ശിവഗംഗയില്‍ പൊലീസ് കസ്റ്റഡിയില്‍ മരിച്ച 27കാരന്റെ കുടുംബത്തിന് ഇടക്കാല നഷ്ടപരിഹാരമായി 25 ലക്ഷം രൂപ കൂടി നല്‍കാന്‍ മദ്രാസ് ഹൈക്കോടതിയുടെ ഉത്തരവ്. പൊലീസ് കസ്റ്റഡിയില്‍ മരിച്ച ക്ഷേത്ര സുരക്ഷാ ജീവനക്കാരന്‍ അജിത് കുമാറിന്റെ കുടുംബത്തിനാണ് ഇടക്കാല നഷ്ടപരിഹാരമായി 25 ലക്ഷം രൂപ കൂടി നല്‍കാന്‍ മദ്രാസ് ഹൈക്കോടതി മധുര ബെഞ്ച് ഉത്തരവ് പുറപ്പെടുവിച്ചത്.

ഇതിനകം 7.5 ലക്ഷം രൂപ സര്‍ക്കാര്‍ നല്‍കിയിരുന്നു. ഇതിനു പുറമെയാണ് 25 ലക്ഷം രൂപയും നല്‍കേണ്ടത്. ആകെ നഷ്ടപരിഹാരം 32.5 ലക്ഷമായി. ആദ്യ തുക അപര്യാപ്തമാണെന്ന് ചൂണ്ടിക്കാട്ടി കൂടുതല്‍ നഷ്ടപരിഹാരം നല്‍കാന്‍ കോടതി സംസ്ഥാന സര്‍ക്കാരിനോട് നിര്‍ദ്ദേശിക്കുകയായിരുന്നു. ആവശ്യമെങ്കില്‍ കുടുംബത്തിന് അധികാരികളില്‍ നിന്ന് കൂടുതല്‍ സഹായം തേടുന്നതിന് ഈ ഇടക്കാല ആശ്വാസം തടസ്സമാകില്ലെന്നും ജഡ്ജിമാര്‍ വ്യക്തമാക്കി.

2018ലെ സാക്ഷി സംരക്ഷണ പദ്ധതി പ്രകാരം അപേക്ഷകള്‍ ഏഴ് പ്രവൃത്തി ദിവസത്തിനുള്ളില്‍ കേള്‍ക്കണമെന്നും ശിവഗംഗ പ്രിന്‍സിപ്പല്‍ ജില്ലാ ജഡ്ജിയോട് കോടതി നിര്‍ദ്ദേശിച്ചു. സിബിഐ അന്വേഷണം ഏറ്റെടുത്ത് വാദം കേള്‍ക്കുന്നതിനായി കേസ് ഓഗസ്റ്റ് 20 ലേക്ക് മാറ്റി.

സംഭവത്തില്‍ ഉള്‍പ്പെട്ട അഞ്ച് പൊലീസ് ഉദ്യോഗസ്ഥരെ അറസ്റ്റ് ചെയ്തു കൊണ്ട് വകുപ്പുതല അന്വേഷണം ആരംഭിച്ചിരുന്നു. ശിവഗംഗ പൊലീസ് സൂപ്രണ്ടിനെ പുറത്താക്കുകയും ചെയ്തു. സിബിഐ സംഘം ശിവഗംഗ സന്ദര്‍ശിക്കുകയും മധുരയിലെ സിബിഐ ഓഫീസില്‍ വച്ച് സാക്ഷികളെ ചോദ്യം ചെയ്യുകയും ചെയ്തു. അജിത് കുമാറിനെ കസ്റ്റഡിയിലെടുത്ത പൊലീസ് സ്‌റ്റേഷനും ഉദ്യോഗസ്ഥര്‍ പരിശോധിച്ചു.