ലോകകപ്പ് ഫുട്ബാള്‍ യോഗ്യത റൗണ്ട് മത്സരത്തില്‍ അര്‍ജന്റീനക്ക് ജയം. ഏക പക്ഷീയമായ ഒരു ഗോളിനാണ് ചിലിയെ (10) കീഴടക്കിയത്. 16ാം മിനിറ്റില്‍ ഹൂലിയന്‍ ആല്‍വാരസാണ് അര്‍ജന്റീനക്കായി ഗോള്‍ നേടിയത്. സൂപ്പര്‍താരം ലയണല്‍ മെസ്സിയെ ബെഞ്ചിലിരുത്തിയാണ് അര്‍ജന്റീന തുടങ്ങിയത്.

16ാം മിനിറ്റില്‍ തിയാഗോ അല്‍മഡ മുന്നോട്ടുവെച്ച നീട്ടിയ പാസ് പിഴവുകളില്ലാതെ സ്വീകരിച്ച ആള്‍വാരസ് ചിലി ഗോള്‍ കീപ്പര്‍ കോര്‍ട്ടിസിന് മുകളിലൂടെ ചിപ്പ് ചെയ്ത് വലയിലെത്തിച്ചു.

57 ാം മിനിറ്റില്‍ നിക്കോ പാസിന് പകരക്കാരാനായി മെസ്സിയെ കളത്തിലിറക്കിയെങ്കിലും പിന്നീട് വല ചലിപ്പിക്കാന്‍ അര്‍ജന്റീനക്കായില്ല. ജയത്തോടെ 15 കളികളില്‍ നിന്ന് 34 പോയിന്റുമായി അര്‍ജന്റീന ലാറ്റിനമേരിക്കന്‍ യോഗ്യത പട്ടികയില്‍ ഒന്നാമത് തുടരുകയാണ്. 25 പോയിന്റ് വീതമുള്ള ഇക്വഡോറും പരാഗ്വയും യഥാക്രമം രണ്ടും മൂന്നും സ്ഥാനങ്ങളില്‍ തുടരുന്നു. ബ്രസീല്‍ 22 പോയിന്റുമായി നാലാമതാണുള്ളത്‌