കുഞ്ഞിനു പിന്നാലെ അമ്മയും യാത്രയായി... അമിതവേഗത്തിലെത്തിയ കെഎസ്ആര്‍ടിസി ബസ് ഓട്ടോയിലിടിച്ചുണ്ടായ അപകടത്തില്‍ വീണ്ടും ഒരു മരണം കൂടി... യുവതി പ്രസവശേഷം വീട്ടിലേക്ക് മടങ്ങവേയാണ് കെഎസ്ആര്‍ടിസി ബസ് ഓട്ടോയിലിടിച്ചത്, അപകടത്തില്‍ മരണം നാലായി

കല്ലമ്പലം നാലുമുക്ക് കാരൂര്‍കോണത്ത് പണയില്‍ വീട്ടില്‍ മഹേഷിന്റെ ഭാര്യ അനു (23) ആണ് മരിച്ചത്. ദിവസങ്ങളായി ഇവര്‍ മെഡിക്കല്‍ കോളേജ് ആശുപത്രിയില്‍ അതീവ ഗുരുതരാവസ്ഥയില്‍ കഴിയുകയായിരുന്നു.

അനുവിന്റെ നാല് ദിവസം പ്രായമുള്ള പെണ്‍കുഞ്ഞ്, അമ്മ ശോഭന (41), ഓട്ടോഡ്രൈവര്‍ സുനില്‍ (40) എന്നിവര്‍ അപകടം നടന്ന അന്ന് തന്നെ മരിച്ചിരുന്നു. ഇക്കഴിഞ്ഞ വ്യാഴാഴ്ച രാത്രി 8.45ന് ദേശീയപാതയില്‍ പള്ളിപ്പുറം താമരക്കുളം മുഴുത്തിരിയാവട്ടത്തെ വളവില്‍ വച്ചായിരുന്നു അപകടം സംഭവിച്ചത്.

നിയന്ത്രണ രേഖയും കടന്ന് അമിത വേഗത്തിലെത്തിയ ബസ് എതിര്‍ ദിശയില്‍ വന്ന ഓട്ടോറിക്ഷയില്‍ ഇടിച്ചു. ആറ് പേരാണ് ഓട്ടോറിക്ഷയില്‍ ഉണ്ടായിരുന്നത്. അനുവിന്റെ ഭര്‍ത്താവ് മഹേഷും മകന്‍ മിഥുനും ആശുപത്രിയില്‍ കഴിയുന്നു. ഇവരുടെ പരിക്ക് ഗുരുതരമല്ലാത്തതിനാല്‍ വാര്‍ഡിലേയ്ക്ക് മാറ്റിയിട്ടുണ്ട്.

അനുവിന്റെ പ്രസവശേഷം എസ് എ ടി ആശുപത്രിയില്‍ നിന്ന് വീട്ടിലേയ്ക്ക് മടങ്ങുവഴിയാണ് അപകടമുണ്ടായത്. സംഭവവുമായി ബന്ധപ്പെട്ട് കെഎസ്ആര്‍ടിസി ആറ്റിങ്ങല്‍ ഡിപ്പോയിലെ ഡ്രൈവര്‍ കൊല്ലം മയ്യനാട് കുട്ടിക്കട താഴത്തുചേരി ജിത്തു ഭവനില്‍ വി അജിത്ത് കുമാര്‍(50) അറസ്റ്റിലായിട്ടുണ്ട്. മനഃപൂര്‍വമല്ലാത്ത നരഹത്യയ്ക്ക് മംഗലപുരം പൊലീസ് ഇയാള്‍ക്കെതിരെ കേസെടുത്തിട്ടുണ്ട്. ഇയാളെ കോടതി റിമാന്‍ഡിലാക്കി.മാത്രവുമല്ല അജിത്തിന്റെ ഡ്രൈവിംഗ് ലൈസന്‍സ് താല്‍ക്കാലികമായി റദ്ദാക്കിയതായി മോട്ടോര്‍ വാഹന വകുപ്പ്.