ലോക ടെസ്റ്റ് ചാമ്പ്യന്‍ഷിപ്പ് ഫൈനല്‍ ആവേശകരമായ അവസാനത്തിലേക്ക്്. രണ്ടാം ഇന്നിങ്സില്‍ ഓസീസിന് എട്ട് വിക്കറ്റുകള്‍ നഷ്ടമായി. മൂന്ന് ദിവസം കൂടെ ശേഷിക്കേ 212 റണ്‍സിന്റെ ലീഡാണ് കങ്കാരുക്കള്‍ക്കുള്ളത്.

13 റണ്‍സുമായി മിച്ചല്‍ സ്റ്റാര്‍ക്കും ഒരു റണ്‍സുമായി നേഥന്‍ ലിയോണുമാണ് ക്രീസില്‍. ഒടുവില്‍ വിവരം ലഭിക്കുമ്പോള്‍ 138 ന് എട്ട് എന്ന നിലയിലാണ് ഓസീസ്. ആദ്യ ഇന്നിങ്സില്‍ ദക്ഷിണാഫ്രിക്കയെ 138 റണ്‍സിന് കൂടാരം കയറ്റിയ ഓസീസ് 74 റണ്‍സ് ലീഡുമായാണ് രണ്ടാം ഇന്നിങ്സ് തുടങ്ങിയത്. എന്നാല്‍ രണ്ടാം ഇന്നിങ്സിലും കഗിസോ റബാഡയും ലുങ്കി എങ്കിഡിയും എരിഞ്ഞ് കത്തിയതോടെ ആദ്യ ഇന്നിങ്സിലേതിന് സമാനമായി കൂട്ടത്തകര്‍ച്ച നേരിട്ടു.

അഞ്ച് ബാറ്റര്‍മാരാണ് രണ്ടക്കം കാണാതെ പുറത്തായത്. റബാഡ നാല് വിക്കറ്റും എങ്കിഡി മൂന്ന് വിക്കറ്റും പോക്കറ്റിലാക്കി. ഏഴാമനായിറങ്ങിയ അലക്സ് കാരിയാണ് കങ്കാരുക്കള്‍ക്കായി അല്‍പമെങ്കിലും പൊരുതി നോക്കിയത്. കാരി 50 പന്തില്‍ 43 റണ്‍സെടുത്തു. പരമാവധി ലീഡുയര്‍ത്തിയ ശേഷം രണ്ടാം ഇന്നിങ്സില്‍ പ്രോട്ടീസിനെ കുറഞ്ഞ സ്‌കോറില്‍ എറിഞ്ഞിടുക എന്നതാവും ഓസീസിന്റെ പദ്ധതി.