രാജ്യത്തിന്റെ പേര് ഭാരത് എന്നാക്കി മാറ്റുന്നതിലെ ചൂടുപിടിച്ച ചര്‍ച്ചയാണ് നടക്കുന്നത്. അതിനിടെ കേരളയുടെ പേര് മാറ്റവും ചര്‍ച്ചയാകുന്നു. രാജ്യത്തിന്റെ പേര് ഭാരത് എന്നുമാത്രമായി മാറ്റിയാല്‍ കേരളത്തിലെ ഔദ്യോഗിക രേഖകളെല്ലാം സംസ്ഥാന സര്‍ക്കാര്‍ തിരുത്തേണ്ടി വരും. കാരണം, സംസ്ഥാന സര്‍ക്കാര്‍ നിലവില്‍ ഔദ്യോഗിക രേഖകളിലെല്ലാം ഇംഗ്ലിഷില്‍ ഉപയോഗിക്കുന്ന പേര് ഇന്ത്യ എന്നാണ്. മലയാളത്തില്‍ ഭാരത റിപ്പബ്ലിക് എന്നും.

മന്ത്രിമാരും മറ്റും സത്യപ്രതിജ്ഞ ചെയ്യുമ്പോള്‍ ഉപയോഗിക്കുന്നത് ഭാരതം എന്നായതിനാല്‍ അതു മാറ്റേണ്ടിവരില്ല. രാജ്യത്തിന്റെ പേരു മാറ്റിയാല്‍ അതു നടപ്പാക്കേണ്ടി വരുന്ന സംസ്ഥാന സര്‍ക്കാരിനു പക്ഷേ, സ്വന്തം സംസ്ഥാനത്തിന്റെ പേര് മാറ്റാന്‍ ഇതുവരെ അനുമതി ലഭിച്ചിട്ടില്ല. കേരള എന്ന പേരു കേരളം എന്നാക്കി മാറ്റണമെന്നാണു സംസ്ഥാന സര്‍ക്കാരിന്റെ ആവശ്യം.

ഈ ആവശ്യവുമായി കഴിഞ്ഞ നിയമസഭാ സമ്മേളനത്തില്‍ പ്രമേയം പാസാക്കിയിരുന്നു. ഭരണഘടനയുടെ മൂന്നാം അനുച്ഛേദത്തിലാണ് സംസ്ഥാനങ്ങളുടെ പേരു മാറ്റുന്നതിനുള്ള നടപടിക്രമങ്ങള്‍ നിര്‍ദേശിച്ചിട്ടുള്ളത്. ലോക്‌സഭയില്‍ ബില്‍ അവതരിപ്പിച്ചു പാസാക്കണം. രാഷ്ട്രപതി ബില്ലില്‍ ഒപ്പുവയ്ക്കുന്നതോടെ നിയമമാകുകയും സംസ്ഥാനത്തിന്റെ പേരു മാറുകയും ചെയ്യും

അതേസമയം ഇന്ത്യ എന്ന പദത്തോട് എന്തിനാണ് ഇത്ര ഭയമെന്ന് മുഖ്യമന്ത്രി പിണറായി വിജയന്‍. രാജ്യത്തിന്റെ ബഹുസ്വരതയെ തകര്‍ക്കാനുള്ള ആവര്‍ത്തിച്ചുള്ള ശ്രമങ്ങളുടെ തുടര്‍ച്ചയാണ് ഇന്ത്യ എന്ന പേര് മാറ്റാനുള്ള കേന്ദ്രസര്‍ക്കാരിന്റെ നീക്കമെന്ന് പിണറായി വിജയന്‍ വിമര്‍ശിച്ചു.

ഭരണഘടനയ്ക്കും രാജ്യത്തിന് തന്നെയും എതിരായ നടപടിയാണ് 'ഇന്ത്യ' എന്ന പദം ഒഴിവാക്കുന്നതിനു പിന്നിലുള്ളത്. രാജ്യത്തിന്റെ പേര് മാറ്റാനുള്ള നടപടികളെ ശക്തമായി ചെറുക്കണമെന്നും മുഖ്യമന്ത്രി ആവശ്യപ്പെട്ടു. ആരോടും ചോദിക്കാതെ എന്തും ചെയ്യാം എന്നതാണ് ആര്‍എസ്എസിന്റെ മനോഭാവം. രാജ്യത്തിന്റെ മത നിരപേക്ഷത ഇല്ലാതാക്കലാണ് അവരുടെ ലക്ഷ്യമെന്നും പിണറായി വിജയന്‍ കുറ്റപ്പെടുത്തി. ഫേസ്ബുക്ക് പോസ്റ്റിലൂടെയാണ് മുഖ്യമന്ത്രിയുടെ വിമര്‍ശനം.

ഭാരത് വിവാദത്തില്‍ പ്രതികരണവുമായി കോണ്‍ഗ്രസ് നേതാവ് രാഹുല്‍ ഗാന്ധിയും രംഗത്തെത്തി. ഭാരതമായാലും ഇന്ത്യയായാലും അര്‍ത്ഥം സ്‌നേഹമെന്നാണെന്ന് രാഹുല്‍ ഗാന്ധി വ്യക്തമാക്കി. ഭാരത് ജോഡോ യാത്രക്കിടെ ജനങ്ങളുമായി ഇടപഴകുന്ന ദൃശ്യങ്ങള്‍ ഫേസ്ബുക്കില്‍ പങ്ക് വച്ചാണ് രാഹുല്‍ ഗാന്ധിയുടെ പ്രതികരണം.

അതേസമയം, ഭാരത് വിവാദത്തിലൂടെ ദേശീയത ഉയര്‍ത്തി വോട്ട് നേടാനുള്ള നീക്കം ശക്തമാക്കുകയാണ് കേന്ദ്ര സര്‍ക്കാര്‍. ജി20 പ്രതിനിധികള്‍ക്ക് നല്‍കിയ കാര്‍ഡുകളിലും ഭാരത് എന്ന് രേഖപ്പെടുത്തി. ഭരണഘടന അംഗീകരിച്ച വാക്ക് ഉപയോഗിക്കുന്നതില്‍ തെറ്റില്ലെന്ന് സര്‍ക്കാര്‍ ന്യായീകരിച്ചപ്പോള്‍ ബിജെപി വിഭജനത്തിന് ശ്രമിക്കുന്നു എന്ന് പ്രതിക്ഷം തിരിച്ചടിച്ചു.

പ്രസിഡന്റ് ഓഫ് ഭാരത്, പ്രൈം മിനിസ്റ്റര്‍ ഓഫ് ഭാരത് ജി 20 ഉച്ചകോടിയുടെ ഔദ്യോഗിക രേഖകളിലെല്ലാം ഭാരത് പ്രയോഗം സര്‍ക്കാര്‍ വ്യാപകമാക്കി കഴിഞ്ഞു. ജി 20 ന്റെ പ്രതിനിധി കാര്‍ഡുകളില്‍ രേഖപ്പെടുത്തിയിരിക്കുന്നത് ഭാരത് ഒഫീഷ്യല്‍സ് എന്നാണ്. കഴിഞ്ഞ ലോക്‌സഭ തെരഞ്ഞെടുപ്പില്‍ പുല്‍വാമ സംഭവം ദേശീയതക്ക് വിഷയമായെങ്കില്‍ ഇതേ വികാരം ഉണര്‍ത്താന്‍ സര്‍ക്കാര്‍ ഇക്കുറി ഭാരതിനെ ആയുധമാക്കുകയാണ്.

പാര്‍ലമെന്റില്‍ ചെങ്കോല്‍ സ്ഥാപിച്ച് ഹിന്ദുത്വ വികാരം ഉണര്‍ത്താന്‍ ശ്രമിച്ചതിന് പിന്നാലെയാണ് ഭാരത് ചര്‍ച്ചയും സജീവമാക്കുന്നത്. മണിപ്പൂര്‍ കലാപം, അദാനി വിഷയം, വിലക്കയറ്റം ഇവയൊക്കെ തിരിച്ചടിയാകുമ്പോള്‍ പുതിയ ചര്‍ച്ച ഉയര്‍ത്തി പ്രതിപക്ഷത്തെ ആശയക്കുഴപ്പത്തിലാക്കുക കൂടിയാണ് സര്‍ക്കാര്‍. ഭാരത് എന്ന പ്രയോഗം നൂറ്റാണ്ടുക്കള്‍ക്ക് മുന്‍പേയുള്ളതാണെന്നും, പ്രതിപക്ഷം ഭരണഘടന വായിച്ച് നോക്കണമെന്നും വിദേശകാര്യമന്ത്രി എസ് ജയ് ശങ്കര്‍ പ്രതികരിച്ചു.