അറ്റകുറ്റപ്പണിക്കായി കരയിലേക്ക് കയറ്റുന്ന ഫൈബര്‍ വള്ളങ്ങളുടെ അടിയിലാണ് കല്ലുമ്മക്കായ വ്യാപകമായി കണ്ടുവരുന്നത്. ട്രോളിംഗ് നിരോധനം നിലവില്‍ വരുന്നതോടെയാണ് അറ്റകുറ്റപ്പണിക്കായി ഫൈബര്‍ വള്ളങ്ങളെ കരയിലേക്ക് കയറ്റുന്നത്. ബേപ്പൂര്‍ ഭാഗത്ത് മാത്രമായി അഞ്ചോളം യാര്‍ഡുകള്‍ പ്രവര്‍ത്തിക്കുന്നുണ്ട്. ചാലിയം, പൊന്നാനി, പുതിയാപ്പ, കൊയിലാണ്ടി എന്നീ ഭാഗങ്ങളില്‍ നിന്നും വരുന്ന ഫൈബര്‍ വള്ളങ്ങള്‍ക്കടിയിലാണ് പ്രധാനമായും കല്ലുമ്മക്കായയുള്ളത്. വള്ളങ്ങള്‍ കരയിലേക്ക് കയറ്റിയാല്‍ ആവശ്യക്കാര്‍ക്ക് യഥേഷ്ടം ശേഖരിക്കാം. മാസങ്ങളോളം കടലിലും പുഴയിലും നങ്കൂരമിടുന്ന ഫൈബര്‍ വള്ളങ്ങള്‍ക്കടിയിലും ബോട്ടുകളുടെ അടിയിലുമാണ് കല്ലുമ്മക്കായ രൂപപ്പെടുന്നത്.

കാലവര്‍ഷം കനക്കുമ്പോള്‍ ശുദ്ധജലം കലര്‍ന്ന് പുഴയില്‍ ഉപ്പിന്റെ അംശം കുറയുന്നതിന് മുമ്പ് കരയിലേക്ക് കയറ്റുന്ന യാനങ്ങള്‍ക്കടിയില്‍ ഇവയുണ്ടാവും. ഈ മാസങ്ങളില്‍ ഇളം പച്ച നിറത്തിലുള്ള കല്ലുമ്മക്കായക്ക് പകരം കറുപ്പ് കലര്‍ന്ന കല്ലുമ്മക്കായയാണ് കണ്ടുവരാറുള്ളത്. വലുപ്പക്കുറവുണ്ടെങ്കിലും ഉള്‍ഭാഗത്ത് ആവശ്യത്തിന് ഇറച്ചി ഉണ്ടെന്നാണ് കല്ലുമ്മക്കായ ശേഖരിക്കുന്നവര്‍ പറയുന്നത്.

ഒരു വലിയ ഫൈബര്‍ വള്ളത്തിനടിയില്‍ ഒരു ക്വിന്റലില്‍ അധികം കല്ലുമ്മക്കായ കിട്ടാറുണ്ട്. ഇത്തരം കല്ലുമ്മക്കായകള്‍ ശേഖരിച്ച് വില്‍ക്കാറാണ് പതിവ്. ഫൈബര്‍ വള്ളങ്ങള്‍ക്കടിയിലെ ഇത്തരം കല്ലുമ്മക്കായ, മുരുപ്പ് എന്നിവ നീക്കം ചെയ്ത് അടിഭാഗം പ്യൂപ്പല്‍ തടയാനുളള പെയിന്റ് ചെയ്താണ് ഓരോ വള്ളവും നീറ്റിലിറക്കുന്നത്. മത്സ്യബന്ധന സമയത്ത് വലകള്‍ യാനത്തിലേക്ക് വലിച്ചു കയറ്റുന്നതിനിടയില്‍ ഫൈബറിനടിയിലെ കല്ലുമ്മക്കായകളിലും മുരുപ്പിലും തട്ടി വല കീറി വലയിലകപ്പെടുന്ന മത്സ്യം പുറത്ത് പോകാതിരിക്കാനാണ് യാനങ്ങളുടെ അടിഭാഗം വൃത്തിയാക്കുന്നത്.

ട്രോളിംഗ് നിരോധന കാലയളവില്‍ ഫൈബര്‍ വള്ളങ്ങള്‍ക്ക് വിലക്ക് ഇല്ലാത്തതിനാലാണ് വള്ളങ്ങള്‍ മത്സ്യബന്ധനത്തിന് പോകുന്നതിന് മുമ്പ് അറ്റകുറ്റപ്പണിക്കായി കരയിലേക്ക് കയറ്റുന്നത്. കല്ലുമ്മക്കായ വളര്‍ത്ത് കേന്ദ്രത്തിലേക്കും ഫൈബര്‍ വള്ളങ്ങള്‍ക്കടിയില്‍ കാണപ്പെടുന്ന കല്ലുമ്മക്കായ കുഞ്ഞുങ്ങളെ കൊണ്ടുപോകാറുണ്ട്. കല്ലുമ്മക്കായ കൂടാതെ മുരുവിറച്ചിക്കുവേണ്ടി യാനങ്ങള്‍ക്കടിയില്‍ വളരുന്ന വലിയ മുരുപ്പും നാട്ടുകാര്‍ ശേഖരിക്കാറുണ്ട്.