ഡിജിപിയും സംസ്ഥാന പൊലീസ് മേധാവിയുമായ ഷെയ്ഖ് ദര്‍വേഷ് സാഹിബ് തിങ്കളാഴ്ച സര്‍വീസില്‍നിന്ന് വിരമിക്കും. പൊലീസ് സേന നല്‍കുന്ന വിടവാങ്ങല്‍ പരേഡ് രാവിലെ 8.30ന് തിരുവനന്തപുരം എസ്എപി പരേഡ് ഗ്രൗണ്ടില്‍ നടക്കും.

പോലീസിന്റെ ഓദ്യോഗിക യാത്രയയപ്പു ചടങ്ങ് തിങ്കളാഴ്ച പകല്‍ 12 ന് പൊലീസ് ആസ്ഥാനത്ത് സംഘടിപ്പിക്കും. 2023 ജൂണ്‍ 30 മുതല്‍ രണ്ട് വര്‍ഷമാണ് അദ്ദേഹം സംസ്ഥാന പോലീസ് മേധാവിയായി പ്രവര്‍ത്തിച്ചത്.


സംസ്ഥാനത്തെ പുതിയ പൊലീസ് മേധാവിയെ ഇന്ന് പ്രഖ്യാപിക്കും. തിങ്കളാഴ്ച ചേരുന്ന മന്ത്രിസഭാ യോഗത്തില്‍ ഇത് സംബന്ധിച്ച് തീരുമാനമെടുക്കുകയും ചെയ്യും. യുപിഎസ്‌സി സംസ്ഥാനത്തിന് അയച്ച ചുരുക്കപ്പട്ടികയിലുള്ളത് റോഡ് സുരക്ഷാ കമീഷണര്‍ നിതിന്‍ അഗര്‍വാള്‍, കേന്ദ്ര കാബിനറ്റ് സെക്രട്ടേറിയറ്റിലെ സെക്രട്ടറി (സെക്യൂരിറ്റി) റവാഡ ചന്ദ്രശേഖര്‍, അഗ്‌നിരക്ഷാസേന മേധാവി യോഗേഷ് ഗുപ്ത എന്നിവരാണ് .