കാലം മാറിയ മഴ... അറബിക്കടലില് കൊങ്കണ് ഗോവ തീരത്തും വടക്കു കിഴക്കന് ബംഗാള് ഉള്ക്കടലിലും ഇരട്ട ന്യൂനമര്ദ്ദങ്ങള് രൂപപ്പെട്ടതോടെ സംസ്ഥാനത്ത് മഴ കനത്തു; തിങ്കള് വരെ വ്യാപക മഴ, ഇന്ന് 10 ജില്ലകളില് യെല്ലോ അലര്ട്ട്; സംസ്ഥാനത്ത് ഇന്നും മഴ ശക്തമാകും; മത്സ്യബന്ധനത്തിന് വിലക്ക്
വീണ്ടും സംസ്ഥാനത്ത് ശക്തമായ തുടര്ച്ചയായ മഴ പെയ്യുകയാണ്. അറബിക്കടലില് കൊങ്കണ്ഗോവ തീരത്തും വടക്കു കിഴക്കന് ബംഗാള് ഉള്ക്കടലിലും ന്യൂനമര്ദ്ദങ്ങള് രൂപപ്പെട്ടതോടെ സംസ്ഥാനത്ത് മഴ കനത്തു. തിങ്കളാഴ്ചവരെ ഇടിമിന്നലോടുകൂടിയ വ്യാപക മഴയ്ക്ക് സാദ്ധ്യത. മലയോരമേഖലകളില് ജാഗ്രതാനിര്ദ്ദേശം.
തിരുവനന്തപുരത്ത് മലയോര മേഖലയില് യാത്രാനിരോധനം ഏര്പ്പെടുത്തി. ഇന്ന് തിരുവനന്തപുരം, കൊല്ലം, പത്തനംതിട്ട, കോട്ടയം ഒഴികെയുള്ള ജില്ലകളില് യെല്ലോ അലര്ട്ട്. തിരുവനന്തപുരം, കോട്ടയം, ആലപ്പുഴയിലടക്കം ഇന്നലെ രാവിലെ മുതല് കനത്ത മഴയായിരുന്നു. ഏറ്റവുമധികം മഴ ലഭിച്ചത് ചേര്ത്തലയില്. 150.5 മില്ലി മീറ്റര്. അരൂക്കുറ്റിയില് 148.4, കോട്ടയം 138.6. തിരുവനന്തപുരത്ത് 105 മി.മീറ്റര്.
ഏറ്റവും കുറവ് കാസര്കോട്ടെ ഹോസ്ദുര്ഗില്. 55 മി.മീറ്റര്. മദ്ധ്യ,തെക്കന് കേരളത്തിലാണ് മഴ സജീവം. തെക്കന് തമിഴ്നാട് തീരം, ഗള്ഫ് ഓഫ് മന്നാര്, അതിനോട് ചേര്ന്ന കന്യാകുമാരി തീരം, മദ്ധ്യ കിഴക്കന് അറബിക്കടല്, തെക്കന്, മദ്ധ്യ, വടക്കന് ബംഗാള് ഉള്ക്കടല്, വടക്കന് ആന്ഡമാന് കടല് എന്നിവിടങ്ങളില് മണിക്കൂറില് 65 കിലോമീറ്റര്വരെ വേഗതയില് ശക്തമായ കാറ്റിനും സാദ്ധ്യത. ഇവിടങ്ങളില് മത്സ്യബന്ധനത്തിന് വിലക്കുണ്ട്.
ഇന്നും വ്യാപക മഴ തുടരും. ഒറ്റപ്പെട്ടയിടങ്ങളില് ശക്തമായ മഴ പ്രതീക്ഷിക്കാം. 10 ജില്ലകളില് യെല്ലോ അലര്ട്ടാണ്. ആലപ്പുഴയിലും എറണാകുളം മുതല് കാസര്കോട് വരെയുള്ള ജില്ലകളിലുമാണ് യെല്ലോ അലര്ട്ട്. കേരള, കര്ണാടക, ലക്ഷ്വദ്വീപ് തീരങ്ങളില് മത്സ്യബന്ധനത്തിന് വിലക്ക് തുടരുകയാണ്. അറബിക്കടലിലും ബംഗാള് ഉള്ക്കടലിലും നിലനില്ക്കുന്ന ന്യൂനമര്ദ്ദങ്ങളുടെ സ്വാധീനഫലമായാണ് മഴ തുടരുന്നത്. അടുത്ത മണിക്കൂറുകളില് ഈ ന്യൂനമര്ദങ്ങള് കൂടുതല് ശക്തി പ്രാപിക്കും. വരും ദിവസങ്ങളിലും മഴ പ്രതീക്ഷിക്കാം.
കനത്ത മഴ തുടരുന്ന സാഹചര്യത്തില് തിരുവനന്തപുരം ജില്ലയില് ക്വാറിയിങ്, മൈനിങ് പ്രവര്ത്തനങ്ങളും മലയോര, കായലോര, കടലോര മേഖലയിലേക്കുള്ള അവശ്യ സര്വീസുകള് ഒഴികെയുള്ള ഗതാഗതവും വിനോദ സഞ്ചാരവും നിരോധിച്ചു. ഇനിയൊരു അറിയിപ്പുണ്ടാകുന്നതുവരെ നിരോധനം തുടരുമെന്ന് തിരുവനന്തപുരം ജില്ലാ കളക്ടര് ജെറോമിക് ജോര്ജ് അറിയിച്ചു. ജില്ലയില് അതിശക്തമായ മഴ തുടരുന്നതിനാലും വെള്ളിയാഴ്ച ഓറഞ്ച് അലര്ട്ട് പ്രഖ്യാപിച്ച സാഹചര്യത്തിലുമാണ് നിരോധനം.
അറബിക്കടലിലും ബംഗാള് ഉള്ക്കടലിലും ന്യൂന മര്ദ്ദം രൂപപ്പെട്ടതോടെ സംസ്ഥാനത്ത് മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. മധ്യ കിഴക്കന് അറബിക്കടലില് കൊങ്കണ് - ഗോവ തീരത്തിന് സമീപത്തായാണ് ന്യൂന മര്ദ്ദം രൂപപ്പെട്ടിരിക്കുന്നത്. കേരളത്തില് അടുത്ത അഞ്ച് ദിവസം മിതമായ / ഇടത്തരം മഴ / ഇടി / മിന്നല് എന്നിവ തുടരാന് സാധ്യതയുണ്ട്. സെപ്റ്റംബര് 29 മുതല് ഒക്ടോബര് ഒന്ന് വരെ ഒറ്റപ്പെട്ട ശക്തമായ മഴക്കും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു.
സംസ്ഥാനത്ത് ശക്തമായ മഴ തുടരുന്ന സാഹചര്യത്തില് ആരോഗ്യ വകുപ്പ് ജാഗ്രതാ നിര്ദേശം നല്കിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. പകര്ച്ച പനികള് തുടരുന്ന സാഹചര്യത്തില് പ്രത്യേകം ശ്രദ്ധിക്കണം. ആശുപത്രികള്ക്കും ജാഗ്രതാ നിര്ദേശം നല്കിയിട്ടുണ്ട്. വെള്ളം കയറുന്ന ആരോഗ്യ സ്ഥാപനങ്ങള് ആവശ്യമായ ബദല് ക്രമീകരണം ഒരുക്കണം. മരുന്നുകളുടെ ലഭ്യത ഉറപ്പാക്കാന് നിര്ദേശം നല്കിയിട്ടുണ്ട്. ആലപ്പുഴ കുട്ടനാട് അടിയന്തിര സാഹചര്യം നേരിടുന്നതിന് വെള്ളത്തില് സഞ്ചരിക്കുന്ന 3 മൊബൈല് ഫ്ളോട്ടിംഗ് ഡിസ്പെന്സറികള്, വാട്ടര് ആംബുലന്സ് എന്നിവ സജ്ജമാക്കിയിട്ടുണ്ട്.
മഴ തുടരുന്നതിനാല് ഡെങ്കിപ്പനിയ്ക്കും എലിപ്പനിയ്ക്കും സാധ്യതയുണ്ട്. കൊതുകുകടി ഏല്ക്കാതിരിക്കാന് ശ്രദ്ധിക്കണം. കൊതുകിന്റെ ഉറവിടങ്ങള് നശിപ്പിക്കാനുള്ള നടപടി സ്വീകരിക്കണം. എലിപ്പനി പ്രതിരോധം പ്രധാനമാണ്. ചെളിയിലോ മലിന ജലത്തിലോ കെട്ടിക്കിടക്കുന്ന മഴവെള്ളത്തിലോ ഇറങ്ങിയാല് നിര്ബന്ധമായും എലിപ്പനി പ്രതിരോധ ഗുളികയായ ഡോക്സിസൈക്ലിന് കഴിക്കേണ്ടതാണ്. വയറിളക്ക രോഗങ്ങള്ക്കെതിരെ ജാഗ്രത പാലിക്കണം. തിളപ്പിച്ചാറ്റിയ വെള്ളം മാത്രമേ കുടിക്കാന് പാടുള്ളൂ. ആഹാരവും വെള്ളവും അടച്ച് സൂക്ഷിക്കണം. ദുരിതാശ്വാസ ക്യാമ്പുകളിലുള്ളവര് മാസ്ക് ധരിക്കുന്നതാണ് അഭികാമ്യം. പനി ബാധിച്ചാല് സ്വയം ചികിത്സ പാടില്ല. എത്രയും വേഗം ചികിത്സ തേടണം.
"
https://www.facebook.com/Malayalivartha
