30 പവന്‍ മുക്കുപണ്ടം പണയം വെച്ച് 8.5 ലക്ഷം തട്ടിയ കേസില്‍ പ്രതി എം.ടെക് ബിരുദധാരി അനു (32) വിനെതിരെ സിറ്റി പോലീസ് കുറ്റപത്രം സമര്‍പ്പിച്ചു. തിരുവനന്തപുരം പതിനൊന്നാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിയിലാണ് സിറ്റി വഞ്ചിയൂര്‍ പോലീസ് കുറ്റപത്രം സമര്‍പ്പിച്ചത്. അസ്സല്‍ സ്വര്‍ണം പണയം വച്ച് ആദ്യം വിശ്വാസ്യത നേടിയ ശേഷം മുക്കുപണ്ടം വച്ച് പണം തട്ടുന്നതാണ് പ്രതിയുടെ കുറ്റകൃത്യ രീതി. വെള്ളറട, മംഗലപുരം, വഞ്ചിയൂര്‍, ശ്രീകാര്യം, തുടങ്ങിയ സ്റ്റേഷന്‍ പരിധിയിലും സമാന തട്ടിപ്പ് നടത്തിയെന്ന് കുറ്റപത്രത്തില്‍ പറയുന്നു. 2022 ജനുവരി 18 നാണ് പ്രതി പിടിയിലായത്.


കന്യാകുമാരി ജില്ലയിലെ മാങ്കോട് മഹാദേവക്ഷേത്രത്തിനു സമീപം ആര്‍.എസ് ഭവനില്‍ താമസക്കാരനാണ് പ്രതി അനു. വെള്ളറട പനച്ചമൂടുള്ള സ്വര്‍ണ്ണ പണയ സ്ഥാപനത്തിലും തട്ടിപ്പ് നടത്തി.

വര്‍ഷങ്ങള്‍ കഴിഞ്ഞിട്ടും തിരികെ പണയമെടുക്കാന്‍ വരാത്തതിനെ തുടര്‍ന്ന് സ്ഥാപന അധികൃതര്‍ നടത്തിയ പരിശോധനയിലാണ് മുക്കുപണ്ടമാണെന്ന് കണ്ടെത്തിയത്. വെള്ളറട പൊലീസില്‍ നല്‍കിയ പരാതിയില്‍ അന്വേഷണം നടക്കുന്നതിനിടെ ഇയാളെ സമാന തട്ടിപ്പ് നടത്തിയതിന് വഞ്ചിയൂര്‍ പൊലീസ് പിടികൂടുകയായിരുന്നു. തുടര്‍ന്നാണ് ഇയാള്‍ നടത്തിയ തട്ടിപ്പുകള്‍ പുറത്തായത്.


റിമാന്‍ഡില്‍ കഴിയുകയായിരുന്ന പ്രതിയെ വെള്ളറട പൊലീസ് കസ്റ്റഡിയില്‍ വാങ്ങി തെളിവെടുപ്പിനെത്തിച്ചിരുന്നു.
സംഭവത്തില്‍ ഇയാളുടെ അച്ഛന്‍ രഘുകൃഷ്ണ പിള്ള, സഹോദരി എന്നിവര്‍ക്കെതിരെയും കേസുണ്ട്.