സ്വകാര്യ ബാങ്കിലെ ജീവനക്കാരില്‍ നിന്ന് സ്‌കൂട്ടറിലെത്തിയ സംഘം 40 ലക്ഷം രൂപ കവര്‍ന്നു. കോഴിക്കോട് പന്തീരാങ്കാവില്‍ നടന്ന സംഭവത്തില്‍ പോലീസ് കേസെടുത്തു. ഇന്ന് ഉച്ചയ്ക്ക് ഒരു മണിയോടെയാണ് ജീവനക്കാരില്‍ നിന്ന് 40 ലക്ഷം രൂപ അടങ്ങിയ ബാഗ് കവര്‍ച്ച ചെയ്തത്.

സ്വകാര്യ ബാങ്കിലെ സ്റ്റാഫായ അരവിന്ദ് എന്നയാളുടെ കയ്യില്‍ നിന്ന് പണം അടങ്ങുന്ന കറുത്ത നിറത്തിലുള്ള ബാഗ് തട്ടിയെടുക്കുകയായിരുന്നു. രാമനാട്ടുകര പന്തീരാങ്കാവ് റോഡില്‍ നിന്ന് മാങ്കാവിലേക്കുള്ള റോഡില്‍ വച്ച് ഷിബിന്‍ ലാല്‍ എന്നയാള്‍ ബാഗ് തട്ടിപ്പറിച്ച് കറുത്ത നിറത്തിലുള്ള ജൂപിറ്റര്‍ വാഹനത്തില്‍ കയറിപ്പോവുകയായിരുന്നുവെന്നാണ് പരാതി. ഇയാള്‍ കറുത്ത നിറത്തിലുള്ള ടി ഷര്‍ട്ടാണ് ധരിച്ചിരിക്കുന്നത്. വ്യക്തിയുടെ ഫോട്ടോയും പൊലീസ് പങ്കുവച്ചിട്ടുണ്ട്.

പ്രതിയായ ഷിബിന്‍ ലാല്‍, അക്ഷയ ഫൈനാന്‍സിയേഴ്‌സ് എന്ന സ്വര്‍ണപ്പണയ സ്ഥാപനത്തില്‍ 38 ലക്ഷത്തോളം രൂപയ്ക്ക് സ്വര്‍ണം പണയം വച്ചിരുന്നു. ഇത് സ്വകാര്യ ബാങ്കായ ഇസാഫിലേക്ക് കൂടുതല്‍ പലിശയില്‍ മാറ്റി വയ്ക്കണമെന്ന് ഷിബിന്‍ ലാല്‍ ആവശ്യപ്പെട്ടു. അത്തരത്തില്‍ സ്വര്‍ണം മാറ്റിവയ്ക്കണമെങ്കില്‍ ആദ്യം ഈ സ്വര്‍ണത്തിന്റെ പണം അടയ്ക്കണം. അതിനായി ഇസാഫിലെ ജീവനക്കാര്‍ പണവുമായി എത്തിയപ്പോഴാണ് കവര്‍ച്ച നടന്നത്.