ഒസ്ട്രാവ ഗോള്‍ഡന്‍ സ്‌പൈക്കില്‍ ആദ്യമായി പങ്കെടുക്കുന്ന ഇന്ത്യന്‍ താരം നീരജ് ചോപ്രയ്ക്ക് ജാവ്ലിന്‍ ത്രോയില്‍ സ്വര്‍ണം. തന്റെ വ്യക്തിഗത മികച്ച പ്രകടനം (90.23 മീറ്റര്‍) ആവര്‍ത്തിക്കാനായി നീരജിന് കഴിഞ്ഞില്ലെങ്കിലും, മൂന്നാം ശ്രമത്തില്‍ 85.29 മീറ്റര്‍ ദൂരം എറിഞ്ഞാണ് രണ്ടുതവണ ഒളിമ്പിക് മെഡല്‍ ജേതാവായ താരം വിജയം ഉറപ്പിച്ചത്.

ദക്ഷിണാഫ്രിക്കയുടെ ഡൗ സ്മിത്ത് 84.12 മീറ്റര്‍ ദൂരം എറിഞ്ഞ് വെള്ളി നേടി. മുന്‍ ലോക ചാമ്പ്യന്‍ ആന്‍ഡേഴ്സണ്‍ പീറ്റേഴ്സിനെ പിന്തള്ളിയാണ് സ്മിത്ത് വെള്ളി നേടിയത്. 83.63 മീറ്റര്‍ ദൂരം എറിഞ്ഞ ആന്‍ഡേഴ്സണ്‍ വെങ്കലം നേടുകയും ചെയ്തു.

സമീപകാല മത്സരങ്ങളെ അപേക്ഷിച്ച് നീരജ് മികച്ച സ്ഥിരത പുലര്‍്ത്തിയ മത്സരമായിരുന്നു ഇത്. നാല് ലീഗല്‍ ത്രോകള്‍ എറിഞ്ഞു എല്ലാം 80 മീറ്ററിനപ്പുറം. അവസാന ശ്രമത്തില്‍ തന്റെ കൂടെ നില്‍ക്കാനായി ഓസ്ട്രാവ കാണികളെ പ്രേരിപ്പിച്ചുകൊണ്ട്, ഒരു വലിയ ഫിനിഷിംഗ് നേടാനായി അദ്ദേഹം ശ്രമിച്ചു, പക്ഷേ ത്രോ 85 മീറ്ററില്‍ താഴെയാകുമെന്ന് മനസ്സിലാക്കിയപ്പോള്‍ മനഃപൂര്‍വ്വം ഫൗള്‍ ലൈന്‍ മറികടക്കുകയായിരുന്നു. 2025 സീസണില്‍ നീരജ് നേടുന്ന രണ്ടാമത്തെ വിജയമാണ്.