ഒറ്റ ദിവസം കൊണ്ടാണ് ഇന്ത്യയുടേയും പ്രധാനമന്ത്രി നരേന്ദ്ര മോദിയുടേയും ഗ്രാഫ് കുത്തനെ കൂടിയത്. ചന്ദ്രയാന്‍ 3 ദൗത്യത്തിന്റെ മിന്നും വിജയത്തില്‍ ഇന്ത്യയെ വാനോളം പുകഴ്ത്തി യുഎന്നും ലോകരാജ്യങ്ങളും. ചന്ദ്രയാന്‍ 3 വലിയൊരു കാല്‍വയ്പും നേട്ടവുമാണെന്ന് യുഎന്‍ സെക്രട്ടറി ജനറല്‍ അന്റോണിയോ ഗുട്ടെറസിന്റെ സഹ വക്താവ് ഫ്‌ലോറെന്‍സിയ സോട്ടോ നിനോ അഭിപ്രായപ്പെട്ടു.

യുഎന്നിലെ യുഎസ് അംബാസഡര്‍ ലിന്‍ഡ തോമസ് ഗ്രീന്‍ഫീല്‍ഡ്, മുന്‍ വിമന്‍ അസിസ്റ്റന്റ് സെക്രട്ടറി ജനറലും ഡപ്യൂട്ടി എക്‌സിക്യൂട്ടീവ് ഡയറക്ടറുമായ അനിത ഭാട്ടിയ എന്നിവരും അഭിനന്ദനമറിയിച്ചു. യുഎസ് നേതാക്കളും മാധ്യമങ്ങളും ബഹിരാകാശ വിജയത്തില്‍ ഇന്ത്യയെ പ്രകീര്‍ത്തിച്ചു. ചന്ദ്രയാന്‍ 3 വിജയത്തില്‍ ഇന്ത്യയുടെ സന്തോഷം പങ്കുവയ്ക്കുന്നതായി ബംഗ്ലദേശ് പ്രധാനമന്ത്രി ഷെയ്ഖ് ഹസീന പറഞ്ഞു.

ബഹിരാകാശ, സാങ്കേതിക മുന്നേറ്റത്തില്‍ തെക്കേഷ്യന്‍ രാജ്യങ്ങള്‍ക്കെല്ലാം അഭിമാനവും പ്രചോദനവുമായി ഇന്ത്യ മാറിയെന്നും ചൂണ്ടിക്കാട്ടി. ഇന്ത്യയുടെ ചരിത്രനേട്ടത്തില്‍ അഭിമാനിക്കുന്നതായി മോദിക്കയച്ച സന്ദേശത്തില്‍ ശ്രീലങ്ക പ്രസിഡന്റ് റനില്‍ വിക്രമസിംഗെ പറഞ്ഞു. വിസ്മയ നേട്ടങ്ങളെക്കുറിച്ച് രബീന്ദ്രനാഥ് ടഗോറിന്റെ വരികള്‍ ഉദ്ധരിച്ചാണ് ദക്ഷിണാഫ്രിക്ക പ്രസിഡന്റ് സിറില്‍ റാമഫോസ ഇന്ത്യയെ അഭിനന്ദിച്ചത്.

രാജ്യങ്ങള്‍ തമ്മിലുള്ള ബന്ധം ഊഷ്മളമല്ലെങ്കിലും ഇന്ത്യയുടെ ബഹിരാകാശ വിജയം പാക്കിസ്ഥാനിലെ പത്രങ്ങളില്‍ ഒന്നാം പേജ് വാര്‍ത്തയായി. ഗൂഗിള്‍ പ്രത്യേക ഡൂഡിലൊരുക്കിയാണ് ഇന്ത്യന്‍ നേട്ടം ആഘോഷിച്ചത്.

ചന്ദ്രയാന്‍ 3 ദൗത്യം വിജയം കണ്ടതു മുതല്‍ അഭിനന്ദന സന്ദേശങ്ങളുടെ പ്രവാഹമാണെന്നു പറഞ്ഞ പ്രധാനമന്ത്രി നരേന്ദ്ര മോദി എല്ലാവര്‍ക്കും നന്ദി പറഞ്ഞു. ഇത് ഇന്ത്യയുടെ മാത്രമല്ല, മാനവകുലത്തിന്റെയാകെ വിജയമാണെന്നും ചൂണ്ടിക്കാട്ടി.

ഇന്ത്യയുടെ ശാസ്ത്രമുന്നേറ്റത്തിനുള്ള ഏറ്റവും നല്ല തെളിവാണു ചന്ദ്രയാന്‍ 3 എന്ന് റഷ്യന്‍ പ്രസിഡന്റ് വ്‌ലാഡിമിര്‍ പുട്ടിന്‍ പറഞ്ഞു. രാഷ്ട്രപതി ദ്രൗപദി മുര്‍മുവിനും പ്രധാനമന്ത്രി നരേന്ദ്ര മോദിക്കും അയച്ച സന്ദേശത്തിലാണ് പുട്ടിന്റെ അഭിനന്ദനം. ചന്ദ്രയാനും മുന്‍പു ചന്ദ്രന്റെ ദക്ഷിണധ്രുവത്തിലിറങ്ങാന്‍ തയാറെടുത്തിരുന്ന റഷ്യയുടെ ലൂണ 25 ലക്ഷ്യത്തോടുത്ത വേളയില്‍ ചന്ദ്രോപരിതലത്തില്‍ തകര്‍ന്നു വീണത് റഷ്യന്‍ ബഹിരാകാശ ഗവേഷണമേഖലയ്ക്ക് ആഘാതമായിരിക്കെയാണ് പുട്ടിന്‍ ഇന്ത്യയുടെ സന്തോഷത്തില്‍ പങ്കു ചേര്‍ന്നത്.

അതേസമയം ഇന്ത്യയുടെ ചാന്ദ്രദൗത്യം ചന്ദ്രയാന്‍ മൂന്ന് ചന്ദ്രന്റെ ദക്ഷിണധ്രുവത്തില്‍ വിജയകരമായി സോഫ്റ്റ് ലാന്‍ഡ് ചെയ്തതിന് പിന്നാലെ എക്സില്‍ തരംഗമായി ഐ.എസ്.ആര്‍.ഒയുടെ മുന്‍ മേധാവി കെ. ശിവന്റെ ചിത്രങ്ങളും വീഡിയോകളും.

2019-ല്‍ ചന്ദ്രയാന്‍ രണ്ട് ദൗത്യം പരാജയപ്പെടുമ്പോള്‍ ഐ.എസ്.ആര്‍.ഒയുടെ തലവനായിരുന്നു ശിവന്‍. ദൗത്യം പരാജയപ്പെട്ടതോടെ ശിവന്‍ കരയുകയും പിന്നാലെ പ്രധാനമന്ത്രി നരേന്ദ്ര മോദി അദ്ദേഹത്തെ ആലിംഗനം ചെയ്ത് ആശ്വസിപ്പിക്കുകയും ചെയ്തിരുന്നു. അന്ന് ഇതിന്റെ ദൃശ്യങ്ങള്‍ വ്യാപകമായി പ്രചരിച്ചിരുന്നു.

നാലുകൊല്ലത്തിന് ശേഷം ചന്ദ്രയാന്‍ മൂന്ന് ചരിത്രനേട്ടം കൈവരിച്ചതോടെയാണ് കെ. ശിവന്റെ പഴയചിത്രങ്ങള്‍ എക്സില്‍ വ്യാപകമായി പ്രചരിക്കുന്നത്. പരാജയം വിജയത്തിലേക്കുള്ള ചവിട്ടുപടിയാണെന്നും കെ. ശിവന്റെ സംഭാവനകള്‍ ഓര്‍മിക്കേണ്ടതുണ്ടന്നും പല ട്വീറ്റുകളും പറയുന്നു.