണ്ടാക്കി കൊടുക്കേണ്ടല്ലോ?