കേരളത്തിന് അനുവദിച്ച രണ്ടാം വന്ദേഭാരത് എക്‌സ്പ്രസ് ട്രെയിന്‍ ഇന്ന് പുലര്‍ച്ചെ 3.31ന് കൊച്ചുവേളി റെയില്‍വേ സ്‌റ്റേഷനില്‍ എത്തി. മെയിന്റനന്‍സിനും മറ്റുമായി വണ്ടി യാര്‍ഡിലേയ്ക്ക് മാറ്റി. തത്ക്കാലം തിരുവനന്തപുരം സ്‌റ്റേഷനിലേക്ക് കൊണ്ടുപോകില്ല.

എട്ടുകോച്ചുകളാണ് ഇപ്പോള്‍ ഉള്ളത്. ഒരു കോച്ച് കൂടി സമീപ ദിവസങ്ങളില്‍ കൊച്ചുവേളിയില്‍ എത്തിക്കും. എന്തെങ്കിലും അടിയന്തിര ആവശ്യം വന്നാല്‍ ഉപയോഗിക്കുന്നതിനായി ഈ അധിക കോച്ച് കൊച്ചുവേളിയില്‍ തന്നെ ഉണ്ടാകും. ഇന്ന് കൊച്ചുവേളിയില്‍ എത്തിയ വന്ദേ ഭാരത് ട്രെയിന്‍ 23 ന് കാസര്‍ഗോഡിന് കൊണ്ടുപോകും. 24ന് അവിടുന്ന് തിരുവനന്തപുരത്തേയ്ക്ക് കന്നി ഓട്ടം നടക്കും.
കഴിഞ്ഞ ദിവസം രാത്രി ചെന്നൈയില്‍ നടത്തിയ ട്രയല്‍ റണ്ണും വിജയമായതോടെയാണ് ട്രെയിന്‍ പാലക്കാട് ഡിവിഷന് കൈമാറാനുളള തീരുമാനമായത്. ഔദ്യോഗിക അറിയിപ്പിന് പിന്നാലെ ഇന്നലെ ഉച്ചകഴിഞ്ഞ് 2.45 ഓടെയാണ് ചെന്നൈ സെന്‍ട്രലില്‍ നിന്ന് വന്ദേഭാരത് കേരളത്തിലേക്ക് പുറപ്പെട്ടത്. രാത്രി 11.30 ന് വണ്ടി പാലക്കാട് എത്തി. പുലര്‍ച്ചെ 2.30 ന് ചേര്‍ത്തല പിന്നിട്ടു.
ഞായറാഴ്ച പ്രധാനമന്ത്രി നരേന്ദ്രമോദി ഇതടക്കം രാജ്യത്തെ വിവിധ റൂട്ടുകളിലായി ഒമ്ബത് വന്ദേഭാരത് സര്‍വീസുകള്‍ വീഡിയോ കോണ്‍ഫറന്‍സിംഗ് വഴി ഉദ്ഘാടനം ചെയ്യും. ടിക്കറ്റ് ബുക്ക് ചെയ്തുള്ള യാത്രാ സര്‍വീസ് ചൊവ്വാഴ്ചയോ ബുധനാഴ്ചയോ തുടങ്ങുമെന്നാണ് സൂചന.
കാസര്‍ഗോഡ് നിന്ന് ആലപ്പുഴ വഴി തിരുവനന്തപുരത്തിനായിരിക്കും രണ്ടാം വന്ദേ ഭാരതിന്റെ സര്‍വീസ്. രാവിലെ ഏഴിന് കാസര്‍ഗോഡ് നിന്ന് പുറപ്പെടുന്ന ട്രെയിന്‍ ഉച്ച കഴിഞ്ഞ് 3.05ന് തിരുവനന്തപുരത്ത് എത്തും. വൈകുന്നേരം 4.05ന് തിരുവനന്തപുരത്ത് നിന്ന് തിരിച്ച് രാത്രി 11.55ന് കാസര്‍ഗോഡ് എത്തുന്ന നിലയിലാകും സര്‍വീസ്. ആഴ്ചയില്‍ ആറ് ദിവസം സര്‍വീസ് ഉണ്ടാകും. കൊല്ലം, ആലപ്പുഴ , എറണാകുളം സൗത്ത് , തൃശൂര്‍, ഷൊര്‍ണൂര്‍, കോഴിക്കോട്, കണ്ണൂര്‍ സ്‌റ്റേഷനുകളില്‍ സ്‌റ്റോപ്പ് ഉണ്ടാകും എന്നാണ് നിലവിലെ അറിയിപ്പ്. സമയ ക്രമത്തില്‍ നേരിയ മാറ്റത്തിനും സാധ്യതയുണ്ട്. ഇക്കാര്യത്തില്‍ ഇന്നോ നാളെയോ വ്യക്തത വരും.