തുണയായത് കെഎസ്ആര്‍ടി സി ജീവനക്കാര്‍... റോഡരികില്‍ ബൈക്ക് മറിഞ്ഞ് തലയ്ക്ക് പരുക്കേറ്റ് രക്തം വാര്‍ന്ന് ഒഴുകിയ നിലയിലായിരുന്ന 69കാരനെ രക്ഷപ്പെടുത്തിയത് കെഎസ് ആര്‍ടിസി ജീവനക്കാര്‍. ചൊവ്വാഴ്ച രാത്രിയില്‍ ഉടുമ്പന്‍ചോലയ്ക്ക് സമീപം ചതുരംഗപ്പാറയില്‍ അപകടത്തില്‍ പെട്ടുകിടന്ന മുണ്ടിയെരുമ സ്വദേശി ചന്ദ്രമോഹനെയാണ് (69) ബസ് ജീവനക്കാര്‍ രക്ഷിച്ചത്.

ഏഴുമണിയോടെ ചതുരംഗപാറയിലെ ഏലത്തോട്ടത്തിന് സമീപമാണ് സംഭവം നടന്നത്. എറണാകുളത്ത് നിന്ന് പൂപ്പാറ വഴി നെടുങ്കണ്ടത്തേക്ക് വന്ന നെടുങ്കണ്ടം ഡിപ്പോയിലെ കെഎസ്ആര്‍ടിസി ഡ്രൈവര്‍ എസ്.റോയ്, കണ്ടക്ടര്‍ രാജന്‍ എന്നിവരാണ് ചന്ദ്രമോഹന് രക്ഷകരായത്.ബൈക്ക് മറിഞ്ഞ് റോഡരികില്‍ കിടന്നിരുന്ന ചന്ദ്രമോഹന്‍ ബസ് ജീവനക്കാരുടെ ശ്രദ്ധയില്‍പ്പെട്ടു.

തലയ്ക്ക് പരുക്കേറ്റ് രക്തം വാര്‍ന്ന് ഒഴുകിയ നിലയിലായിരുന്ന ഇയാളെ, വാഹനങ്ങള്‍ക്ക് കൈ കാണിച്ചു നിര്‍ത്തി ആശുപത്രിയില്‍ കൊണ്ടുപോകുവാനായി ആവശ്യപ്പെട്ടെങ്കിലും ആരും തയ്യാറായില്ല. തുടര്‍ന്ന് നിറയെ ആളുകളുള്ള കെഎസ്ആര്‍ടിസി ബസില്‍ തന്നെ ഉടുമ്പന്‍ചോലയിലെ കുടുംബാരോഗ്യ കേന്ദ്രത്തില്‍ എത്തിച്ചു.

എന്നാല്‍ തലയ്ക്ക് പരുക്കുള്ളതിനാല്‍ ഇവിടെ നിന്ന് ആംബുലന്‍സില്‍ നെടുങ്കണ്ടം താലൂക്ക് ആശുപത്രിയില്‍ എത്തിക്കുകയായിരുന്നു. തുടര്‍ന്ന് ചികിത്സ നല്‍കി ചന്ദ്രമോഹനെ വിട്ടയച്ചതായി ആശുപത്രി അധികൃതര്‍ .