തിരുവനന്തപുരം കഴക്കൂട്ടം പള്ളിത്തുറ തീരത്ത് കടലാക്രമണം രൂക്ഷം. ഏഴ് കുടുംബങ്ങൾ അപകടഭീഷണിയിൽ കഴിയുകയാണ്. പള്ളിത്തുറ വിഎസ്എസ്‌സി നോർത്ത് ഗേറ്റിനു സമീപത്തെ കടൽത്തീരത്തെ ഏഴ് കുടുംബങ്ങളാണ് കടലാക്രമണഭീഷണിയിലുള്ളത്. മണൽചാക്കുകൾ നിരത്തി വീട് തകരാതെ നോക്കുകയാണ് നാട്ടുകാർ. ഈ ഭാഗത്തെ നിരവധി തെങ്ങുകളും കടലെടുത്തു. ശക്തമായ കടലേറ്റത്തെ തുടർന്ന് ഈ മേഖലയിൽ പരമ്പരാഗത മത്സ്യ തൊഴിലാളികൾക്ക് വള്ളം ഇറക്കാനാകാത്ത സാഹചര്യമാണ്.

പള്ളിത്തുറ സ്കൂളിൽ മത്സ്യത്തൊഴിലാളികൾക്ക് താമസസൗകര്യം ഒരുക്കിയിട്ടുണ്ടെന്ന് കോർപ്പറേഷൻ സ്റ്റാൻഡിങ് കമ്മിറ്റി ചെയർമാൻ മേടയിൽ വിക്രമൻ പറഞ്ഞു. പുത്തൻതോപ്പ്, വേളി ഭാഗങ്ങളിലും കടലേറ്റം രൂക്ഷമാണ്. പല സ്ഥലങ്ങളിലും 100 മീറ്ററോളം കടൽ കയറി.

വള്ളങ്ങൾ സൂക്ഷിച്ച ഭാഗത്ത് കടൽ കയറിയതിനാൽ ഇവ സുരക്ഷിതമായി സ്ഥലത്തേക്കു മാറ്റിയതിനാൽ വള്ളങ്ങൾക്ക് കേടുപാടില്ല. പുതുകുറിച്ചി മര്യനാട് തുമ്പ പള്ളിത്തുറ വലിയവേളി ഭാഗങ്ങളിൽ കടൽ ക്ഷോഭം രൂക്ഷമായതോടെ മത്സ്യത്തൊഴിലാളികൾ ദുരിതാവസ്ഥയിലാണ്.