കേരളം ഒരിക്കല്‍ ബി.ജെ.പി ഭരിക്കുക തന്നെ ചെയ്യുമെന്ന് ബി.ജെ.പി നേതാവ് സന്ദീപ് വാര്യര്‍. ഇടതു- വലതു മുന്നണികളുടെ അവസരവാദ രാഷ്ട്രീയം തുറന്നുകാട്ടി ശക്തമായി മുന്നോട്ട് പോകുമെന്നും അദ്ദേഹം പറഞ്ഞു. പുതുപ്പള്ളി ഉപതിരഞ്ഞെടുപ്പിലും ഇത്തവണ ബിജെപിക്ക് പ്രതീക്ഷയുണ്ട്. മുന്‍ മുഖ്യമന്ത്രിയായ ഉമ്മന്‍ചാണ്ടിയുടെ മരണത്തിനുശേഷം നടക്കുന്ന തെരഞ്ഞെടുപ്പ് ആയതിനാല്‍, നിലവില്‍ ഭരണത്തില്‍ ഇരിക്കുന്ന പാര്‍ട്ടിക്ക് ആ ഒരു വൈകാരികമായ പ്രകടനത്തിന്റെ ആനുകൂല്യം ലഭിക്കേണ്ടതാണ്. എന്നാല്‍, അത്തരത്തിലൊരു ആനുകൂല്യം പുതുപ്പള്ളിയില്‍ ഇത്തവണ യുഡിഎഫിന് ലഭിക്കാനുള്ള സാധ്യത തീരെയില്ലന്നും അദ്ദേഹം അഭിപ്രായപ്പെട്ടു.

വിപുലമായ പ്രചരണ പരിപാടികള്‍ നടത്തിയ എല്‍ഡിഎഫ് ഇപ്പോള്‍ മാസപ്പടി വിവാദവും, കരിവന്നൂര്‍ ബാങ്ക് തട്ടിപ്പുമായി ബന്ധപ്പെട്ട മുന്‍സഹകരണ വകുപ്പ് മന്ത്രിക്ക് എതിരായുള്ള ഇഡിയുടെ റെയ്ഡ് അടക്കമുള്ള സംഭവങ്ങളും വന്നതോടെ, കേരള സമൂഹത്തില്‍ മുഴുവനായും തുറന്നു കാണിക്കപ്പെട്ടിരിക്കുകയാണ്.അതുകൊണ്ടുതന്നെ സ്വാഭാവികമായും ഇത്തവണ ബിജെപിക്ക് പുതുപ്പള്ളിയില്‍ വ്യക്തമായ സാധ്യത വന്നിട്ടുണ്ട്. അതിലൊന്ന് നരേന്ദ്രമോദി സര്‍ക്കാരിന്റെ കീഴില്‍ നടത്തിവരുന്ന സാമൂഹിക ക്ഷേമ പ്രവര്‍ത്തനങ്ങളാണ്. ആ സാമൂഹ്യ ക്ഷേമ പ്രവര്‍ത്തനങ്ങളുടെ ഫലം ലഭിക്കാത്തവര്‍ പുതുപ്പള്ളിയിലും ഉണ്ടാവുകയില്ല. ഏകദേശം ഇരുപതിനായിരം വീടുകളില്‍ പി എം കിസാന്‍ സമ്മാന്‍ യോജന എത്തുന്നുണ്ട്. കൂടാതെ പല കേന്ദ്ര പദ്ധതികളും മിക്ക പഞ്ചായത്തുകളിലും നടന്നു വരുന്നുണ്ട്. ജന്‍ ഔഷധി സെന്ററുകളില്‍ നിന്നും മരുന്നു വാങ്ങാത്തവര്‍ പോലും കുറവാണ്. അതുകൊണ്ടുതന്നെ ബിജെപി സ്ഥാനാര്‍ഥിയായ ലിജിന്‍ ലാലിന് അനുകൂലമായിട്ടുള്ള വിധി തന്നെ പുതുപ്പള്ളിയില്‍ ഉണ്ടാകുമെന്നും സന്ദീപ് വാര്യര്‍ ആത്മവിശ്വാസം പ്രകടിപ്പിച്ചു.

കഴിഞ്ഞ നിയമസഭാ തിരഞ്ഞെടുപ്പിന് മുന്‍നിര്‍ത്തി ഈ തിരഞ്ഞെടുപ്പിനെ വിലയിരുത്താന്‍ കഴിയില്ലന്നും അദ്ദേഹം പറഞ്ഞു. കഴിഞ്ഞ തവണ പുതുപ്പള്ളിയില്‍ വോട്ട് കുറഞ്ഞത് ചൂണ്ടിക്കാണിച്ചപ്പോള്‍ ആയിരുന്നു ഈ പ്രതികരണം. ഓരോ തെരഞ്ഞെടുപ്പുകളും വ്യത്യസ്തമാണ്. തിരഞ്ഞെടുപ്പുകളെ വിലയിരുത്തേണ്ടത് അപ്പോഴത്തെ രാഷ്ട്രീയ സാഹചര്യം മുന്‍നിര്‍ത്തിയാണ്. കഴിഞ്ഞ തിരഞ്ഞെടുപ്പിനെ പോസ്റ്റ്‌മോര്‍ട്ടം ചെയ്യേണ്ട സമയമല്ല ഇത്. കഴിഞ്ഞ അരനൂറ്റാണ്ടായി ഒരു വ്യക്തിയാണ് ഈ മണ്ഡലത്തെ പ്രതിനിധീകരിച്ചിരുന്നത്. ആ വ്യക്തി കേരളത്തിന്റെ മുഖ്യമന്ത്രിയായിരുന്നു, എങ്കില്‍പോലും കേരളത്തിലെ മറ്റ് നിയമസഭാ മണ്ഡലങ്ങളെ എടുത്തു നോക്കിയാല്‍, പുതുപ്പള്ളിയിലെ വികസനം വളരെ പുറകില്‍ ആണെന്നുള്ളത് ജനങ്ങള്‍ ഒന്നടങ്കം പറയുന്ന കാര്യമാണ്. വികസന കാര്യത്തില്‍ പുതുപ്പള്ളി പുറകിലോട്ടാണ് എന്നുള്ള കാര്യം, കോണ്‍ഗ്രസിന് പരമ്പരാഗതമായി വോട്ട് ചെയ്യുന്ന കുടുംബങ്ങള്‍ പോലും സമ്മതിക്കുന്ന കാര്യമാണ്.