റീല്സ് ചിത്രീകരണത്തിനിടെ യുവാവിന്റെ മരണം; ആഡംബരക്കാറിന്റെ ഉടമയെ കണ്ടെത്തി പോലീസ്
റീല്സ് ചിത്രീകരണത്തിനിടെ ആഡംബരക്കാറിടിച്ച് യുവാവ് മരിച്ച സംഭവത്തിലെ വാഹനത്തിന്റെ യഥാര്ഥ ഉടമയെ കണ്ടെത്തി പോലീസ്. ഒരു മാസം നീണ്ട അന്വേഷണത്തിനൊടുവിലാണ് പോലീസ് യഥാര്ഥ ഉടമയെ കണ്ടെത്തിയത്.
കോഴിക്കോട് കടലുണ്ടി സ്വദേശി എ.കെ.നൗഫലിന്റെ ഉടമസ്ഥതയിലാണ് കാര് എന്നാണ് ഒടുവില് കണ്ടെത്തിയത്. നൗഫലിന്റെ ഭാര്യയുടെ അക്കൗണ്ട് വഴിയാണ് പണമിടപാടുകള് നടത്തിയത്. നിയമവിരുദ്ധമായി വാഹനം എത്തിച്ച് സംസ്ഥാനത്ത് ഉപയോഗിച്ചതിനാല് നൗഫല് കേസിലെ മൂന്നാം പ്രതിയാകുമെന്നും പോലീസ് അറിയിച്ചു.
കഴിഞ്ഞയാഴ്ച ഹൈദരാബാദ്, ഡല്ഹി എന്നിവിടങ്ങളിലെത്തി മൂന്നംഗ അന്വേഷണസംഘം വിവരം ശേഖരിച്ചിരുന്നു. ഹൈദരാബാദ് സ്വദേശി അശ്വിന് ജെയിന്റെ ഉടമസ്ഥതയിലാണ് കാര് എന്നാണ് ആദ്യം വിവരം ലഭിച്ചത്. ആഡംബര കാറുകള് വാങ്ങുകയും വില്ക്കുകയും ചെയ്യുന്ന കമ്പനിയുടേതായിരുന്നു കാര്. എന്നാല് ഈ കാര് ഡല്ഹിയിലെ കമ്പനിക്ക് വിറ്റു. ഡല്ഹിയിലെ കമ്പനിയില് നിന്നാണ് നൗഫല് വാങ്ങിയത്.
കേസിലെ ഒന്നാം പ്രതിയായ മലപ്പുറം സ്വദേശി സാബിദിന്റെ സുഹൃത്താണ് നൗഫല്. ബീച്ച് റോഡില് മത്സരയോട്ടം ചിത്രീകരിക്കുന്നതിനിടെയാണ് വടകര കടമേരി തച്ചിലേരി താഴെകുനി സുരേഷിന്റെയും ബിന്ദുവിന്റെയും മകന് ആല്വിന് കാറിടിച്ച് മരിച്ചത്.
https://www.facebook.com/Malayalivartha
