ഈ ബിഷപ്പുമാര് പൊളിക്കും...കരാട്ടെ മാസ്റ്റര് ബാബു ആന്റണി..പഠിച്ചതെന്തിനെന്ന് അറിയണ്ടേ?
നടന് ബാബു ആന്റണി എന്ന് കേള്ക്കുമ്പോഴേ നല്ല പൊരിഞ്ഞ അടിയുടെ ദൃശ്യങ്ങളായിരിക്കും മലയാളികളുടെ മനസ്സിലേക്ക് വരുക. മാര്ഷല് ആട്സിനെ കുറിച്ച് കൃത്യമായ ധാരണയുള്ള നടനാണ് അദ്ദേഹം. സിനിമയില് വരുന്നതിന് മുമ്പേ കരാട്ടെ അഭ്യാസിയായിരുന്നു താരം. പൂനെ സിംബയോസിസ് ഇന്സ്റ്റിറ്റ്യൂട്ട് ഓഫ് ബിസിനസ് മാനേജ്മെന്റിലാണ് ബാബു ആന്റണി പഠിച്ചത്. അക്കാലത്ത് ചില വൈദികരെ പരിചയപ്പെട്ടു. അവര് വഴിയാണ് പൂനെ പേപ്പല് സെമിനാരിയിലെത്തിയത്. വൈദികര്ക്ക് കരാട്ടെ പഠിച്ചുകൂടെ എന്ന് താരം ചോദിച്ചു. അതെന്തിനാണെന്ന് അവര്. സ്വയരക്ഷക്ക് വേണ്ടി പഠിക്കണമെന്ന് മറുപടി. എന്നാല് പലരും എതിര്ത്തു. അമ്പതോളം വൈദികര് ബാബു ആന്റണിയുടെ ശിഷ്യന്മാരായി. ആഴ്ചയില് രണ്ടോ മൂന്നോ ദിവസമായിരുന്നു പരിശീലനം. ഏതാണ്ട് നാല് കൊല്ലത്തോളം ഇത് തുടര്ന്നു. വൈദികരുമായി നല്ല പോലെ അടുത്തു.
ക്ലാസ് കഴിഞ്ഞാല് വൈദികരുമായി ഏറെ നേരം സംസാരിക്കുമായിരുന്നു. സിനിമ, ഫിലോസഫി അങ്ങനെ പല വിഷയങ്ങളെ കുറിച്ചും ചര്ച്ച ചെയ്യുമായിരുന്നു. എന്നാല് ബാബു ആന്റണിയുടെ പഠനം അവസാനിച്ച് അദ്ദേഹം കേരളത്തിലേക്ക് മടങ്ങിയതോടെ കരാട്ടെ പഠനം പാതിവഴിയിലായി. എന്നാല് ബാബു ആന്റണി അറിയപ്പെടുന്ന സിനിമാ നടനായി മാറി. കുറച്ച് നാള് മുമ്പ് കര്ദിനാള് ബസേലിയോസ് ക്ലിമിസ് കതോലിക്ക ബാവ തിരുവനന്തപുരത്തൊരു അത്താഴവിരുന്നൊരുക്കി. ജോര്ജ് സെബാസ്റ്റിയന് എന്ന സുഹൃത്താണ് ബാബു ആന്റണിയെ അത്താഴവിരുന്നിന് കൂട്ടിക്കൊണ്ട് പോയത്. വളരെ പ്രമുഖരും അല്ലാത്തവരും ചടങ്ങില് സന്നിഹിതരായിരുന്നു. ബാബു ആന്റണിയെ അടുത്തിരുത്തി കര്ദ്ദിനാളൊരു വെടിപൊട്ടിച്ചു ' ഈ ഇരിക്കുന്ന മനുഷ്യന് എന്റെ ഗുരുവാണ്' അത് കേട്ട് ബാബു ആന്റണി ഞെട്ടിപ്പോയി.
സദസ്സിലുള്ളവരുടെ കാര്യം പിന്നെ പ്രത്യേകിച്ച് പറയേണ്ടതില്ലല്ലോ. പണ്ട് പൂനെ സെമിനാരിയില് വെച്ച് ബാബു ആന്റണി കരാട്ടെ പരിശീലിപ്പിച്ചതും പുഷ് അപ്പ്, തവളച്ചാട്ടം തുടങ്ങിയ ശിക്ഷ നല്കിയതും അദ്ദേഹം വള്ളിപുള്ളി തെറ്റാതെ പറഞ്ഞു. അത് കേട്ട് സദസ്സ് അത്ഭുതപ്പെട്ടു. ബാബു ആന്റണിയുടെ കാര്യം പറയേണ്ടതില്ലല്ലോ. കണ്ണൂര് ബിഷപ് അലക്സ് വടക്കുംതല, മലങ്കര കതോലിക്കാ സഭ പാറശാല ബിഷപ് തോമസ് മാര് യൗസേബിയോസ്, തിരുവല്ല ആര്ച്ച് ബിഷപ് തോമസ് മാര് കുറിലോസ്, സിരോ മലബാര് സഭ മാണ്ഡ്യ ബിഷപ് മാര് സെബാസ്റ്റ്യന് എടയന്ത്രത്ത്, മിഷനറീസ് ഓഫ് സെന്റ് ഫ്രാന്സിസ് ഡീസേല്സ് സുപ്പീരിയര് ജനറല് ഡോ. എബ്രഹാം വെട്ടുവേലില് എന്നിവരും ശില്യന്മാരായിരുന്നു. ഇവരെക്കൂടാതെ മറ്റ് രണ്ട് ബിഷപ്പുമാരും ശിഷ്യന്മാരാണെന്നും അവരെക്കൂടി കണ്ടെത്തണമെന്നും ബാബു ആന്റണി ഫേസ്ബുക്കില് കുറിച്ചു.
ബിഷപ്പുമാരെല്ലാം ഗുരുവിന്റെ സിനിമകള് കാണാറുണ്ട്. പാലാരിവട്ടത്ത് കെ.സിബിസി നാടകമേളയ്ക്ക് എത്തിയപ്പോള് ബാബു ആന്റണി പാറശാല ബിഷപ് മാര് യൊസേബിയോസ്, കണ്ണൂര് ബിഷപ് അലക്സ് വടക്കുംഥല, കര്ദിനാള് മാര്ക്ലീമിസ് കതോലിക്കബാബ എന്നിവരെ സന്ദര്ശിച്ചിരുന്നു. അതിന്റെ ചിത്രവും സമൂഹമാധ്യമങ്ങളില് പങ്കുവച്ചിരുന്നു. നല്ലൊരു വിശ്വാസികൂടിയാണ് ബാബു ആന്റണി. അദ്ദേഹത്തിന് ആയോധനകലയിലുള്ള മികവ് കണ്ടിട്ടാണ് സംവിധായകന് ഭരതന് ചിലമ്പ് എന്ന സിനിമയിലേക്ക് ക്ഷണിച്ചത്. ബാബു ആന്റണിയിലെ നടനെ വൈവിധ്യമായി ഉപയോഗിച്ച സംവിധായകനും ഭരതന് തന്നെ. വൈശാലിയിലെ ലോമപാദ രാജാവായി നമുക്കാര്ക്കെങ്കിലും ബാബു ആന്റണിയെ സങ്കല്പ്പിക്കാന് സാധിക്കുമായിരുന്നോ. ഭരതന് അതിന് കഴിഞ്ഞു. മറ്റൊരു നടനെ വെച്ച് ചെയ്യാനിരുന്ന വേഷമായിരുന്നു. ഒരു ദിവസം ഭരതന് ബാബു ആന്റണിയെ വിളിച്ചിട്ട് നാളെ മൈസൂരില് ഷൂട്ട് നടക്കുന്നിടത്തേക്ക് വരണമെന്നും രാജാവിന്റെ അംഗരക്ഷകന്റെ വേഷമുണ്ടെന്നും പറഞ്ഞു. ബാബു ആന്റണി തന്റെ കാറില് പൊന്കുന്നത്തെ വീട്ടില് നിന്ന് മൈസൂരിലേക്ക് പോയി. അവിടെ ചെന്നിറങ്ങിയപ്പോ പ്രൊഡക്ഷന് കണ്ട്രോളര് പറഞ്ഞു, കോളടിച്ചല്ലോ- എന്താണ് കാര്യമെന്ന് പിടികിട്ടിയില്ല. കുറച്ച് കഴിഞ്ഞ് ഭരതന് വന്നിട്ട് ആ രാജാവിന്റെ വേഷം ഇട്ട് വരാന് പറഞ്ഞു. താരത്തിനൊന്നും മനസ്സിലായില്ല. ഭരതേട്ടാ അംഗരക്ഷകനല്ലേ..., ഞാന് പറേന്നത് നീയങ്ങ് കേട്ടാമതി എന്ന് ഭരതന് പറഞ്ഞപ്പോള് അനുസരിക്കാതെ മറ്റ് മാര്ഗമില്ലാതായി. അങ്ങനെ ബാബുആന്റണി ലോമപാദ രാജാവായി. വില്ലനായി മാത്രം തിളങ്ങി നിന്ന ബാബു ആന്റണി ഉപ്പുകണ്ടം ബ്രദേഴ്സ് എന്ന സിനിമയിലൂടെ താരമായി. പിന്നീടിങ്ങോട്ട് ബാബു ആന്റണി നായകനായ നിരവധി സിനിമകളുണ്ടായി. മമ്മൂട്ടിയും മോഹന്ലാലും വാണിരുന്ന മലയാളസിനിമയില് ബാബു ആന്റണിക്കും താരത്തിളക്കം കിട്ടി. പത്തോളം സിനിമകള് അടുപ്പിച്ച് ഹിറ്റായി. പിന്നീട് ഇറങ്ങിയ പല സിനിമകളും ഒരേ അച്ചില് വാര്ത്തത് പോലെയായി. അതോടെ നായകനായ സിനിമകള് കുറഞ്ഞു. നടി ചാര്മിളയുമായുള്ള പ്രണയം ഗോസിപ്പ് കോളങ്ങളില് നിറയുകയും ഇരുവരും പിരിഞ്ഞെന്ന് ചാര്മിള പിന്നീട് പറയുകയും ചെയ്തിരുന്നു. സിനിമകള് കുറഞ്ഞപ്പോള് ബാബു ആന്റണി, അമേരിക്കയിലുള്ള സഹോദരന് തമ്പി ആന്റണിയുടെ അടുത്തേക്ക് പോയി. തമ്പി ആന്റണി പിന്നീട് അറിയപ്പെടുന്ന നിര്മാതാവും നടനുമായി. അമേരിക്കയില് വെച്ചാണ് ബാബു ആന്റണി തന്റെ ജീവിത സഖിയെ കണ്ടുമുട്ടിയത്. വിവാഹശേഷം പൊന്കുന്നത്തും അമേരിക്കയിലും കഴിയുകയാണ് ബാബു ആന്റണി. ഇതിനിടെ നിരവധി സിനിമകളില് ചെറുതും വലുതുമായ നിരവധി വേഷങ്ങള് ചെയ്തു. മമ്മൂട്ടിയുടെ ബ്ലാക്കിലെ പോലീസ് ഓഫീസര്, യുഗപുരുഷനിലെ അയ്യന്കാളി, സലിംകുമാര് സംവിധാനം ചെയ്ത സിനിമയിലെ കഥാപാത്രം എന്നിവ പ്രേക്ഷകശ്രദ്ധനേടി. തമിഴിലും മറ്റും ഇതിനോടൊപ്പം അഭിനയിച്ചു. അടുത്തിടെ ഇരങ്ങിയ മദനോത്സവം, ആര്.ഡി.എക്സ് എന്നീ സിനിമകളിലെ വേഷം ബാബു ആന്റണിയെ വീണ്ടും ശ്രദ്ധേയനാക്കി. അങ്ങനെ സിനിമയിലെ രണ്ടാമൂഴത്തില് തിളങ്ങി നില്ക്കുമ്പോഴാണ് പഴയ ശിഷ്യന്മാര് ബിഷപ്പുമാരാണെന്ന സന്തോഷം ബാബു ആന്റണിയെ തേടിയെത്തിയത്.
https://www.facebook.com/Malayalivartha
