കോതമംഗലത്ത് ഒഴുക്കില്‍പ്പെട്ട് കാണാതായ രാധാകൃഷ്ണന്റെ മൃതദേഹം കണ്ടെത്തി
ആറു ദിവസത്തെ തെരച്ചിലിനൊടുവില്‍.... പൂയംകുട്ടി മണികണ്ഠന്‍ച്ചാല്‍ ചപ്പാത്തില്‍ ഒഴുക്കില്‍പ്പെട്ട് കാണാതായ രാധാകൃഷ്ണന്റെ (ബിജു 37) മൃതദേഹം കണ്ടെത്തി. തിങ്കളാഴ്ച രാവിലെ എട്ടരക്ക് ബ്ലാവന കടവിനും പൂയ്യം കുട്ടിക്കും ഇടയിലെ പള്ളിപ്പടി കടവില്‍ നിന്നാണ് കണ്ടെത്തിയത്. കാണാതായി ആറാം ദിവസമാണ് മൃതദേഹം ചപ്പാത്തില്‍ നിന്ന് മൂന്ന് കിലോമീറ്റര്‍ മാറി പൊങ്ങിയത്.
ബസ് ജീവനക്കാരനായ ബിജു ബുധനാഴ്ച രാവിലെ ആറരയോടെ ജോലിക്ക് പോകുവാനായി ചപ്പാത്ത് വഴി പൂയംകുട്ടിക്ക് കടക്കാന്‍ ശ്രമിക്കവെയാണ് അപകടത്തില്‍പ്പെട്ടത്.
ചപ്പാത്ത് കടക്കുന്നതിനിടയില്‍ ബിജു പെട്ടെന്ന് ഒഴുക്കില്‍പ്പെടുകയായിരുന്നുവെന്നും, രക്ഷപെടുത്താനായി ശ്രമിച്ചെങ്കിലും കഴിഞ്ഞില്ലെന്നും ഒപ്പമുണ്ടായിരുന്ന സജി പറഞ്ഞു. ശക്തമായ മഴയെ തുടര്‍ന്ന് രാത്രി ചപ്പാത്ത് വെള്ളത്തിനടിയിലായിരുന്നു.
കോതമംഗലം അഗ്‌നി രക്ഷാ നിലയത്തിലെ സ്‌കൂബ ടീം, എന്‍.ഡി.ആര്‍.എഫ്, വനം വകുപ്പും പൊലീസും നാട്ടുകാരും ചേര്‍ന്ന് തെരച്ചില്‍ നടത്തിവരികയായിരുന്നു. നാല് ദിവസമായിട്ടും മൃതദേഹം കണ്ടെടുക്കാത്ത സാഹചര്യത്തില്‍ ഞായറാഴ്ച്ച തിരച്ചില്‍ പാണിയേലി പോര്, ആലുവ ഭാഗങ്ങളിലേക്കും വ്യാപിപ്പിച്ചിട്ടുണ്ടായിരുന്നു. മൃതദേഹം കുട്ടമ്പുഴ പൊലീസ് പോസ്റ്റ്‌മോര്‍ട്ടത്തിനായി കോതമംഗലം താലൂക്ക് ആശുപത്രിയിലേക്ക് മാറ്റിയിരിക്കുകയാണ്.
https://www.facebook.com/Malayalivartha
