അഴിമതിക്കെതിരെ എന്നും പടവാളെടുത്ത വി,എസ് പരിസ്ഥിതി സംരക്ഷണത്തിന് വേണ്ടിയും മുന്‍നിരയില്‍ നിന്നു. മൂന്നാറും പ്ലാച്ചിമടയും എല്ലാം ചില ഉദാഹരണങ്ങള്‍ മാത്രം. പാലക്കാട് പ്ലാച്ചിമടയില്‍ കൊക്കക്കോളയുടെ ബോട്ട്‌ലിംഗ് പ്ലാന്റിനെതിരെ നടന്ന സമരത്തിന് നേരി്‌ട്ടെത്തിയായിരുന്നു വി.എസ് പിന്തുണ പ്രഖ്യാപിച്ചത്.

2001 2006ല്‍ വി.എസ് പ്രതിപക്ഷ നേതാവായിരിക്കുമ്പോള്‍ സമരത്തിന് അനുകൂലമായ നിലപാാണ് വി.എസ് സ്വീകരിച്ചത്. അന്ന് മമ്മൂട്ടിയെ കൊക്കകോളയുടെ ബ്രാന്‍ഡ് അംബാസഡറാക്കാന്‍ കമ്പനി തീരുമാനിച്ചിരുന്നു. 2 കോടി രൂപയുടെ വമ്പന്‍ ഓഫറാണ് കൊക്കകോള മുന്നോട്ടു വച്ചതെന്നായിരുന്നു റിപ്പോര്‍ട്ടുകള്‍. പാര്‍ട്ടി ചാനലായ കൈരളിയുടെ ചെയര്‍മാന്‍ കൂടിയായിരുന്നു മമ്മൂട്ടി അപ്പോള്‍.

കോട്ടയം ഗസ്റ്റ് ഹൗസില്‍ വച്ച് പ്രതിപക്ഷ നേതാവായ വി.എസിനോട് മമ്മൂട്ടി കൊക്കകോളയുടെ ബ്രാന്‍ഡ് അംബാസഡറാകുന്നതിനെ കുറിച്ച് മാദ്ധ്യമ പ്രവര്‍ത്തകര്‍ ചോദിച്ചു. വി.എസ് ചോദ്യത്തിന് മറുപടിയും നല്‍കി. ഒന്നുകില്‍ മമ്മൂട്ടിക്ക് കൈരളിയുടെ മാനേജരായി തുടരാം, ഇല്ലെങ്കില്‍ കൊക്കകോളയുടെ അംബാസഡറാകാം എന്നായിരുന്നു വി.എസ് പറഞ്ഞത്.

ജലചൂഷണവും പരിസ്ഥിത നാശവും വരുത്തുന്ന, ജനജീവിതം ദുരിതമാക്കിയ കൊക്കകോളയെ ഇടതുപക്ഷ ചാനലിന്റെ ചെയര്‍മാന്‍ എങ്ങനെ പ്രതിനിധീകരിക്കും എന്ന ചോദ്യമാണ് വി.എസ് ഉയര്‍ത്തിയത്. ഇതിന് പിന്നാലെ കൊക്കകോളയുടെ ബ്രാന്‍ഡ് അംബാസഡറാകാനുള്ള തീരുമാനത്തില്‍ നിന്ന് മമ്മൂട്ടി പിന്‍മാറുകയായിരുന്നു.