കിഴക്കേകോട്ട ഗാന്ധി പാര്‍ക്ക് പൂക്കടയില്‍ 10 രൂപക്ക് പൂവ് വാങ്ങി 100 രൂപയുടെ കള്ള നോട്ട് മാറാന്‍ ശ്രമിച്ച നൂറു രൂപ കള്ളനോട്ട് കേസില്‍ ഒന്നാം പ്രതിക്ക് 3 വര്‍ഷം കഠിന തടവും 1 ലക്ഷം രൂപ പിഴയും ശിക്ഷ വിധിച്ചു.

വെങ്ങാനൂര്‍ സ്വദേശി സുരേഷ് കുമാറിനെ (48) യാണ് ശിക്ഷിച്ചത്. തിരുവനന്തപുരം രണ്ടാം അഡീ. ജില്ലാ സെഷന്‍സ് ജഡ്ജി ജി. രാജേഷാണ് പ്രതിയെ ശിക്ഷിച്ചത്. അതേ സമയം ഒളിവില്‍ പോയ മൂന്നാം പ്രതി വട്ടപ്പാറ ചിറ്റാഴ സുഗുണന്‍ എന്ന സുരേഷിനെ (46) പിടികിട്ടാപ്പുള്ളിയായി പ്രഖ്യാപിച്ച് ജാമ്യമില്ലാ അറസ്റ്റ് വാറണ്ടും ജപ്തി വാറണ്ടും പുറപ്പെടുവിച്ചു.

രണ്ടാം പ്രതി കോട്ടയം കടുത്തുരുത്തി സ്വദേശി അനൂപ് വിചാരണക്കിടെ മരണപ്പെട്ടു. 2022 ലാണ് സംഭവം നടന്നത്. പൂക്കട നടത്തുന്ന രാജീവ് ഒന്നാം പ്രതിയെ കൈയ്യോടെ പിടികൂടി ഫോര്‍ട്ട് പോലീസില്‍ ഏല്‍പ്പിക്കുകയും പ്രതികളുടെ വീട് റെയ്ഡ് ചെയ്തതില്‍ 100 രൂപയുടെ കൂടുതല്‍ വ്യാജ നോട്ടുകള്‍ ലഭിച്ചുവെന്നുമാണ്
കേസ്. പ്രോസിക്യൂഷന് വേണ്ടി അഡീ. പ്രോസിക്യൂട്ടര്‍ കെ. എല്‍. ഹരീഷ് കുമാര്‍ ഹാജരായി. പിടിച്ചെടുത്ത തൊണ്ടി നോട്ടുകള്‍ കള്ള കമ്മട്ടത്തില്‍ അച്ചടിച്ച വ്യാജനാണെന്ന് റിസര്‍വ് ബാങ്ക് നോട്ടച്ചടിക്കുന്ന നാസിക്കിലെ ഗവ. പ്രസ്സിലെ റിപ്പോര്‍ട്ട് വിചാരണയില്‍ നിര്‍ണ്ണായകമായി.