സ്‌കൂട്ടറില്‍ കാട്ടുപന്നിയിടിച്ചപകടം... ആശുപത്രിയിലായിരുന്ന യുവാവ് ചികിത്സയിലിരിക്കെ മരിച്ചു
സ്‌കൂട്ടറില്‍ കാട്ടുപന്നിയിടിച്ച് അപകടത്തില്‍പ്പെട്ട് ആശുപത്രിയിലായിരുന്ന യുവാവ് മരണത്തിന് കീഴടങ്ങി. തൃശൂര്‍ എരുമപ്പെട്ടിയിലാണ് സംഭവം. ചിറമനേങ്ങാട് സ്വദേശി കുന്നത്ത് പീടികയില്‍ അബൂബക്കറിന്റെ മകന്‍ ഇര്‍ഷാദ് (20) ആണ് മരിച്ചത്. വെള്ളറക്കാട് മാത്തൂര്‍ പാടത്തിന് സമീപത്ത് വെച്ച് ഇര്‍ഷാദ് യാത്ര ചെയ്യുമ്പോള്‍ റോഡിന് കുറുകെ ഓടി വന്ന കാട്ടുപന്നി സ്‌കൂട്ടറിലിടിച്ചാണ് അപകടംസംഭവിച്ചത്.
നിയന്ത്രണം വിട്ട് മറിഞ്ഞ സ്‌കൂട്ടറില്‍ നിന്നും തെറിച്ച് വീണ ഇര്‍ഷാദിന് തലയ്ക്ക് സാരമായി പരിക്കേറ്റിരുന്നു. ഇന്നലെ രാത്രിയില്‍ ആരോഗ്യനില വഷളായതിനെ തുടര്‍ന്ന് എറണാംകുളം ആസ്റ്റര്‍ ആശുപത്രിയിലേക്ക് മാറ്റിയിരുന്നു. അവിടെ ചികിത്സയിലിരിക്കെ മരണത്തിന് കീഴടങ്ങി.
കോയമ്പത്തൂരില്‍ നഴ്‌സിംഗ് വിദ്യാര്‍ത്ഥിയായിരുന്നു. മാതാവിനെ ഗള്‍ഫിലേക്ക് യാത്രയയക്കുന്നതിന് നാട്ടിലെത്തിയതായിരുന്നു. പിതാവും രണ്ട് സഹോദരങ്ങളും ദുബായിലാണുള്ളത്. സംസ്‌കാരം ഇന്ന് നടക്കും.
https://www.facebook.com/Malayalivartha
