സ്വാഭാവിക റബ്ബര്‍ ഇറക്കുമതിക്ക് കേന്ദ്ര സര്‍ക്കാര്‍ ഏര്‍പ്പെടുത്തിയ താല്‍ക്കാലിക നിരോധനം നീട്ടും. നിരോധന കാലയലവ് ഒരുവര്‍ഷത്തേക്ക് നീട്ടാന്‍ കേന്ദ്ര സര്‍ക്കാര്‍ തത്ത്വത്തില്‍ സമ്മതിച്ചതായി ജോസ് കെ മാണി ദില്ലിയില്‍ പറഞ്ഞു. കേന്ദ്രമന്ത്രി ജെ.പി നഢ്ഡ ഈ മെയില്‍ അയച്ച് ക്ഷണിച്ചതിന്റെ അടിസ്ഥാനത്തിലാണ് കേന്ദ്ര വാണിജ്യ മന്ത്രി നിര്‍മ്മല സീതാരാമനുമായി ജോസ് കെ മാണി എം.പി ചര്‍ച്ച നടത്തിയത്. അടുത്ത കേന്ദ്ര ബജറ്റില്‍ റബ്ബര്‍ മേഖലക്കായി 1000 കോടി രൂപയുടെ പ്രത്യേക പാക്കേജ് ഉണ്ടാകുമെന്നാണ് സൂചന. സംസ്ഥാന സര്‍ക്കാരിനെ അറിയിക്കാതെയാണ് കേന്ദ്ര സര്‍ക്കാര്‍ ജോസ് കെ മാണിയെ ചര്‍ച്ചക്ക് വിളിച്ചത്. ജോസ് കെ മാണി റബ്ബര്‍ കര്‍ഷകര്‍ക്കായി നടത്തിയ സമരത്തെ തുടര്‍ന്നായിരുന്നു ക്ഷണം.
നിലവിലെ വിജ്ഞാപന പ്രകാരം സ്വാഭാവിക റബ്ബറിന്റെ ഇറക്കുമതിക്ക് മാര്‍ച്ച് 31 വരെയാണ് നിരോധനം. റബ്ബറിന്റെ ഇറക്കുമതിക്കുള്ള നിരോധനം സ്ഥിരമാക്കണമെന്ന് കേന്ദ്രമന്ത്രിയോട് ആവശ്യപ്പെട്ടതായി ജോസ് കെ മാണി പറഞ്ഞു. ഇതോടെ സ്വാഭാവിക റബ്ബറിന്റെ വില വര്‍ദ്ധിക്കും. സര്‍ക്കാരിന്റെ താങ്ങ് വില സഹായമില്ലാതെ തന്നെ കര്‍ഷകന് പിടിച്ച് നില്‍ക്കാനും സാധിക്കും. റബ്ബര്‍ കര്‍ഷകരുടെ പ്രതിനിധിയായി ജോസ് കെ മാണിയെ കേന്ദ്ര സര്‍ക്കാര്‍ അംഗികരിച്ചതിന്റെ ഫലമാണ് ചര്‍ച്ചയിലുണ്ടായതെന്ന് കേരള കോണ്‍ഗ്രസ് നേതാക്കള്‍ പ്രതികരിച്ചു.
അതേസമയം, ബി.ജെ.പി അദ്ധ്യക്ഷന്‍ അമിത് ഷായുമായുള്ള കൂടിക്കാഴ്ച്ച നടത്താന്‍ കേരള കോണ്‍ഗ്രസ് എം ഔദ്യോഗികമായി തീരുമാനിച്ചിട്ടില്ലെന്ന് ജോസ് കെ മാണി വ്യക്തമാക്കി. എന്നാല്‍ കൂടിക്കാഴ്ച്ച നടത്തുന്നതില്‍ തെറ്റില്ല. യു.പി.എ ഭരണകാലത്ത് കര്‍ഷകര്‍ക്കെതിരായ നിലപാടുകളുണ്ടായിരുന്നു. എന്നാല്‍ ഇപ്പോഴത്തെ സര്‍ക്കാര്‍ കാര്യങ്ങള്‍ മനസിലാക്കാന്‍ ശ്രമിക്കുന്നുണ്ടെന്ന് അദ്ദേഹം പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha