ട്രെയിന്‍ വൈകി യാത്രക്കാര്‍ വലഞ്ഞു.... കനത്ത മഴയില്‍ പലയിടത്തും ട്രാക്കില്‍ മരം വീണതിനെ തുടര്‍ന്ന് ട്രെയിന്‍ ഗതാഗതം താറുമാറായി. തിരുവല്ല-ചങ്ങനാശേരി പാതയിലും, തൃശൂര്‍-ഗുരുവായൂര്‍ പാതയിലും, തിരുവനന്തപുരം-ഇടവ പാതയിലുമടക്കമാണ് മരങ്ങള്‍ കടപുഴകിയത്. ഈ റൂട്ടിലൂടെയുള്ള ട്രെയിന്‍ സര്‍വീസുകള്‍ മണിക്കൂറുകളോളം വൈകിയത് യാത്രക്കാരെ വലച്ചു.

ഇന്നലെ രാവിലെ 9.30ന് എറണാകുളം പുല്ലേപ്പടി റെയില്‍വേ മേല്‍പ്പാലത്തിന് സമീപം ട്രാക്കില്‍ മരം വീണതിനെത്തുടര്‍ന്ന് തിരുവനന്തപുരം-കോഴിക്കോട് ജനശതാബ്ദി, തിരുവനന്തപുരം-ഷൊര്‍ണ്ണൂര്‍ വേണാട് എക്‌സ്പ്രസ് ട്രെയിനുകള്‍ വൈകി.

ഇന്നലെ രാവിലെ 6.45ന് കണ്ണൂരില്‍ എടക്കാടിനും സൗത്ത് റെയില്‍വേ സ്റ്റേഷനും ഇടയില്‍ ട്രാക്കിലെ വൈദുതി ലൈനിന് മുകളില്‍ മരം പൊട്ടി വീണ് ട്രെയിന്‍ ഗതാഗതം തടസപ്പെട്ടു.

കാസര്‍കോട് ഭാഗത്തേക്കുള്ള മലബാര്‍ എക്‌സ്പ്രസ് കടന്നുപോയ ഉടനെയായിരുന്നു സംഭവം.ഇന്നലെ രാവിലെ 6.30ഓടെ പൂങ്കുന്നം-ഗുരുവായൂര്‍ ലൈനിലാണ് ആദ്യം മരം വീണത്. മണിക്കൂറുകള്‍ എടുത്താണ് മരം മുറിച്ചുമാറ്റിയത്. ഇതോടെ ഗുരുവായൂര്‍ മധുര എക്‌സ്പ്രസ്, ഗുരുവായൂര്‍-എറണാകുളം സൗത്ത് പാസഞ്ചര്‍, ചെന്നൈ എഗ്മൂര്‍ ഗുരുവായൂര്‍ എക്‌സ്പ്രസ്, എറണാകുളം സൗത്ത്-ഗുരുവായൂര്‍ പാസഞ്ചര്‍ എന്നിവ വൈകി.രാവിലെ 10.10ന് തിരുവല്ല റെയില്‍വേ സ്റ്റേഷനു സമീപം ഓടിക്കൊണ്ടിരുന്ന ട്രെയിനിനു മുന്നില്‍ തേക്ക് മരം വീണു. തലനാരിഴയ്ക്കാണ് വന്‍ ദുരന്തം വഴിമാറിയത്.


വേളാങ്കണ്ണി-എറണാകുളം എക്‌സ്പ്രസ് ട്രെയിനിനു മുന്‍പിലേക്കാണ് മരം വീണത്. ട്രെയിന്‍ നിര്‍ത്തിയിട്ട ശേഷം മരം മുറിച്ചു മാറ്റി. തിരുവനന്തപുരത്ത് ഇടവയ്ക്കും കാപ്പിലിനും ഇടയില്‍ രാവിലെ 11.30 ഓടെയാണ് തെങ്ങ് ട്രാക്കില്‍ വീണത്.