പുറംകടലില്‍ തീപിടിച്ച 'വാന്‍ഹായ് 503'കപ്പല്‍ ശ്രീലങ്കയ്ക്ക് പടിഞ്ഞാറെത്തി. നിലവില്‍ കന്യാകുമാരിക്ക് തെക്കു പടിഞ്ഞാറ് 150 നോട്ടിക്കല്‍ മൈല്‍ അകലെയാണുള്ളത്. കാലാവസ്ഥ അനുകൂലമാണെങ്കില്‍ ഇന്ത്യയുടെ പ്രത്യേക സാമ്പത്തികമേഖലയായ 200 നോട്ടിക്കല്‍ മൈലിന് പുറത്തേക്ക് കൊണ്ടുപോകാനാണ് ഡയറക്ടറേറ്റ് ജനറല്‍ ഓഫ് ഷിപ്പിംഗിന്റെ നിര്‍ദ്ദേശമുള്ളത്.

എന്‍ജിന്‍ മുറിയിലും അറകളിലും കൂടുതല്‍ വെള്ളം കയറുന്നത് ആശങ്കയ്ക്ക് ഇടനല്‍കുന്നു. വെള്ളം പുറത്തേക്ക് പമ്പ് ചെയ്ത് കളയാനുള്ള ശ്രമം വിജയിച്ചിട്ടില്ല. കപ്പലിനുള്ളിലെ എമര്‍ജന്‍സി ജനറേറ്ററിന്റെ ബാറ്ററി മാറ്റിയിട്ടുണ്ടായിരുന്നു. ജനറേറ്റര്‍ വീണ്ടും പ്രവര്‍ത്തിപ്പിക്കാനായാല്‍ തീയണയ്ക്കല്‍ കൂടുതല്‍ വേഗത്തിലാക്കാമെന്ന് കരുതിയെങ്കിലും ഇപ്പോഴും പുക ഉയരുന്നു.

്.തീയണയ്ക്കലിനായി പുറപ്പെട്ട ആധുനിക ടഗ് 'വിര്‍ഗോ' ഗോവന്‍ തീരം പിന്നിട്ടു. ഇതില്‍ തീയണയ്ക്കാനുള്ള ആധുനിക സംവിധാനമുണ്ട്. ഇന്ന് രാത്രിയോടെ കപ്പലിന് അടുത്തെത്തിക്കും. തീ പൂര്‍ണമായി അണഞ്ഞശേഷം കപ്പല്‍ ശ്രീലങ്കയിലെ ഹമ്പന്‍ടോട്ട തുറുഖത്തേക്ക് മാറ്റുകയാണ് ലക്ഷ്യമിടുന്നത്.