ആദ്യ അലോട്ട്‌മെന്റ് പ്രകാരമുള്ള പ്ലസ് വണ്‍ വിദ്യാര്‍ഥി പ്രവേശനം ഇന്ന് വൈകീട്ട് അഞ്ചിന് അവസാനിക്കും. അലോട്ട്‌മെന്റ് ലഭിച്ചിട്ടും സ്ഥിര പ്രവേശനമോ താല്‍ക്കാലിക പ്രവേശനമോ നേടാത്തവര്‍ പ്രവേശന നടപടികളില്‍ നിന്ന് പുറത്തുപോകും. ഒന്നാമത്തെ ഓപ്ഷനില്‍ തന്നെ അലോട്ട്‌മെന്റ് ലഭിച്ചവര്‍ സ്ഥിരം പ്രവേശനം നേടണം. അല്ലാത്തവര്‍ക്ക് സ്ഥിരപ്രവേശനമോ താല്‍ക്കാലിക പ്രവേശനമോ നേടാവുന്നതാണ്.

രണ്ടാം അലോട്ട്‌മെന്റ് ജൂണ്‍ ഒമ്പതിന് രാത്രിയോടെ പ്രസിദ്ധീകരിക്കുന്നതാണ്. ജൂണ്‍ 10, 11 തീയതികളില്‍ പ്രവേശനം നടക്കും. ഒന്നാം ഘട്ടത്തില്‍ അലോട്ട്‌മെന്റ് ലഭിച്ചിട്ടും പ്രവേശനം നേടാത്ത സീറ്റുകളിലേക്കും ബാക്കിയുള്ള മെറിറ്റ് സീറ്റുകളിലേക്കുമായിരിക്കും രണ്ടാം ഘട്ടത്തില്‍ അലോട്ട്‌മെന്റ് നടക്കുക. മൂന്നാം അലോട്ട്‌മെന്റ് ജൂണ്‍ 16ന് പ്രസിദ്ധീകരിക്കും. ജൂണ്‍ 18ന് പ്ലസ് വണ്‍ ക്ലാസുകള്‍ തുടങ്ങും.
അതേസമയം പ്ലസ് വണ്‍ പ്രവേശനത്തില്‍ സംസ്ഥാനത്ത് സീറ്റ് ക്ഷാമമില്ലെന്ന് ആവര്‍ത്തിച്ച് മന്ത്രി വി. ശിവന്‍കുട്ടി. നിലവില്‍ സീറ്റുകള്‍ അധികമാണ്. മറിച്ചുള്ള കണക്കുകള്‍ ശരിയല്ല. മലപ്പുറത്ത് കഴിഞ്ഞ വര്‍ഷവും സീറ്റ് അധികമായിരുന്നു. കുറ്റമറ്റ രീതിയില്‍ പ്ലസ് വണ്‍ പ്രവേശന നടപടികള്‍ പുരോഗമിക്കുകയാണെന്നും മന്ത്രി പറഞ്ഞു.