രണ്ട് ദിവസത്തെ സന്ദര്ശനത്തിനായി ഉപരാഷ്ട്രപതി ജഗ്ദീപ് ധന്കര് കേരളത്തില്.... ഇന്ന് രാവിലെ ഒമ്പതിന് ക്ലിഫ് ഹൗസില് മുഖ്യമന്ത്രി പിണറായി വിജയന് ഒരുക്കുന്ന വിരുന്നില് ഉപരാഷ്ട്രപതി പങ്കെടുക്കും, നിയമസഭ ആര്. ശങ്കരനാരായണന് തമ്പി മെമ്പേഴ്സ് ലോഞ്ചില് നിയമസഭാ മന്ദിരത്തിന്റെ രജതജൂബിലി ഉദ്ഘാടനം10.30ന്
രണ്ട് ദിവസത്തെ സന്ദര്ശനത്തിനായി ഉപരാഷ്ട്രപതി ജഗ്ദീപ് ധന്കര് കേരളത്തിലെത്തി. തിരുവനന്തപുരം വിമാനത്താവളത്തില് മന്ത്രിമാരും ഗവര്ണറും ചേര്ന്ന് ഉപരാഷ്ട്രപതിയെ സ്വീകരിച്ചു. ശേഷം അദ്ദേഹം പദ്മനാഭസ്വാമി ക്ഷേത്രത്തില് സന്ദര്ശനം നടത്തി. വൈകിട്ടോടെ രാജ്ഭവനിലേക്ക് പോയി.
വൈകുന്നേരം ഗവര്ണര് അത്താഴ വിരുന്ന് നല്കി. നാളെ നിയമസഭാ മന്ദിരത്തിന്റെ രജത ജൂബിലി ആഘോഷത്തിലും അദ്ദേഹം പങ്കെടുക്കും.
ഇന്ന് രാവിലെ ഒമ്പതിന് ക്ലിഫ് ഹൗസില് മുഖ്യമന്ത്രി പിണറായി വിജയന് ഒരുക്കുന്ന വിരുന്നില് ഉപരാഷ്ട്രപതി പങ്കെടുക്കും. 10.30നാണ് നിയമസഭ ആര്. ശങ്കരനാരായണന് തമ്പി മെമ്പേഴ്സ് ലോഞ്ചില് നിയമസഭാ മന്ദിരത്തിന്റെ രജതജൂബിലി ഉദ്ഘാടനം.
തുടര്ന്ന് കണ്ണൂരിലേക്കു പോകുന്ന ഉപരാഷ്ട്രപതി കണ്ണൂര് ഏഴിമലയിലെ ഇന്ത്യന് നേവല് അക്കാദമിയും (ഐഎന്എ) സന്ദര്ശിക്കും, അവിടെ അദ്ദേഹം കേഡറ്റുകളുമായി സംവദിക്കും. അതിന് ശേഷം തന്റെ അധ്യാപികയായിരുന്ന കണ്ണൂര് പാനൂരിലെ രത്നാ നായരെ സന്ദര്ശിക്കുകയും ചെയ്യും.
പതിറ്റാണ്ടുകള്ക്ക് ശേഷം പ്രിയപ്പെട്ട ശിഷ്യന് തന്നെ കാണാനെത്തുന്നതിന്റെ സന്തോഷത്തിലാണ് കണ്ണൂര് പാനൂരില് ഒരു അധ്യാപിക.
സൈനിക് സ്കൂളിലെ അധ്യാപനവൃത്തിക്ക് ശേഷം പാനൂരിലെ സഹോദരന്റെ വീട്ടില് വിശ്രമ ജീവിതം നയിക്കുന്ന രത്ന നായരാണ് പ്രിയപ്പെട്ട ശിഷ്യന്റെ വരവിനായി കാത്തിരിക്കുന്നത്.
പാനൂര് കാര്ഗില് ബസ് സ്റ്റോപ്പിന് സമീപമുള്ള വീട്ടില് രത്നടീച്ചര് ശിഷ്യനെ സ്വീകരിക്കാനുള്ള ഒരുക്കത്തിലാണ്. ടീച്ചര് മാത്രമല്ല ഈ വീട്ടിലെത്തുന്ന പഴയ വിദ്യാര്ത്ഥിയെ കാണാന് നാടും കാത്തിരിക്കുകയാണ്. ടീച്ചറെ കാണാനായി പഴയ വിദ്യാര്ത്ഥിയെത്തുമ്പോള് സുരക്ഷയൊരുക്കാനുള്ള തയ്യാറെടുപ്പുകള് പൊലീസും തുടങ്ങി. എല്ലാവരും കാത്തിരിക്കുന്ന ടീച്ചറുടെ പ്രിയപ്പെട്ട ശിഷ്യന് ഉപരാഷ്ട്രപതി ജഗദീപ് ധന്കറാണ് .
"
https://www.facebook.com/Malayalivartha
