സംസ്ഥാനത്ത് അടുത്ത അഞ്ച് ദിവസം ശക്തമായ മഴയ്ക്കു സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇതിനെത്തുടര്‍ന്ന് ഇന്നലെ ഒന്‍പതു ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിരുന്നു. ചൊവ്വാഴ്ച അഞ്ച് ജില്ലകളിലും യെല്ലോ അലര്‍ട്ട് പ്രഖ്യാപിച്ചു.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്‍, കോഴിക്കോട്, ജില്ലകളിലാണ് ഇന്നലെ ശക്തമായ മഴ മുന്നറിയിപ്പുണ്ടായിരുന്നത്. ചൊവ്വാഴ്ച എറണാകുളം, തൃശൂര്‍, കോഴിക്കോട്, കണ്ണൂര്‍ ജില്ലകളിലാണ് യെല്ലോ അലര്‍ട്ട്.

15 വരെ ഒറ്റപ്പെട്ട സ്ഥലങ്ങളില്‍ ഇടിമിന്നലോടു കൂടിയ മഴ തുടരുമെന്നും പ്രവചനമുണ്ട്. വിവിധ ജില്ലകളില്‍ ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിച്ചിട്ടുള്ളത്. ഇടിമിന്നലിനും മണിക്കൂറില്‍ 40 മുതല്‍ 50 കി മീ വരെ വേഗതയില്‍ വീശിയേക്കാവുന്ന ശക്തമായ കാറ്റിനും സാധ്യതയുണ്ട്. കേരള -കര്‍ണാടക- ലക്ഷദ്വീപ് തീരങ്ങളില്‍ മണിക്കൂറില്‍ 40 മുതല്‍ 45 കിലോമീറ്റര്‍ വരെ വേഗതയില്‍ ശക്തമായ കാറ്റിനും മോശം കാലാവസ്ഥക്കും സാധ്യതയുള്ളതിനാല്‍ കേരള- കര്‍ണാടക തീരങ്ങളിലും ലക്ഷദ്വീപ് തീരത്തും മത്സ്യബന്ധനത്തിന് പോകാന്‍ പാടില്ലെന്നും കേന്ദ്ര കാലാവസ്ഥ വകുപ്പ് .
മധ്യകിഴക്കന്‍ അറബിക്കടലിനു മുകളിലുള്ള ബിപോര്‍ജോയ് ചുഴലിക്കാറ്റിന്റെ സ്വാധീനഫലമായാണ് കേരളത്തില്‍ വ്യാപകമായ മഴയ്ക്ക് സാധ്യതയുള്ളത്. നിലവില്‍ ബിപോര്‍ജോയ് ഗുജറാത്ത് തീരത്തേക്ക് നീങ്ങുന്നു.


അതേസമയം ബിപോര്‍ ജോയ് ചുഴലിക്കാറ്റ് ഗുജറാത്ത് തീരത്തേക്ക് അടുത്തുകൊണ്ടിരിക്കുന്ന സാഹചര്യത്തില്‍ ട്രെയിനുകള്‍ക്ക് നിയന്ത്രണം ഏര്‍പ്പെടുത്തിയതായി റെയില്‍വേ . തിരുവനന്തപുരം - വെരാവേല്‍ അഹമ്മദാബാദിലും കൊച്ചുവേളി - പോര്‍ബന്തര്‍ രാജ്‌കോട്ടിലും യാത്ര അവസാനിപ്പിക്കും.

മടക്ക സര്‍വ്വീസും ഈ സ്റ്റേഷനുകളില്‍ നിന്ന് തന്നെയായിരിക്കും. ചുഴലിക്കാറ്റ് വന്‍ നാശനഷ്ടം ഉണ്ടാക്കാനിടയുള്ള സാഹചര്യത്തില്‍ ഗുജറാത്തില്‍ ദുരന്തനിവാരണ അതോറിട്ടി പുറപ്പെടുവിച്ച എല്ലാ മുന്‍കരുതലുകളും റെയില്‍വേ സ്വീകരിച്ചിട്ടുണ്ട്.

ട്രെയിന്‍ എവിടെയെങ്കിലും തടസ്സപ്പെട്ടാല്‍ യാത്രക്കാരെ സുരക്ഷിതരായി എത്തിക്കാനുള്ള പകരം സംവിധാനം ഏര്‍പ്പെടുത്തി. ഇലക്ട്രിക് ലൈനുകള്‍ മുറിഞ്ഞുപോയാല്‍ പകരം ഡീസല്‍ ട്രെയിന്‍എന്‍ജിനുകളും സജ്ജമാക്കിയിട്ടുണ്ടെന്ന് റെയില്‍വേ അറിയിച്ചു.