റോഡില്‍ വീണ ഹെല്‍മെറ്റ് എടുക്കാന്‍ ശ്രമം... പിന്നില്‍ വന്ന ലോറിയിടിച്ച് ബൈക്ക് യാത്രികര്‍ക്ക് ദാരുണാന്ത്യം
കണ്ണീര്‍ക്കാഴ്ചയായി.... ദേശീയപാതയില്‍ വഴുക്കുംപാറ മേല്‍പാതയില്‍ ബൈക്കില്‍ ലോറിയിടിച്ച് ബൈക്ക് യാത്രക്കാരായ യുവതിയും യുവാവും മരിച്ചു. തൃശൂര്‍ ഭാഗത്തേക്കുള്ള റോഡില്‍ കുതിരാന്‍ തുരങ്കം പിന്നിട്ടയുടന്‍ ഞായറാഴ്ച രാത്രി 9 നായിരുന്നു അപകടം നടന്നത്. റോഡിലേക്കു തെറിച്ചു വീണ ഹെല്‍മറ്റ് എടുക്കുന്നതിനായി പെട്ടെന്നു നിര്‍ത്തിയ ബൈക്കിനു പിന്നിലായി പാലുമായി പോയ ലോറി ഇടിക്കുകയായിരുന്നു.
ഇടിയുടെ ആഘാതത്തില്‍ യാത്രക്കാരും ബൈക്കും ലോറിക്കടിയില്‍ പെടുകയായിരുന്നു. എറണാകുളം കലൂര്‍ എംപയര്‍ അപ്പാര്‍ട്‌മെന്റ് നെടുംപുരയ്ക്കല്‍ മാസിന്‍ അബ്ബാസ് (36), ആലപ്പുഴ നൂറനാട് തച്ചന്റെ കിഴക്കേതില്‍ വിദ്യ വിജയന്‍(38) എന്നിവരാണ് മരിച്ചതെന്നു പൊലീസ് പറഞ്ഞു.
ചക്രത്തിനടിയില്‍ കുടുങ്ങിയ ഇരുവരും ലോറിയുടെ പിന്‍ഭാഗത്തേക്കു തെറിച്ചുവീണു. ഇരുവരുടെയും ശരീരത്തിലൂടെ ലോറിയുടെ ചക്രങ്ങള്‍ കയറിയിറങ്ങി. ഏറെ നേരത്തിനു ശേഷം ക്രെയിന്‍ ഉപയോഗിച്ച് ലോറി മാറ്റിയാണ് ബൈക്ക് പുറത്തെടുക്കാനായത്.
https://www.facebook.com/Malayalivartha
