രക്ഷകരായത് കേരള ഫയര്‍ഫോഴ്‌സ്... രാത്രിയില്‍ നടക്കാനിറങ്ങിയ തമിഴ്‌നാട് സ്വദേശി വീണത് 30 അടിയുള്ള കുഴിയില്‍... തമിഴ്‌നാട് സ്വദേശിക്ക് രക്ഷകരായി കേരള ഫയര്‍ഫോഴ്‌സ്. റസ്റ്റോറന്റിനോടനുബന്ധിച്ചു മാലിന്യങ്ങള്‍ ഇടാനായെടുത്ത കുഴിയിലാണ് യുവാവ് വീണത്.

വിഴിഞ്ഞത്തിന് സമീപത്ത് മുക്കോലയിലാണ് റസ്റ്റോറന്റിനായെടുത്ത കുഴിയില്‍ യുവാവ് വീണത്. റസ്റ്റോറന്റിന് സമീപത്തെ പച്ചക്കറി കടയിലെ ജീവനക്കാരനായ തമിഴ്‌നാട് സ്വദേശി വീരസിംഹം (35) ആണ് കാല്‍ തെറ്റി കുഴിയിലേക്ക് വീണത്. യുവാവിനെ വിഴിഞ്ഞം ഫയര്‍ഫോഴ്‌സസാണ് രക്ഷപ്പെടുത്തിയത്.

വെളിച്ചക്കുറവുണ്ടായിരുന്ന പ്രദേശത്തായിരുന്നു 30 അടിയോളം താഴ്ചയുള്ള മൂടിയില്ലാത്ത കുഴിയുണ്ടായിരുന്നത്. രാത്രിയില്‍ കുഴിക്കു സമീപത്തുകൂടി നടന്നു പോകുമ്പോള്‍ കാലുതെറ്റി കുഴിയില്‍ വീരസിംഹം അകപ്പെടുകയായിരുന്നുവെന്നെന്നാണ് ഫയര്‍ ഫോഴ്‌സ് അധികൃതര്‍ പറയുന്നത്. യുവാവിന്റെ നിലവിളി കേട്ടതിനെ തുടര്‍ന്ന് നാട്ടുകാരെത്തി ഫയര്‍ ഫോഴ്‌സിനെ വിവരമറിയിക്കുകയായിരുന്നു. ഫയര്‍ഫോഴ്‌സ് ജിഎസ്എടിഒ ജസ്റ്റിന്റെ നേതൃത്വത്തില്‍ ഫയര്‍ ആന്‍ഡ് റസ്‌ക്യൂ ഓഫിസര്‍ പ്രദീപ് കുഴിയില്‍ ഇറങ്ങി വല,കയര്‍ എന്നിവയുടെ സഹായത്തോടെ യുവാവിനെ മുകളിലെത്തിക്കുകയായിരുന്നു.കാലിന് പരുക്കേറ്റ വീരസിംഹനെ ആശുപ്രതിയിലേക്ക് മാറ്റി.