ആറാം ക്ലാസ്സുകാരിക്ക് നേരെ ക്ലാസ്സ്മുറിയില്‍ വച്ച് തെരുവനായയുടെ ആക്രമണം. മണ്ണാര്‍ക്കാട് കോട്ടോപാടത്ത് കല്ലടി അബ്ദുഹാജി ഹൈസ്‌കൂളിലാണ് ക്ലാസ് മുറിയില്‍ തെരുവനായയുടെ ആക്രമണം ഉണ്ടായത്. ആറാം ക്ലാസ് വിദ്യാര്‍ഥിനിയായ കോട്ടോപാടം സ്വദേശിനി മെഹ്റയ്ക്കാണ് ക്ലാസ് നടക്കുന്നതിനിടെ കടിയേറ്റത്. മെഹ്‌റയുടെ ഇടുപ്പിനാണ് നായയുടെ കടിയേറ്റത്.

പേപ്പട്ടിയാണ് ആക്രമിച്ചതെന്നാണ് വിവരം. തിങ്കളാഴ്ച രാവിലെ 10.30-ന് സ്‌കൂളില്‍ ആദ്യ പിരീഡ് നടക്കുന്നതിനിടെയാണ് സംഭവമുണ്ടായത്. ക്ലാസ് മുറിയിലേക്ക് ഓടിക്കയറിയ നായ മുന്‍സീറ്റിലിരുന്ന മെഹ്റയെ കടിക്കുകയായിരുന്നു. അധ്യാപികയുടെ ഇടപെടല്‍ കാരണമാണ് കൂടുതല്‍ പരിക്കുകളില്ലാതെ കുട്ടി രക്ഷപ്പെട്ടത്. ജില്ലാ ആശുപത്രിയില്‍ ചികിത്സയിലുള്ള മെഹ്റ നിരീക്ഷണത്തില്‍ തുടരുകയാണ്.

സ്‌കൂള്‍ പരിസരത്ത് കഴിഞ്ഞ രണ്ടാഴ്ചയോളമായി നായയുടെ ശല്യമുണ്ടെന്ന് കുട്ടിയുടെ പിതാവ് പറഞ്ഞു. പേപിടിച്ച ഒരു നായ ഓടിനടക്കുന്നതായി വാര്‍ത്ത പരന്നതോടെ പ്രദേശത്ത് പരിഭ്രാന്തി പരന്നിരുന്നു. അതുകൊണ്ട് സാധാരണ നടന്ന് സ്‌കൂളില്‍ പോകുന്ന മകളെ കാറിലാണ് ഇന്ന് സ്‌കൂളില്‍ കൊണ്ടുവിട്ടതെന്നും പിതാവ് പറഞ്ഞു. മെഹ്റയെ കൂടാതെ സമീപവാസികളായ നാലുപേരെകൂടി പട്ടി കടിച്ചിട്ടുണ്ടെന്നാണ് വിവരം.