മുങ്ങിയ ലൈബീരിയന്‍ ചരക്കുകപ്പല്‍ എം.എസ്.സി എല്‍സ 3ല്‍ നിന്ന് ഇന്ധനം വീണ്ടെടുക്കുന്ന ദൗത്യത്തിന്റെ നിര്‍ണായക നടപടികള്‍ ഇന്ന് ആരംഭിക്കും. പരിശീലനം ലഭിച്ച മുങ്ങല്‍ വിദഗ്ദ്ധരുടെ സഹായത്തോടെയാണിത്.

കപ്പലിന്റെ ടാങ്കില്‍ ചോര്‍ച്ച വരാതെ ദ്വാരമിടുന്ന പ്രത്യേക ഉപകരണം സ്ഥാപിക്കലാണ് ആദ്യപടി. തുടര്‍ന്ന് അനുബന്ധ ഉപകരണങ്ങള്‍ ഘടിപ്പിച്ച് ഇന്ധനം മുകളിലേക്ക് പമ്പ് ചെയ്ത് ടാങ്കിലേക്ക് മാറ്റുകയും ചെയ്യും. ഡയറക്ടര്‍ ജനറല്‍ ഒഫ് ഷിപ്പിംഗിന്റെ സാന്നിദ്ധ്യത്തില്‍ തയ്യറാക്കിയ ആക്ഷന്‍ പ്ലാനിന്റെ അടിസ്ഥാനത്തിലാണ് ദൗത്യം. 450 ടണ്‍ ഇന്ധനമാണ് കപ്പലിന്റെ ടാങ്കിലുള്ളത്.

ഏഴ് ദിവസം നീളുന്ന പ്രാരംഭ നടപടികള്‍ കാലാവസ്ഥ അനുകൂലമാണെങ്കില്‍ 10ന് പൂര്‍ത്തിയാകും. 13ന് ഇന്ധനം നീക്കുന്ന നടപടികള്‍ പൂര്‍ണ്ണ തോതില്‍ ആരംഭിക്കുന്നതാണ്. ജൂലായ് മൂന്നിനകം ഇന്ധനം വീണ്ടെടുക്കലാണ് ലക്ഷ്യമിട്ടിരിക്കുന്നത്.

കപ്പലില്‍ നിന്ന് വോയേജ് ഡാറ്റ റെക്കാഡര്‍ വീണ്ടെടുക്കാനുള്ള ശ്രമങ്ങള്‍ക്ക് തുടക്കമാകും. ഇതില്‍ നിന്ന് കപ്പല്‍ അപകടത്തെക്കുറിച്ചുള്ള കൃത്യമായ വിവരം ലഭിക്കുമെന്നാണ് കണക്കുകൂട്ടുന്നത്്. കപ്പലിന്റെ വേഗം, ദിശ, ക്രൂ മെമ്പര്‍മാരുടെ സംസാരം, മറ്റു കപ്പലുകളുമായുള്ള ആശയവിനിമയം തുടങ്ങിയവ ഇതിലുണ്ടാകും.


അമേരിക്കന്‍ കമ്പനിയായ ടി ആന്‍ഡ് ടി സാല്‍വേജിന്റെ നാല് ടഗ്ഗുകള്‍ കപ്പല്‍മുങ്ങിയ സ്ഥലത്തുണ്ട്. ഇവര്‍ സര്‍വേയും എണ്ണനീക്കലും നടത്തിവരികയാണ്.
സുരക്ഷിത കേന്ദ്രത്തിലേക്ക് തീരത്തടിഞ്ഞ 53 കണ്ടെയ്നറുകള്‍ നീക്കുന്ന പ്രവൃത്തികളും പുരോഗമിക്കുകയാണ്. ഇതില്‍ ഭൂരിഭാഗവും സുരക്ഷിത കേന്ദ്രത്തിലേക്ക് മാറ്റി. തീരത്തടിഞ്ഞ മാലിന്യങ്ങള്‍ നീക്കുന്ന നടപടികളും പുരോഗമിച്ചു വരുന്നു . എത്രയും വേഗം ഇവ നീക്കി തീരം വൃത്തിയാക്കണമെന്നാണ് കപ്പല്‍ക്കമ്പനിക്ക് നിര്‍ദ്ദേശം നല്‍കിയിട്ടുണ്ട്.