കോണ്‍ഗ്രസില്‍ സ്ഥാനമാനങ്ങളെ ചൊല്ലി കൂട്ടയടിയാണ്. അതിന് പിന്നാലെ കേസുകളും വന്നു തുടങ്ങി. പ്രതിപക്ഷ നേതാവ് വി.ഡി.സതീശനു പിന്നാലെ കെപിസിസി പ്രസിഡന്റ് കെ.സുധാകരന് എതിരെയും കേസെടുത്തതോടെ നാലു ദിവസത്തിനിടെ പ്രതിപക്ഷത്തെ രണ്ടു മുതിര്‍ന്ന നേതാക്കള്‍ കേസില്‍ കുടുങ്ങി. രണ്ടു കേസ് അന്വേഷണങ്ങളും വര്‍ഷങ്ങള്‍ക്ക് മുന്‍പ് ഉയര്‍ന്ന ആരോപണങ്ങളുടെ അടിസ്ഥാനത്തിലാണ്.

മുമ്പ് തണുത്തിരുന്ന കേസാണ് കുത്തിപ്പൊങ്ങി വരുന്നത്. വി.ഡി.സതീശനെതിരായ അന്വേഷണത്തിന്റെ അടിസ്ഥാനം 3 വര്‍ഷം മുന്‍പുള്ള പരാതിയാണെങ്കില്‍, സുധാകരനെതിരായ കേസിന്റെ ആധാരമാകട്ടെ ഒന്നര വര്‍ഷം മുന്‍പുയര്‍ന്ന ആക്ഷേപവും.

കഴിഞ്ഞ വെള്ളിയാഴ്ചയാണ് വി.ഡി.സതീശനെതിരെയുള്ള വിജിലന്‍സ് അന്വേഷണത്തിന് സര്‍ക്കാര്‍ അനുമതി നല്‍കിയത്. പറവൂര്‍ മണ്ഡലത്തില്‍ 'പുനര്‍ജനി' പദ്ധതിക്കു വിദേശപണപ്പിരിവ് നടത്തിയെന്ന 2020ലെ പരാതിയില്‍, വിദേശയാത്രയ്ക്ക് തൊട്ടുമുന്‍പാണ് മുഖ്യമന്ത്രി പിണറായി വിജയന്‍ അന്വേഷണ അനുമതി നല്‍കിയത്.

സ്വന്തം മണ്ഡലമായ പറവൂരില്‍ പ്രളയത്തില്‍ വീടും ഉപജീവനവും നഷ്ടപ്പെട്ടവര്‍ക്കായി സതീശന്‍ ആവിഷ്‌കരിച്ച 'പുനര്‍ജനി' പദ്ധതിക്കു വേണ്ടി വിദേശത്തു പണപ്പിരിവ് നടത്തിയെന്ന പരാതിയിലാണു വിജിലന്‍സിന്റെ പ്രാഥമിക അന്വേഷണം. രണ്ടു ദിവസത്തെ ഇടവേളയ്ക്ക് ശേഷം തിങ്കളാഴ്ച ഉച്ചയോടെ സുധാകരനെതിരെയും കേസെടുത്തു. പുരാവസ്തു തട്ടിപ്പുകേസിലെ പ്രതി മോന്‍സന്‍ മാവുങ്കല്‍ പ്രതിയായ തട്ടിപ്പ് കേസിലാണ് സുധാകരനെയും പ്രതിചേര്‍ത്തിരിക്കുന്നത്. കേസില്‍ രണ്ടാം പ്രതിയാണ് സുധാകരന്‍.

ചോദ്യം ചെയ്യലിനായി ബുധനാഴ്ച കളമശേരിയിലെ ഓഫിസില്‍ ഹാജരാകാന്‍ ആവശ്യപ്പെട്ട് ക്രൈംബ്രാഞ്ച് നോട്ടിസ് നല്‍കിയിട്ടുണ്ട്. നയതന്ത്ര സ്വര്‍ണക്കടത്തില്‍ തുടങ്ങി റോഡ് ക്യാമറയും കെ ഫോണും വരെയുള്ള വിഷയങ്ങളില്‍ കനത്ത ആരോപണമാണ് പ്രതിപക്ഷം ഉയര്‍ത്തിയത്. എന്നാലിപ്പോള്‍ ആ നേതാക്കള്‍ സ്വയം പ്രതിരോധിക്കേണ്ടി വന്നു.

അതേസമയം പുരാവസ്തു തട്ടിപ്പുകേസിലെ പ്രതി മോന്‍സന്‍ മാവുങ്കല്‍ പ്രതിയായ തട്ടിപ്പ് കേസില്‍ കെപിസിസി അധ്യക്ഷന്‍ കെ.സുധാകരനെ ചോദ്യം ചെയ്യും. ചോദ്യം ചെയ്യലിനായി ബുധനാഴ്ച കളമശേരിയിലെ ഓഫിസില്‍ ഹാജരാകാന്‍ ആവശ്യപ്പെട്ട് ക്രൈംബ്രാഞ്ച് നോട്ടിസ് നല്‍കി. കേസില്‍ രണ്ടാം പ്രതിയാണ് സുധാകരന്‍. സുധാകരനെ പ്രതി ചേര്‍ത്ത് ക്രൈംബ്രാഞ്ച് കോടതിയില്‍ റിപ്പോര്‍ട്ട് നല്‍കി.

എംപിയായിരിക്കെ പബ്ലിക് ഫിനാന്‍സ് കമ്മിറ്റിയില്‍ സുധാകരന്‍ അംഗമായിരുന്നു. ഇതിനിടെ, തന്റെ രണ്ടരക്ഷത്തോളം കോടി രൂപ കേന്ദ്രസര്‍ക്കാര്‍ തടഞ്ഞുവച്ചിരിക്കുകയാണെന്നും ഈ പണം തിരിച്ചുലഭിക്കുന്ന മുറയ്ക്ക് തിരികെ നല്‍കുമെന്നും ഇടപാടുകാര്‍ക്ക് മോന്‍സന്‍ വാഗ്ദാനം ചെയ്തിരുന്നു. ഈ തടഞ്ഞുവച്ചിരിക്കുന്ന പണം തിരികെ കിട്ടാന്‍ താന്‍ ഇടപെടുമെന്ന് സുധാകരന്‍ വാഗ്ദാനം ചെയ്‌തെന്നാണ് ആരോപണം.

സുധാകരന്‍ നേരിട്ട് വാഗ്ദാനങ്ങള്‍ നല്‍കിയിട്ടുണ്ടെന്നും സുധാകരന്റെ സാന്നിധ്യത്തില്‍ പണം കൈമാറിയിട്ടുണ്ടെന്നും പരാതിക്കാര്‍ ആരോപിച്ചിരുന്നു. ഇതിന്റെ അടിസ്ഥാനത്തില്‍ നടത്തിയ അന്വേഷണത്തില്‍ സുധാകരനെതിരെ തെളിവുകള്‍ കണ്ടെത്താന്‍ കഴിഞ്ഞിട്ടുണ്ടെന്നാണ് അന്വേഷണ സംഘം വ്യക്തമാക്കുന്നത്.

മോന്‍സന്‍ മാവുങ്കലിനൊപ്പമുള്ള കെ.സുധാകരന്റെ ചിത്രങ്ങള്‍ നേരത്തേ പുറത്തുവന്നിരുന്നു. എന്നാല്‍, മോന്‍സനുമായി ഒരു സാമ്പത്തിക ഇടപാടും ഇല്ലെന്ന് അദ്ദേഹം വ്യക്തമാക്കിയിരുന്നു. കണ്ണുമായി ബന്ധപ്പെട്ട ചികിത്സയ്ക്കു 5 വട്ടം പോയിട്ടുണ്ടെന്നും ഫലമില്ലെന്നു കണ്ടതോടെ ചികിത്സ നിര്‍ത്തിയെന്നും സുധാകരന്‍ വെളിപ്പെടുത്തിയിരുന്നു. ഒരു സാമ്പത്തിക ഇടപാടുമില്ലെന്നും ഒരു രൂപ പോലും വാങ്ങിയിട്ടില്ലെന്നും അദ്ദേഹം പറഞ്ഞു.