തലസ്ഥാനത്തെ വിറപ്പിച്ച് ഗുണ്ടാപ്പിരിവ് നടത്തിയ ''അമ്മയ്‌ക്കൊരു മകന്‍' സോജുവും കൂട്ടാളിയുമടക്കം 5 പ്രതികളുടെ വിചാരണ സെഷന്‍സ് കോടതിയിലേക്ക്. തിരുവനന്തപുരം ഒന്നാം ജുഡീഷ്യല്‍ മജിസ്‌ട്രേറ്റ് കാര്‍ത്തിക. എസ്.വര്‍മ്മയാണ് പ്രതികള്‍ക്ക് കുറ്റപത്ര പകര്‍പ്പ് നല്‍കിക്കൊണ്ട് വിചാരണക്കായി സെഷന്‍സ്
കോടതിയില്‍ ഹാജരാകാന്‍ ഉത്തരവിട്ടത്. 2024 ഡിസം 13നാണ്
അനധികൃതമായി മണ്ണ് കടത്തിയിരുന്ന ടിപ്പറുകാരില്‍ നിന്ന് ഗുണ്ടാപ്പിരിവ് നടത്തിയ കുപ്രസിദ്ധ കുറ്റവാളി 'അമ്മയ്‌ക്കൊരു മകന്‍' സോജുവും കൂട്ടാളി കുട്ടനും അറസ്റ്റിലായത്. ജെറ്റ് സന്തോഷ് എന്നറിയപ്പെട്ടിരുന്ന സന്തോഷ് കുമാറിനെ വധിച്ച കേസില്‍ പ്രതിയായിരുന്ന അജിത്ത് കുമാര്‍ എന്ന സോജു, കാലടി സ്വദേശി കുട്ടന്‍ എന്ന വിഷ്ണു എന്നിവരെ കരമന പൊലീസാണ് പിടികൂടിയത്.

പേട്ട സ്വദേശിയായ ലോറി ഡ്രൈവറെ വടിവാള്‍ കാട്ടി കൊലപ്പെടുത്തുമെന്ന് ഭീഷണിപ്പെടുത്തുകയും ഉപദ്രവിക്കുകയും ചെയ്ത സംഭവത്തിലാണ് അറസ്റ്റ് നടന്നത്. പലയിടങ്ങളില്‍ നിന്നായി മണ്ണ് കടത്തുന്ന ടിപ്പര്‍ അടക്കമുള്ള ലോറിക്കാരില്‍ നിന്ന് ലോഡ് ഒന്നിന് 1000 രൂപ വീതം ഇയാളും സംഘവും ഗുണ്ടാപ്പിരിവ് വാങ്ങിയിരുന്നെന്ന് പൊലീസ് പറഞ്ഞു. എന്നാല്‍, ഇതു സംബന്ധിച്ച് പരാതി നല്‍കാന്‍ ആരും തയ്യാറായിരുന്നില്ല. അതിനിടെ പേട്ട സ്വദേശിയെ ബണ്ട് റോഡിലുള്ള വീട്ടിലെത്തിച്ച് മര്‍ദ്ദിക്കുകയും വടിവാള്‍ കാട്ടി കൊലപ്പെടുത്തുമെന്ന് ഭീഷണിപ്പെടുത്തുകയും ചെയ്തതായി കണ്ടെത്തി. ലോഡിന് 250 രൂപ വീതം നല്‍കാമെന്ന് ഉറപ്പ് നല്‍കിയതിനെ തുടര്‍ന്ന് ഇയാളെ മോചിപ്പിക്കുകയായിരുന്നു.തുടര്‍ന്ന് നടത്തിയ അന്വേഷണത്തിലാണ് പ്രതികളെ കരമന പൊലീസ് പിടികൂടിയത്.സോജുവിന്റെ വസതിയില്‍ നടത്തിയ പരിശോധനയില്‍ മഴു, എസ് ആകൃതിയിലുള്ള കത്തി,മറ്റ് ആയുധങ്ങളും മൂന്ന് മൊബൈല്‍ ഫോണുകളും കണ്ടെടുത്തു.

കരമന സി.ഐ എസ്.അനൂപ്,എസ്.ഐ ആര്‍.എസ്.വിപിന്‍,ഷാഡോ എസ്.ഐ ഉമേഷ്,പൊലീസ് ഉദ്യോഗസ്ഥരായ വിനോദ്,ശരത്,ഹരീഷ് തുടങ്ങിയവരാണ് പ്രതികളെ പിടികൂടിയത്. ജെറ്റ് സന്തോഷിനെ കൊലപ്പെടുത്തിയ കേസില്‍ സോജു അടക്കമുള്ളവരെ സെഷന്‍സ് കോടതി വധശിക്ഷയ്ക്ക് വിധിക്കുകയും മറ്റു പല കേസുകളിലുമായി 12 വര്‍ഷത്തോളം ജയില്‍ശിക്ഷ അനുഭവിക്കുകയും ചെയ്യുന്നതിനിടെ ഹൈക്കോടതി ഇയാളെ കുറ്റവിമുക്തനാക്കിയിരുന്നു. പുറത്തിറങ്ങിയ ശേഷമാണ് ഗുണ്ടാപ്പിരിവും മറ്റ് ക്രിമിനല്‍ നടപടികളുമായി നടന്നിരുന്നതെന്ന് പൊലീസ് പറഞ്ഞു.കരമന സജി കൊലക്കേസിലും പ്രതിയാണ് സോജു.