പൂജപ്പുര സെന്‍ട്രല്‍ ജയിലില്‍ ഊണിനൊപ്പം വിളമ്പിയ മട്ടന്‍ കറിയില്‍ എല്ലുകള്‍ മാത്രമായി അളവ് കുറഞ്ഞു പോയതില്‍ പ്രകോപിതനായ തടവുകാരന്‍ ഭക്ഷണം പാത്രത്തോടെ മാലിന്യ ടാങ്കില്‍ വലിച്ചെറിഞ്ഞ് ജയില്‍ ഉദ്യോഗസ്ഥരെ ആക്രമിച്ചെന്ന കേസില്‍ പ്രതി വയനാട് സ്വദേശി ഫൈജാസിനെതിരെ 10 വര്‍ഷം ശിക്ഷ ലഭിക്കാവുന്ന സെഷന്‍സ് കോടതി വിചാരണ ചെയ്യേണ്ട കുറ്റം ചുമത്തി പൂജപ്പുര പോലീസ് കുറ്റപത്രം സമര്‍പ്പിച്ചു.



തിരുവനന്തപുരം അഡീ. ചീഫ് ജുഡീഷ്യല്‍ മജിസ്‌ട്രേട്ട് കോടതിയിലാണ് പൂജപ്പുര പോലിസ് സര്‍ക്കിള്‍ ഇന്‍സ്‌പെക്ടര്‍ കുറ്റപത്രം സമര്‍പ്പിച്ചത്. ഇന്ത്യന്‍ ശിക്ഷാ നിയമത്തിലെ 294 (ബി) (അസഭ്യ വാക്കുകള്‍ വിളിക്കല്‍) , 353 ( പൊതുസേവകരായ ജയില്‍ ഉദ്യോഗസ്ഥര്‍ തങ്ങളുടെ കര്‍ത്തവ്യത്തില്‍ നിന്ന് ഭയന്ന് പിന്‍മാറണമെന്ന ഉദ്ദേശ്യത്തോടെ അവര്‍ക്ക് നേരെ കെയ്യേറ്റവും ബലപ്രയോഗവും ചെയ്യല്‍ ) , 323 ( ദേഹോപദ്രവമേല്‍പ്പിക്കല്‍) , 325 (പൊതുസേവകരെ സ്വേച്ഛയാ കഠിന ദേഹോപദ്രവമേല്‍പ്പിക്കല്‍) , 333 (പൊതുസേവകരെ കഠിന ദേഹോപദ്രവമേല്‍പ്പിക്കല്‍) എന്നീ വകുപ്പുകള്‍ ചുമത്തിയുള്ള താണ് പോലീസ് കുറ്റപത്രം.




അതേ സമയം തന്നെ ക്രൂരമായി മര്‍ദ്ദിച്ചതിന് ജയില്‍ ഡെപ്യൂട്ടി സൂപ്രണ്ടും പ്രിസണ്‍ ഓഫീസര്‍മാരുമടക്കം 6 പേര്‍ക്കെതിരെ കേസെടുക്കണമെന്നാവശ്യപ്പെട്ട് ഫൈജാസ് തുണിക്കഷണത്തില്‍ എഴുതി സമര്‍പ്പിച്ച പരാതിയില്‍ കോടതി നേരിട്ട് അന്വേഷണം തുടങ്ങി. അഡീ.സി ജെ എം എല്‍സാ കാതറിന്‍ ജോര്‍ജ് ഫൈജാസിന്റെയും സാക്ഷികളായ രണ്ടു ജയില്‍ അന്തേവാസികളുടെയും മൊഴി രേഖപ്പെടുത്തി. ജുഡീഷ്യല്‍ കസ്റ്റഡിയിലുള്ള പീഡനമെന്ന് നിരീക്ഷിച്ച കോടതി ഫൈജാസിന് വൈദ്യസഹായം നല്‍കാന്‍ മെഡിക്കല്‍ കോളേജ് സൂപ്രണ്ടിന് പ്രത്യേക നിര്‍ദേശം നല്‍കി. സ്‌കാനിംഗ് റിപ്പോര്‍ട്ട് ഹാജരാക്കാനും ഉത്തരവിട്ടു. പരാതി എഴുതാന്‍ ജയില്‍ ഉദ്യോഗസ്ഥര്‍ പേപ്പര്‍ തരാത്തതിനാലാണ് താന്‍ തുണിക്കഷണത്തില്‍ പരാതി എഴുതേണ്ടി വന്നതെന്നന്നും ഫൈജാസ് കോടതിയില്‍ ബോധിപ്പിച്ചു. ഡെപ്യൂട്ടി ജയില്‍ സൂപ്രണ്ട് ഉണ്ണികൃഷ്ണന്‍ , ഡെപ്യൂട്ടി പ്രിസണ്‍ ഓഫീസര്‍മാരായ ശ്രീകൃഷ്ണദാസ് , കിഷോര്‍ , കെ.മനോജ് , ഇര്‍ഷാദ് , കണ്ടാലറിയാവുന്ന അസി. പ്രിസണ്‍ ഓഫീസര്‍ എന്നിവര്‍ക്കെതിരെ കേസെടുക്കണമെന്നാണ് ഫയാസ് കോടതിയില്‍ സമര്‍പ്പിച്ച തുണിക്കഷണത്തിലെഴുതിയ പരാതിയിലെ ആവശ്യം.




വയനാട് സ്വദേശി ഫൈജാസ് എന്ന ശിക്ഷാ തടവുകാരന്‍ ഡെപ്യൂട്ടി ജയില്‍ സൂപ്രണ്ട് ഉള്‍പ്പെടെയുള്ള ഉദ്യോഗസ്ഥരെ കൈയ്യേറ്റം ചെയ്തുവെന്നാണ് പോലീസ് കേസ്. ശനിയാഴ്ച ഉച്ചയ്ക്കു 2.30ന് ആയിരുന്നു സംഭവം. രണ്ടര വര്‍ഷം മുന്‍പ് കണ്ണൂര്‍ ജയിലില്‍ നിന്ന് പൂജപ്പുര സെന്‍ട്രല്‍ ജയിലിലെത്തിയ ഫൈജാസിന്റെ അക്രമസ്വഭാവം ഇന്നും ഇന്നലെയും തുടങ്ങിയതല്ലെന്നാണ് ജയില്‍ ഉദ്യോഗസ്ഥരുടെ ഭാഷ്യം.

കണ്ണൂരിലെ ജയില്‍വാസ കാലത്ത് പഠിച്ചെടുത്ത ബ്യൂട്ടിഷന്‍ കോഴ്‌സിന്റെ ഡിപ്ലോമ സര്‍ട്ടിഫിക്കറ്റുമായാണ് ഫൈജാസ് സെന്‍ട്രല്‍ ജയിലിലെത്തിയത്. പെട്ടന്ന് പ്രോകോപിതനാകുന്ന പ്രകൃതമായതിനാല്‍ ഇടയ്ക്കിടെയുള്ള ജയില്‍ മാറ്റം ഇയാള്‍ക്ക് പതിവാണ് എന്നാണ് ജയില്‍ ഉദ്യോഗസ്ഥരുടെ പരാതിയില്‍ എടുത്ത കേസില്‍ സമര്‍പ്പിച്ച കുറ്റപത്രത്തില്‍ പൂജപ്പുര പോലീസ് പറയുന്നത്. ബ്യൂട്ടിഷന്‍ കോഴ്‌സ് പൂര്‍ത്തിയാക്കിയ ഫൈജാസിനെ ജയിലിലെ ബാര്‍ബറുടെ ജോലിയാണ് ആദ്യം ലഭിച്ചത്. ഇവിടെ കഴിവ് തെളിയച്ചതോടെ പൂജപ്പുര കുഞ്ചാലും മൂട് റോഡില്‍ ജയില്‍ വകുപ്പ് നടത്തുന്ന ബ്യൂട്ടീപാര്‍ലറിലേക്ക് ഫൈജാസിനെ മാറ്റി.
മസാജിംഗിന്റെ ചുമതലയായിരുന്നു ഫൈജാസിന് ഉദ്യോഗസ്ഥര്‍ നല്‍കിയത്. ഹെഡ് മസാജിംഗും ഫെയ്സ് മസാജിംഗുമായിരുന്നു പ്രധാന ചുമതല. എന്നാല്‍ ആറുമാസം മുന്‍പ് തല മസാജ് ചെയ്യുന്നതിനിടെ ഒരാളുടെ കഴുത്ത് പിടിച്ച് തിരിച്ചത് പരാതിയാകുകയും വിഷയം ജയില്‍ മേധാവിക്ക് മുന്നില്‍ എത്തിയതോടെ ഫൈജാസിനെ ബ്യൂട്ടി പാര്‍ലറില്‍ നിന്നും ഒഴിവാക്കുകയും ചെയ്തു.


തുടര്‍ന്ന് ജയിലിനുള്ളില്‍ മറ്റ് ജോലികള്‍ ഒന്നും നല്‍കാതെ നിലനിര്‍ത്തി. ഇതിനിടയില്‍ സൂപ്രണ്ടിന് മുന്നിലെത്തി ക്ഷമാപണം നടത്തിയതോടെ ഫൈജാസ് വീണ്ടും തടവുകാരുടെ മൂടിവെട്ടട്ടെയെന്ന് ജയില്‍ ഉദ്യോഗസ്ഥര്‍ തീരുമാനിച്ചു. അങ്ങനെ ജയിലിനുള്ളിലെ ബാര്‍ബര്‍ ആയി കഴിയവെയാണ് ഊണിന് വിളമ്പിയ മട്ടണ്‍ കറി കുറഞ്ഞ് പോയെന്ന് പറഞ്ഞ് ശനിയാഴ്ച ഫൈജാസ് പ്രശ്നമുണ്ടാക്കിയത്. ഒരു തടവുകാരന് 100 ഗ്രാം മട്ടന്‍ കറി കൊടുക്കണമെന്നാണ് നിയമം. എന്നാല്‍ ശനിയാഴ്ച ഉച്ചയൂണിന് ഫൈജാസിന് കിട്ടിയ മട്ടന്‍ കറിയില്‍ എല്ലുകള്‍ മാത്രമായിരുന്നുവെന്നാണ് പരാതി. പ്രകോപിതനായ ഫൈജാസ് ഡെപ്യൂട്ടി സൂപ്രണ്ട് ഉള്‍പ്പെടെയുള്ള ജയില്‍ ഉദ്യോഗസ്ഥരെ കയ്യേറ്റം ചെയ്തു. സംഭവത്തില്‍ ഫൈജാസിന്(42) എതിരെ ജയില്‍ അധികൃതരുടെ പരാതിയിലാണ് പൂജപ്പുര പൊലീസ് കേസ് എടുത്തത്.

കഞ്ചാവ് കടത്ത് കേസില്‍ 10 വര്‍ഷം ശിക്ഷിക്കപ്പെട്ട് ജയിലിലെത്തിയ ഇയാളുടെ ശിക്ഷാകാലയളവ് അവസാനിച്ചുവെങ്കിലും പിഴ തുകയായ ഒരു ലക്ഷം രൂപ ഒടുക്കാത്തതിനാല്‍ ജയിലില്‍ തുടരുകയായിരുന്നു. അടുത്ത വര്‍ഷം ജയില്‍ മോചിതനാവാന്‍ ഇരിക്കെയാണ് പുതിയ കേസ് . കണ്ണൂര്‍, വിയ്യൂര്‍, അതിസുരക്ഷാ ജയില്‍ എന്നിവിടങ്ങളില്‍ കഴിയുമ്പോഴും തടവുകാരുമായും ഉദ്യോഗസ്ഥരുമായും ഫൈജാസ് പ്രശ്നങ്ങള്‍ ഉണ്ടാക്കിയിരുന്നു.