മാധ്യമ പ്രവര്ത്തക അഖില നന്ദകുമാറിനെതിരെ കേസെടുത്തതില് രൂക്ഷവിമര്ശനവുമായി ഹൈബി ഈഡന് എംപി
എസ്എഫ്ഐ സംസ്ഥാന സെക്രട്ടറി പിഎം ആര്ഷയുടെ മാര്ക്ക് ലിസ്റ്റ് വിവാദത്തില് മാധ്യമ പ്രവര്ത്തക അഖില നന്ദകുമാറിനെതിരെ കേസെടുത്തതില് രൂക്ഷവിമര്ശനവുമായി ഹൈബി ഈഡന് എംപി. മാധ്യമ സ്വാതന്ത്ര്യം സംസ്ഥാന സര്ക്കാര് കാറ്റില് പറത്തിയെന്ന് ഹൈബി ഈഡന് എം.പി. വിമര്ശിച്ചു. ജനാധിപത്യത്തിന് മേലുള്ള കടന്നുകയറ്റമാണ് കണ്ടത്. അഖിലക്ക് എല്ലാ പിന്തുണയും ഐക്യദാര്ഡ്യവും ഉണ്ടാവും. മെറിറ്റ് അട്ടിമറിക്കപ്പെടുന്ന മഹാരാജാസ് കോളേജിന്റെ ഓട്ടോണമസ് പദവി തിരിച്ചെടുക്കണമെന്നും ഹൈബി ഈഡന് എം.പി ആവശ്യപ്പെട്ടു.
എസ്എഫ്ഐ സംസ്ഥാന സെക്രട്ടറി പിഎം ആര്ഷോയുടെ പരാതിയെ തുടര്ന്നാണ് മാധ്യമ പ്രവര്ത്തക അഖില നന്ദകുമാറിനെതിരെ കേസ് രജിസ്റ്റര് ചെയ്തത്. മാര്ക്ക് ലിസ്റ്റ് വിവാദവുമായി ബന്ധപ്പെട്ട് തനിക്കെതിരെ ഗൂഢാലോചന നടത്തിയെന്നാണ് പരാതി. എന്നാല്, വാര്ത്ത റിപ്പോര്ട്ട് ചെയ്യുമ്പോള് കെ എസ് യു നേതാവിന്റെ ബൈറ്റെടുക്കുക മാത്രമാണ് അഖില നന്ദകുമാര് ചെയ്തത്. ആര്ഷോക്കെതിരെ രാഷ്ട്രീയ ആരോപണമെന്നും റിപ്പോര്ട്ടില് വ്യക്തമായി പറയുന്നു. എന്നിട്ടും കേസെടുക്കാനാണ് പൊലീസ് തീരുമാനിച്ചത്. അഖിലക്കെതിരെ കേസെടുത്തതിനെതിരെ വ്യാപകമായ വിമര്ശനമാണ് വിവിധ കോണുകളില് നിന്നുയരുന്നത്.
അഖിലാ നന്ദകുമാറിനെതിരെ പൊലീസ് കേസെടുത്തതില് ഇടതുമുന്നണിയില് ഭിന്നത ഉയര്ന്നുവന്നിട്ടുണ്ട്. സര്ക്കാര് നടപടിയില് കനത്ത പ്രതിഷേധം രേഖപ്പെടുത്തിയ സിപിഐ നേതാവ് സി ദിവാകരന്, റിപ്പോര്ട്ടര് അഖില നന്ദകുമാര് ചെയ്ത തെറ്റെന്തെന്ന് മനസിലാകുന്നില്ലെന്നും തുറന്നടിച്ചു. 'മാധ്യമ സ്വാതന്ത്ര്യം ഇടതുമുന്നണിയുടെ പ്രഖ്യാപിത നയമാണെന്നിരിക്കെ, മാധ്യമ സ്വാതന്ത്ര്യം ഹനിക്കുന്ന നടപടി അംഗീകരിക്കാനാകില്ല. വിമര്ശനങ്ങള് ഉള്ക്കൊള്ളാന് നല്ല ഭരണാധികാരികള്ക്ക് കഴിയണം. പൊലീസ് നടപടിയോട് സിപിഐ യോജിക്കുന്നില്ല. ആരുടേയോ പ്രീതി പിടിച്ച് പറ്റാന് പൊലീസ് കുത്തിത്തിരിപ്പ് നടത്തുകയാണ്'. സര്ക്കാര് നടപടിയിലെ വിയോജിപ്പ് അനുയോജ്യമായ വേദിയില് പറയുമെന്നും സി ദിവാകരന് വ്യക്തമാക്കി.
https://www.facebook.com/Malayalivartha
