തിരുവല്ലം മേനിലം വീട്ടില്‍ നിന്നും തിരുവല്ലം പോലീസും നര്‍ക്കോട്ടിക് കണ്‍ട്രോള്‍ ബ്യൂറോയും ചേര്‍ന്ന് മയക്കുമരുന്ന് പിടിച്ചെടുത്ത കേസില്‍ തൊണ്ടി മുതലുകളുടെ ഫോറന്‍സിക് ലബോറട്ടറി അപഗ്രഥന റിപ്പോര്‍ട്ട് ഹാജരാക്കാന്‍ തലസ്ഥാന വിചാരണ കോടതി ഉത്തരവിട്ടു. തിരുവനന്തപുരം രണ്ടാം അഡീ. ജില്ലാ സെഷന്‍സ് കോടതിയുടേതാണുത്തരവ്. റിപ്പോര്‍ട്ട് ഹാജരാക്കാന്‍ സംസ്ഥാന ഫോറന്‍സിക് സയന്‍സ് ലബോറട്ടറി ഡയറക്ടറോടാണ് കോടതി ഉത്തരവിട്ടത്.



29 ഗ്രാം എം.ഡി.എം.എ., 72 ഗ്രാം കഞ്ചാവ്, ഹാഷിഷ് ഓയില്‍ എന്നിവ പിടിച്ചെടുത്ത കേസിലാണ് ജഡ്ജി ജി.ഹരീഷിന്റെ ഉത്തരവ്. 2023 ഫെബ്രുവരി 23 ന് രജിസ്റ്റര്‍ ചെയ്ത കേസില്‍ തിരുവല്ലം പോലീസ് ആഗസ്റ്റ് 24 ന് കുറ്റപത്രം സമര്‍പ്പിച്ചിട്ടും ഫോറന്‍സിക് റിപ്പോര്‍ട്ട് കോടതിയില്‍ എത്താത്തതിനെ തുടര്‍ന്നാണ് കോടതി ഉത്തരവ്.



2023 ഫെബ്രുവരി 23 മുതല്‍ തടവറക്കുള്ളില്‍ കഴിയുന്ന പ്രതികളുടെ ജാമ്യഹര്‍ജി ചൊവ്വാഴ്ച (26 ന് ) കോടതി പരിഗണിക്കും.
തിരുവല്ലം മേനിലം മേലേ പാറക്കുന്ന് വീട്ടില്‍ അനൂപ് (27), ശ്രീകണ്‌ഠേശ്വരം കൈതമുക്ക് അത്താണിയില്‍ ആനയറ കടകംപള്ളി റോഡില്‍ ശ്യാമളാലയം വീട്ടില്‍ വിഷ്ണു (29) എന്നിവരാണ് ഒന്നും രണ്ടും പ്രതികള്‍. 2023 ഫെബ്രുവരി 23 നാണ് കേസിനാസ്പദമായ സംഭവം നടന്നത്. പോലീസിനെയടക്കം വിരട്ടാനും വീട്ടില്‍ ആരും കയറാതിരിക്കാനും മുന്തിയ ഇനം വേട്ടപ്പട്ടികളെ വീട്ടില്‍ വളര്‍ത്തിയാണ് മയക്കുമരുന്ന് സൂക്ഷിച്ചത്.


തിരുവല്ലം പൊലീസ് നാര്‍ക്കോട്ടിക് വിഭാഗത്തിന്റെ സഹായത്തോടെയാണ് ഇവരെ അറസ്റ്റ് ചെയ്തത്. കൊച്ചുവേളി, വട്ടിയൂര്‍ക്കാവ് എന്നിവിടങ്ങളില്‍ നിന്ന് മയക്കുമരുന്നുമായി പിടിയിലായവരില്‍ നിന്ന് ലഭിച്ച വിവരങ്ങളുടെ അടിസ്ഥാനത്തില്‍ നടത്തിയ പരിശോധനയിലാണ് പ്രതികള്‍ പിടിയിലായത്.


നാര്‍കോട്ടിക് സെല്‍ എ.സി.പി സുരേഷ്‌കുമാര്‍, തിരുവല്ലം എസ്.എച്ച്.ഒ രാഹുല്‍ രവീന്ദ്രന്‍, എസ്.ഐമാരായ അനൂപ്, മനോജ്, മനോഹരന്‍, ഇ.എസ്.ഐ ഗിരീഷ് ചന്ദ്രന്‍, സീനിയര്‍ സി.പി.ഒ രാജീവ്, ഷിജു, രമ, നാര്‍കോട്ടിക് ടീമിലെ എസ്. .ഐമാരായ യശോധരന്‍, അരുണ്‍കുമാര്‍, ഇ.എസ്.ഐ സാബു, സീനിയര്‍ സി.പി.ഒമാരായ സജികുമാര്‍, വിനോദ്, ലജന്‍, വിനോദ്, രഞ്ചിത്ത്, സി.പി.ഒമാരായ ഷിബു, ദീപുരാജ് എന്നിവരാണ് പ്രതികളെ പിടികൂടിയ സംഘത്തിലുണ്ടായിരുന്നത്.