ബ്യൂട്ടിപാര്ലര് ഉടമയെ കുടുക്കിയ വ്യാജ മയക്കുമരുന്ന് കേസ്... എക്സൈസ് ഉദ്യോഗസ്ഥനെ സസ്പെന്ഡ് ചെയ്തു; കഅന്വേഷണം നടത്തി 15 ദിവസത്തിനകം റിപ്പോര്ട്ട് നല്കണമെന്ന് മനുഷ്യാവകാശ കമ്മിഷന്
ചാലക്കുടിയില് ബ്യൂട്ടിപാര്ലര് ഉടമ ഷീല സണ്ണിയെ മയക്കുമരുന്ന് കേസില് കുടുക്കിയ സംഭവത്തില് എക്സൈസ് ഉദ്യോഗസ്ഥനെ സസ്പെന്ഡ് ചെയ്തു. ഇരിങ്ങാലക്കുടയിലെ മുന് എക്സൈസ് ഉദ്യോഗസ്ഥന് കെ. സതീശനെയാണ് സസ്പെന്ഡ് ചെയ്തത്. എക്സൈസ് കമ്മിഷണറാണ് സസ്പെന്ഡ് ചെയ്ത് ഉത്തരവിട്ടത്. വ്യാജകേസ് ചമയ്ക്കുന്നതിന് ഉദ്യോഗസ്ഥന് സഹായിച്ചു എന്ന കുറ്റത്തിനാണ് നടപടി.
ഷീല സണ്ണിയുടെ ബാഗില് നിന്ന് കണ്ടെടുത്തത് എല്.എസ്.ഡി സ്റ്റാമ്പല്ലെന്ന ലാബ് പരിശോധനാ ഫലം പുറത്തുവന്നിരുന്നു. കേസില് ഷീല സണ്ണി 72 ദിവസം ജയില്വാസം അനുഭവിച്ചിരുന്നു. സംഭവത്തില് എക്സൈസ് ക്രൈംബ്രാഞ്ച് അന്വേഷണം നടക്കുകയാണ്. അന്വേഷണത്തിന് ശേഷം ഉദ്യോഗസ്ഥനെതിരെ കൂടുതല് നടപടികള് ഉണ്ടായേക്കും.
വിഷയത്തില് മനുഷ്യാവകാശ കമ്മിഷനും കേസെടുത്തിട്ടുണ്ട് . മാദ്ധ്യമ വാര്ത്തകളുടെ അടിസ്ഥാനത്തിലാണ് കമ്മിഷന് സ്വമേധയാ കേസെടുത്തത്. തൃശൂര് ജില്ലാ പൊലീസ് മേധാവി അന്വേഷണം നടത്തി 15 ദിവസത്തിനകം റിപ്പോര്ട്ട് നല്കണമെന്ന് മനുഷ്യാവകാശ കമ്മിഷന് അംഗം വി.കെ. ബീനാകുമാരി ആവശ്യപ്പെട്ടു.
അതേസമയം മയക്കുമരുന്ന് കേസില് വ്യാജമായി പ്രതി ചേര്ക്കപ്പെട്ട ഷീലാ സണ്ണിയെ മന്ത്രി എംബി രാജേഷ് ഫോണില് വിളിച്ച് ആശ്വസിപ്പിച്ചു. ചെയ്യാത്ത തെറ്റിന്റെ പേരില് ജയിലില് കിടക്കാനിടയായതിലും അനുഭവിക്കേണ്ടി വന്ന ബുദ്ധിമുട്ടിലും ഖേദം പ്രകടിപ്പിച്ചു. അവരെ വ്യാജമായി കേസില് കുടുക്കുന്നതിന് ഉത്തരവാദികളായ എല്ലാവര്ക്കുമെതിരെ കര്ശന നടപടിയുണ്ടാകുമെന്ന് ഉറപ്പുനല്കി. ഇക്കാര്യം ഇന്നലെ തന്നെ മാധ്യമങ്ങളോട് വ്യക്തമാക്കിയതാമെന്ന് മന്ത്രി പറഞ്ഞു.
സര്ക്കാര് ഇക്കാര്യത്തില് സ്വീകരിച്ച നടപടികളില് ഷീലാ സണ്ണി സംതൃപ്തിയും നന്ദിയും അറിയിച്ചു. ഷീലാ സണ്ണി നിരപരാധിയാണ് എന്ന് കോടതിയെ അറിയിക്കും. ഇനി ഒരാള്ക്കും ഇത്തരമൊരു അനുഭവം ഉണ്ടാകില്ലെന്ന് ഉറപ്പാക്കുംവിധം, ഉത്തരവാദികളായ എല്ലാവര്ക്കുമെതിരെ നിയമാനുസൃതമായ കര്ശന നടപടി സ്വീകരിക്കുമെന്നും മന്ത്രി വ്യക്തമാക്കി.
https://www.facebook.com/Malayalivartha
